જિનીવા :

વિશ્વભરમાં કર્મચારીઓની માનસિક સ્વાસ્થ્ય અને ખુશીને પ્રાથમિકતા આપવા માટે સ્વિસ અને અમેરિકન ટેક કંપની 'લોજીટેક' દ્વારા એક અત્યંત આશ્ચર્યજનક અને આકર્ષક પગલું ભરવામાં આવ્યું છે. કંપનીએ તેના આશરે ૭,૦૦૦ જેટલા કર્મચારીઓને પોતાની મનપસંદ વિડિઓ ગેમ્સ રમવા માટે આખા વર્ષ દરમિયાન ગમે ત્યારે એક દિવસની વિશેષ પેઇડ લીવ (સવેતન રજા) આપવાની જાહેરાત કરી છે. આ વિશેષ સુવિધાનો લાભ માત્ર કાયમી કર્મચારીઓ જ નહીં, પરંતુ ઇન્ટર્ન અને કોન્ટ્રાક્ટ પર કામ કરતા કર્મચારીઓને પણ મળવાપાત્ર રહેશે, જેણે ટેક જગતમાં ભારે કુતૂહલ જગાવ્યું છે.

કંપનીએ આ અનોખી પહેલને 'લોજી ગેમ ડે' નામ આપ્યું છે, જેના હેઠળ કર્મચારીઓ આગામી વર્ષ માટે પોતાની અનુકૂળતા મુજબનો દિવસ પસંદ કરીને મનપસંદ ગેમ રમી શકશે. લોજીટેકના ચીફ પીપલ ઓફિસર એલેન લેયર્ડ અને ચીફ ફાઇનાન્શિયલ ઓફિસર માટ્ટેઓ અનવર્સા સહિતના વરિષ્ઠ અધિકારીઓએ પણ આ ઉત્સાહમાં જોડાઈને 'ફોર્ઝા' જેવા રેસિંગ સિમ્યુલેટર રમવાની યોજના બનાવી છે. કંપનીનું માનવું છે કે હવે વીડિયો ગેમિંગને માત્ર સમય બગાડવાની માનસિકતાથી જોવાનો સમય પૂરો થયો છે, કારણ કે ગેમ્સ રમવાથી આત્મવિશ્વાસ વધે છે અને તણાવ ઘટે છે.

આગામી ચર્ચાસ્પદ વિડિઓ ગેમ 'ગ્રાન્ડ થેફ્ટ ઓટો VI' (GTA VI) નું લોન્ચિંગ નજીક આવી રહ્યું છે ત્યારે તેની જબરદસ્ત માંગને ધ્યાનમાં રાખીને આ નિર્ણય લેવામાં આવ્યો છે. આગામી ૧૯ નવેમ્બરના રોજ કંપનીના સેન જોસ મુખ્યાલય ખાતે એક ભવ્ય ગેમિંગ લાઇવસ્ટ્રીમ અને સ્પર્ધાનું આયોજન પણ કરવામાં આવ્યું છે, જ્યાં કર્મચારીઓ એકબીજા સામે પોતાની ગેમિંગ કૌશલ્યનું પ્રદર્શન કરશે. BambooHR ના ડેટા મુજબ તાજેતરમાં આવા મોટા ગેમ લોન્ચિંગના દિવસે રજાઓની માંગમાં ૧૩ ટકા સુધીનો વધારો નોંધાયો છે.

આગામી સમયમાં કોર્પોરેટ જગતમાં કર્મચારીઓના માનસિક સંતોષ અને વર્ક-લાઇફ બેલેન્સ માટે આવી અવનવી પહેલો શરૂ થવાના મંડાણ થયા છે. લોજીટેકના આ પગલાથી અન્ય મોટી મલ્ટીનેશનલ કંપનીઓ પણ પ્રેરણા લઈને કર્મચારીઓની ખુશી માટે આવા પ્રોત્સાહક પગલાં ભરે તેવી પૂરી સંભાવના છે, જે ભવિષ્યમાં કાર્યસંસ્કૃતિમાં એક સકારાત્મક બદલાવ લાવશે.