નવી દિલ્‍હી તા.૧૮: ૨૦૨૬ની શરૂઆત વૈશ્વિક ટેકનોલોજી ક્ષેત્ર માટે ખૂબ પડકારજનક સાબિત થઈ છે. તાજેતરના એક અહેવાલ મુજબ, વિશ્વભરની મોટી ટેક કંપનીઓએ આ વર્ષના પ્રથમ ક્‍વાર્ટર (Q1) માં ૮૦,૦૦૦ થી વધુ કર્મચારીઓને છટણી કરી છે. નિષ્‍ણાતોનો અંદાજ છે કે, જો છટણીનો આ દર ચાલુ રહેશે, તો આ વર્ષે કુલ આંકડો ૩,૦૦,૦૦૦ થી વધુ થઈ શકે છે.

રિપોર્ટ મુજબ, આ છટણીઓનું નેતૃત્‍વ ઓરેકલ, એમેઝોન અને મેટા જેવા ટેક જાયન્‍ટ્‍સ દ્વારા કરવામાં આવ્‍યું છે. ઓરેકલે તેના AI ઈન્‍ફ્રાસ્‍ટ્રક્‍ચરને મજબૂત બનાવવાના પ્રયાસમાં લગભગ ૨૫,૦૦૦ પોઝિશન્‍સ દૂર કરી છે - જે છટણીનો તેનો અત્‍યાર સુધીનો સૌથી મોટો રાઉન્‍ડ છે. દરમિયાન, એમેઝોને ઓપરેશનલ કાર્યક્ષમતા વધારવાના ઉદ્દેશ્‍યથી ૧૬,૦૦૦ કર્મચારીઓની છટણી કરી છે. માર્ક ઝુકરબર્ગની કંપની, મેટાએ પણ લગભગ ૨,૪૦૦ પોઝિશન્‍સ દૂર કરી છે.

રસપ્રદ વાત એ છે કે, ૨૦૨૬ માં થનારી લગભગ ૫૦ ટકા છટણી સીધી રીતે આર્ટિફિશિયલ ઈન્‍ટેલિજન્‍સ અને ઑટોમેશન સાથે જોડાયેલી છે. કંપનીઓ હવે તેમના બજેટનો નોંધપાત્ર ભાગ હ્યુમન રિસોર્સ પરથી હટાવી AI ઇન્‍ફ્રાસ્‍ટ્રક્‍ચર અને ડેટા સેન્‍ટરો તરફ વાળી રહી છે. અહેવાલમાં જણાવાયું છે કે, આ છટણી ફક્‍ત ઓટોમેશનનું પરિણામ નથી, પરંતુ AI માં રોકાણ માટે ભંડોળ એકત્ર કરવા માટે હાથ ધરવામાં આવેલા નિવારક ખર્ચ-કપાતનું એક સ્‍વરૂપ છે.

વૈશ્વિક સ્‍તરે, યુનાઇટેડ સ્‍ટેટ્‍સ સૌથી વધુ પ્રભાવિત બજાર રહ્યું છે. કુલ છટણીમાંથી લગભગ ૭૭ ટકા (૬૧,૦૦૦ થી વધુ નોકરીઓ) ફક્‍ત યુએસ માર્કેટમાં જ થઈ છે. તેનાથી વિપરીત, ભારતમાં અત્‍યાર સુધીમાં લગભગ ૨,૦૦૦ છટણી નોંધાઈ છે, મુખ્‍યત્‍વે ઈ-કોમર્સ ક્ષેત્ર અને AI સ્‍ટાર્ટઅપ્‍સમાં. યુરોપમાં, નેધરલેન્‍ડ અને સ્‍વીડન જેવા દેશોમાં પણ સેમિકન્‍ડક્‍ટર અને IT સર્વિસ સેક્‍ટર્સમાં મંદી જોવા મળી છે.

ક્ષેત્રવાર દ્રષ્ટિકોણથી, ક્‍લાઉડ કમ્‍પ્‍યુટિગ અને SaaS (સોફટવેર-એઝ-એ-સર્વિસ) કંપનીઓમાં સૌથી વધુ ૨૮,૦૦૦ નોકરીઓ ગઈ, ત્‍યારબાદ ઈ-કોમર્સ સેક્‍ટરનો ક્રમ આવે છે, જ્‍યાં ૧૯,૦૦૦ થી વધુ વ્‍યક્‍તિઓએ તેમની નોકરી ગુમાવી છે.

નિષ્‍ણાંતો માને છે કે આ પોસ્‍ટ-પેન્‍ડેમિક સુધારાનો ભાગ છે. કંપનીઓ હવે ઝડપથી વિકસિત ટેકનોલોજીઓ સાથે અનુકૂલન સાધી રહી છે, જેના કારણે પરંપરાગત રોજગાર માળખામાં ફેરફાર અનિવાર્ય બની રહ્યા છે.