​ચેન્નઈ:તમિલનાડુ અને કર્ણાટક વચ્ચે દાયકાઓ જૂના કાવેરી નદીના પાણીની વહેંચણીના વિવાદને સૌહાર્દપૂર્ણ રીતે ઉકેલવા માટે તમિલનાડુના મુખ્યમંત્રી સી. જોસેફ વિજયે એક નવો વળાંક આપ્યો છે, જેના કારણે રાજ્યના રાજકીય વર્તુળોમાં ભારે ખળભળાટ મચી ગયો છે. મુખ્યમંત્રી વિજય આગામી ૩ ઓગસ્ટના રોજ કર્ણાટકની મુલાકાતે જવાના છે, જ્યાં તેઓ બેંગલુરુમાં કર્ણાટકના મુખ્યમંત્રી ડી.કે. શિવકુમાર સાથે સીધી દ્વિપક્ષીય મંત્રણા કરશે. જોકે, કાયદાકીય લડત અને સુપ્રિમ કોર્ટના આદેશોની પરંપરાને છોડીને સીધી મંત્રણા કરવાના મુખ્યમંત્રીના આ નિર્ણય સામે તમિલનાડુના ખેડૂત સંગઠનો અને અગ્રણી વિરોધ પક્ષોએ મોરચો ખોલ્યો છે અને આ આયોજનની આકરી આલોચના કરી છે.

​તમિલનાડુના કૃષિ મંત્રી આર. વિનોથે પત્રકારોને આ પ્રસ્તાવિત મુલાકાત અંગે સત્તાવાર પુષ્ટિ આપતા જણાવ્યું હતું કે, મુખ્યમંત્રી વિજય ૩ ઓગસ્ટે બેંગલુરુ જશે અને કર્ણાટક સરકારના સત્તાવાર આમંત્રણને સ્વીકારીને બંને રાજ્યો વચ્ચે કાવેરી જળ વિવાદ તેમજ વિવાદાસ્પદ મેકેદાતુ ડેમ પ્રોજેક્ટ અંગે ચર્ચા કરશે. કૃષિ મંત્રીએ સ્પષ્ટ કર્યું હતું કે, તમિલનાડુ સરકાર મેકેદાતુ ખાતે ડેમ બનાવવાના કર્ણાટકના પ્રસ્તાવનો સખત વિરોધ કરે છે અને રાજ્યના ખેડૂતોના હિતોનું રક્ષણ કરવા માટે કાવેરીના પાણીનો કાયદેસરનો હિસ્સો મેળવીને જ રહેશે.

​૧૪ વર્ષ બાદ પ્રથમ વખત સીએમ કક્ષાની સીધી વાટાઘાટો

આ બેઠક એટલા માટે મહત્વપૂર્ણ માનવામાં આવે છે કારણ કે છેલ્લા ૧૪ વર્ષમાં આ પ્રથમ તક છે જ્યારે બંને રાજ્યોના મુખ્યમંત્રીઓ કાવેરી મુદ્દે આમને-સામને બેસીને ચર્ચા કરશે. આ પૂર્વે નવેમ્બર ૨૦૧૨માં તત્કાલીન મુખ્યમંત્રી જે. જયલલિતા અને કર્ણાટકના તત્કાલીન સીએમ જગદીશ શેટ્ટાર વચ્ચે સુપ્રિમ કોર્ટની સલાહ બાદ બેઠક યોજાઈ હતી, જે નિષ્ફળ રહી હતી. ભૂતકાળમાં ૧૯૭૦ અને ૧૯૮૦ના દાયકામાં તત્કાલીન મુખ્યમંત્રી એમ.જી. રામચંદ્રને પોતાના વ્યક્તિગત સંબંધોનો ઉપયોગ કરીને કર્ણાટક સાથે સીધી વાતચીત દ્વારા પાણી મેળવવામાં સફળતા મેળવી હતી, જે ઇતિહાસનું સીએમ વિજય પુનરાવર્તન કરવા ઈચ્છી રહ્યા હોવાનું મનાય છે.

​પાણીની ભયંકર અછત અને આંકડાકીય વિવાદ

સુપ્રિમ કોર્ટના નિર્દેશો અનુસાર, ચાલુ વર્ષે ૧ જૂનથી ૨૨ જુલાઈ દરમિયાન તમિલનાડુને ૩૧ ટીએમસી (TMC) પાણી મળવું જોઈતું હતું, પરંતુ તેના બદલે કર્ણાટક તરફથી માત્ર ૩.૫ ટીએમસી પાણી જ છોડવામાં આવ્યું છે. કર્ણાટક સરકારે ઓછા વરસાદ અને દુષ્કાળ જેવી સ્થિતિનું બહાનું ધરીને વધુ પાણી આપવાનો ઈનકાર કર્યો છે. હાલમાં તમિલનાડુના મેટ્ટુર જળાશયમાં તેની કુલ ૯૩ ટીએમસીની ક્ષમતા સામે માત્ર ૩૭ ટીએમસી પાણી ઉપલબ્ધ છે, જેના કારણે 'કુરુવાઈ' પાક સંકટમાં મુકાયો છે. કાવેરી વોટર મેનેજમેન્ટ ઓથોરિટી (CWMA) એ પણ હાલ આ મામલો નિયમન સમિતિ (CWRC) પર છોડ્યો છે.

​રાજકીય પક્ષો અને ખેડૂતોનો ભારે રોષ

તમિલનાડુ કાવેરી ખેડૂત સંઘના પ્રમુખ પી.આર. પાંડિયને મુખ્યમંત્રીના આ પગલા સામે આશ્ચર્ય અને આક્રોશ વ્યક્ત કરતા જણાવ્યું છે કે, સુપ્રિમ કોર્ટ દ્વારા સ્થાપિત કાયદાકીય માળખા અને ઓથોરિટીને બાયપાસ કરીને આવી દ્વિપક્ષીય બેઠકો યોજવી એ તમિલનાડુના હિતોની વિરુદ્ધ છે. ભૂતકાળમાં આવી પચાસથી વધુ બેઠકો નિષ્ફળ રહી છે.

​બીજી તરફ, પીએમકે (PMK) ના નેતા અન્બુમણી રામદોસે પણ મેકેદાતુ પ્રોજેક્ટ અંગે કર્ણાટક સાથે કોઈપણ પ્રકારની ચર્ચા કરવાની યોજનાની આકરા શબ્દોમાં નિંદા કરી છે. વિપક્ષ એઆઈએડીએમકે (AIADMK) ના વડા એડપ્પાદી કે. પલાનીસ્વામી અને ડીએમકે (DMK) ના પ્રવક્તા કોન્સ્ટેન્ટાઇન રવિન્દ્રને પણ મુખ્યમંત્રી વિજયને ચેતવણી આપી છે કે કર્ણાટક આ બેઠકનો ઉપયોગ મેકેદાતુ ડેમના નિર્માણ માટે પોતાની તરફેણમાં ન કરી લે તે જોવાની જવાબદારી સીએમની રહેશે. ભાજપના પ્રવક્તા નારાયણન તિરુપતિએ પણ માંગ કરી છે કે તમિલનાડુના મુખ્યમંત્રીએ બેઠકમાં સ્પષ્ટ શબ્દોમાં કહી દેવું જોઈએ કે તમિલનાડુની સંમતિ વિના મેકેદાતુ ડેમનું એક પણ ઈંટનું કામ થઈ શકશે નહીં. ઓગસ્ટના પ્રથમ સપ્તાહમાં શરૂ થઈ રહેલા વિધાનસભાના બજેટ સત્ર પહેલા યોજાનારી આ બેઠક પર દેશભરના રાજકીય વિશ્લેષકોની નજર મંડાયેલી છે.