​મુંગેર: બિહારમાં દારૂબંધીના કડક કાયદાઓ વચ્ચે પોલીસ કસ્ટડીમાં એક યુવાનના શંકાસ્પદ મોતની ગંભીર ઘટના સામે આવી છે. રાજ્યના મુંગેર જિલ્લામાં પ્રોહિબિશન, એક્સાઇઝ અને રજિસ્ટ્રેશન વિભાગ દ્વારા દારૂ પીવાના આરોપમાં અટકાયત કરવામાં આવેલા ૨૨ વર્ષીય યુવાનનું પોલીસ લોકઅપમાં મૃત્યુ થતા ભારે સનસનાટી મચી જવા પામી છે.

​પ્રાપ્ત વિગતો અનુસાર, મૃતક યુવાનની ઓળખ મુંગેરમાં બાગેશ્વરી વિસ્તારના રહેવાસી અમન તરીકે કરવામાં આવી છે. રાજ્યમાં દારૂબંધીના નિયમોના ભંગ બદલ તેની ધરપકડ કરવામાં આવી હતી. અધિકારીઓના જણાવ્યા મુજબ, બુધવારે ધરપકડ બાદ તેને અન્ય આરોપીઓ સાથે પ્રોહિબિશન વિભાગના પોલીસ સ્ટેશનના લોકઅપમાં રાખવામાં આવ્યો હતો.

​જોકે, શુક્રવારે વહેલી સવારે લગભગ ૨ વાગ્યાના સુમારે આ યુવાનનો મૃતદેહ લોકઅપ સાથે જોડાયેલા શૌચાલયના વેન્ટિલેટર પર લટકતી હાલતમાં મળી આવ્યો હતો. આ ઘટનાની જાણ થતાં જ પોલીસ વિભાગમાં દોડધામ મચી ગઈ હતી. તત્કાલ યુવાનને નજીકની સરકારી હોસ્પિટલમાં સારવાર માટે લઈ જવામાં આવ્યો હતો, પરંતુ ત્યાં ફરજ પરના તબીબોએ તેને મૃત જાહેર કર્યો હતો.

​પ્રોહિબિશન અને એક્સાઇઝ વિભાગના ઇન્સ્પેક્ટર સુમન કુમારે જણાવ્યું હતું કે, સમગ્ર મામલાની તપાસ હાથ ધરવામાં આવી છે. મેડિકલ તપાસ બાદ યુવાનને કસ્ટડીમાં રાખવામાં આવ્યો હતો અને તેની સાથે અન્ય આરોપીઓ પણ હતા. લોકઅપમાં બનેલી આ ઘટનાએ સુરક્ષા વ્યવસ્થા પર અનેક પ્રશ્નો ઉભા કર્યા છે. મૃતકના પરિજનોમાં આ ઘટનાને લઈને ભારે આક્રોશ જોવા મળી રહ્યો છે. હાલમાં તંત્ર દ્વારા આ કેસની સઘન તપાસ કરવાની ખાતરી આપવામાં આવી છે, જ્યારે આ કમનસીબ ઘટનાને પગલે સમગ્ર વિસ્તારમાં ચર્ચાનો વિષય બન્યો છે.