મુંબઈ : ભારતીય IT દિગ્ગજ ટાટા કન્સલ્ટન્સી સર્વિસીસ (TCS) હવે આર્ટિફિશિયલ ઇન્ટેલિજન્સના મોરચે આક્રમક રણનીતિ અપનાવી રહી છે. કંપની ગ્રાહકોને AI ટૂલ્સના ઉપયોગમાં મદદ કરવા માટે ૫,૯૦૦ થી ૮,૯૦૦ જેટલા 'ફોરવર્ડ-ડિપ્લોયમેન્ટ એન્જિનિયરો' (FDE) ની એક વિશિષ્ટ ટીમ બનાવી રહી છે. આ પગલું ટેક કંપનીઓને OpenAI અને Microsoft જેવી વૈશ્વિક જાયન્ટ્સ સામે સ્પર્ધાત્મક ધાર આપશે.
TCS ના CEO કે. કૃતિવાસને એક મુલાકાતમાં સ્પષ્ટ કર્યું હતું કે તેઓ તેમના કુલ સ્ટાફના ૧% થી ૧.૫% જેટલા કર્મચારીઓને AI નિષ્ણાત તરીકે તૈયાર કરી રહ્યા છે. વર્ષો સુધી ઓર્ગેનિક ગ્રોથ પર નિર્ભર રહ્યા બાદ, કંપની હવે AI, ડેટા સિક્યુરિટી અને સાયબર સિક્યુરિટીના ક્ષેત્રમાં નવી કંપનીઓના અધિગ્રહણ (Acquisitions) માટે પણ સક્રિયપણે તપાસ કરી રહી છે.
રોકાણકારોમાં એવી ચિંતા હતી કે AI ને કારણે IT પ્રોજેક્ટ્સની માંગ ઘટશે અને સમયરેખા ટૂંકી થઈ જશે, પરંતુ TCS એ આ પડકારને તકમાં ફેરવવાનો નિર્ણય લીધો છે. કંપનીનું માનવું છે કે AI આઉટસોર્સિંગ ઉદ્યોગને નુકસાન પહોંચાડવાને બદલે, તે નવા વ્યવસાયિક અવસરોનું સર્જન કરશે. આ નવી ટુકડી ગ્રાહકોને આધુનિક ટેકનોલોજીના ઉપયોગમાં માર્ગદર્શન આપીને કંપનીની સેવાઓને વધુ મૂલ્યવાન બનાવશે.
હવે TCS દ્વારા લેવાયેલું આ વ્યૂહાત્મક પગલું ભારતના ૩૧૫ બિલિયન ડોલરના IT સર્વિસ ઉદ્યોગ માટે એક ટર્નિંગ પોઈન્ટ સાબિત થઈ શકે છે. આ નિષ્ણાતોની ટીમ બનાવ્યા બાદ, કંપની પોતાની સેવાઓની ક્ષમતામાં અનેકગણો વધારો કરશે. હવે જોવાનું એ રહેશે કે TCS આ નવી નિમણૂકો બહારથી કરે છે કે પોતાના હાલના કુશળ કર્મચારીઓને નવી તાલીમ આપીને આ નવી પેઢીની જરૂરિયાતો માટે તૈયાર કરે છે.