નવી દિલ્હી, તા.૦૭: રશિયાના મોસ્કો શહેરમાં કામ કરતા ભારતીય એન્જિનિયર ચંદન ગુપ્તાની રશિયન પોલીસ દ્વારા અચાનક અને શંકાસ્પદ સંજોગોમાં અટકાયત કરવામાં આવતાં ભારે સળવળાટ મચી ગયો છે. ચંદનની પત્ની સ્નેહા ગુપ્તાએ એક વિડીયો સંદેશ જાહેર કરીને આશંકા વ્યક્ત કરી છે કે તેમના પતિને રશિયન સેનામાં બળજબરીથી ભરતી કરવાના હેતુથી કસ્ટડીમાં રાખવામાં આવ્યા હોઈ શકે છે. આ ગંભીર પરિસ્થિતિને ધ્યાને રાખીને તેમણે વડાપ્રધાન નરેન્દ્ર મોદી અને ઉત્તર પ્રદેશના મુખ્યમંત્રી યોગી આદિત્યનાથને પતિની સુરક્ષિત મુક્તિ માટે તાકીદે હસ્તક્ષેપ કરવા અપીલ કરી છે.

મૂળ ઉત્તર પ્રદેશના કાનપુરના વતની ચંદન ગુપ્તા નોઈડાના સેક્ટર-૬૨ સ્થિત 'પોલીફિલ્મ્સ' કંપની તરફથી મોસ્કોમાં એન્જિનિયર તરીકે કાર્યરત છે. સ્નેહાના જણાવ્યા અનુસાર, મોડી રાત્રે આશરે ૧૨:૩૦ વાગ્યે રશિયન પોલીસે કોઈપણ સ્પષ્ટ કારણ આપ્યા વગર ચંદનની અટકાયત કરી હતી અને બાદમાં તેમને જેલમાં મોકલી આપવામાં આવ્યા હતા. ચંદને કોઈ પણ પ્રકારનો ગુનો કે નિયમભંગ કર્યો નથી, છતાં તેમની સાથે આ પ્રકારનું વર્તન કરવામાં આવ્યું છે.

સોશિયલ મીડિયા પર વાયરલ થયેલા વિડીયોમાં સ્નેહાએ ભારે હૈયે જણાવ્યું હતું કે તે પોતાના ૧૦ વર્ષના બાળકની સાથે મોસ્કોમાં એકલી પડી ગઈ છે અને સ્થાનિક રશિયન ભાષા ન આવડતી હોવાથી ભારે મુશ્કેલીઓનો સામનો કરી રહી છે. તેમણે મોસ્કો સ્થિત ભારતીય દૂતાવાસનો પણ સંપર્ક સાધ્યો હતો, પરંતુ હજુ સુધી ત્યાંથી કોઈ મજબૂત કે નક્કર સહાય મળી નથી. યુક્રેન યુદ્ધ વચ્ચે રશિયામાં ભારતીય નાગરિકોને સેનામાં સામેલ કરવાના અગાઉના કિસ્સાઓને ધ્યાનમાં રાખીને પરિવાર અત્યંત ભયભીત છે.

વિદેશમાં વસતા ભારતીયોની સુરક્ષા માટે ભારતીય દૂતાવાસોએ વધુ સક્રિય અને ઝડપી એક્શન લેવાની જરૂર છે.