અમેરિકાના કેલિફોર્નિયામાં ભંયકર માર્ગ અકસ્માતમાં હૈદરાબાદના એક પરિવારના ત્રણ સભ્યોના મોત થયા છે અને અન્ય બે ગંભીર રીતે ઘાયલ થયા છે. પરિવારને આ અંગેની જાણકારી મળી હતી. આ અકસ્માત સોમવારે રાત્રે (ભારતીય સમય મુજબ) થયો હતો, જ્યારે પરિવારનું વાહન અન્ય એક વાહન સાથે અથડાયું હતું. મૃતકોની ઓળખ નાઝિયા સલમા તથા તેમની પુત્રી અને પુત્ર તરીકે કરવામાં આવી છે, જ્યારે નાઝિયાના પતિ શેખ નવીદ અને તેમની નાની પુત્રીને ગંભીર ઈજાઓ પહોંચી છે અને તેમને હોસ્પિટલમાં દાખલ કરવામાં આવ્યા છે.

અકસ્માત ત્યારે થયો જ્યારે તેઓ તેમના પરિવાર સાથે મુસાફરી કરી રહ્યા હતા. નવીદના પિતા, શેખ અબ્દુલ સઈદે જણાવ્યું હતું કે જ્યારે તેમણે તેમના પુત્રનો સંપર્ક કરવાનો પ્રયાસ કર્યો ત્યારે તેમને અમેરિકન પોલીસ પાસેથી અકસ્માત વિશે જાણ થઈ હતી. તેમણે વિદેશ મંત્રી એસ. જયશંકરને વિનંતી કરી છે કે તેઓ પરિવારના અન્ય સભ્યોને તાત્કાલિક વિઝા (ઇમરજન્સી વિઝા) આપે જેથી તેઓ અમેરિકા જઈ શકે.