ટોક્યો:વૈશ્વિક સ્તરે બદલાઈ રહેલા હવામાનની વચ્ચે જાપાનમાં કુદરતનો પ્રકોપ જોવા મળી રહ્યો છે. જાપાનના દરિયાકાંઠાના વિસ્તારોમાં અત્યંત શક્તિશાળી ટ્રોપિકલ ચક્રવાત (વાવાઝોડું) 'જંગમી' ત્રાટકવાને કારણે સમગ્ર દેશમાં હાહાકાર મચી ગયો છે. જાપાનના હવામાન વિભાગ દ્વારા દેશના અનેક હિસ્સાઓમાં આગામી સમય માટે અતિભારેથી અતિ વગાડ વરસાદની કડક ચેતવણી (વેધર એલર્ટ) જારી કરવામાં આવી છે. વાવાઝોડાની ભયાનક તીવ્રતાને જોતા વહીવટી તંત્ર દ્વારા યુદ્ધના ધોરણે બચાવ કામગીરી અને સાવચેતીના પગલાં લેવામાં આવી રહ્યા છે.
આ ભયાનક વાવાઝોડાની સીધી અસર જાપાનના હવાઈ વ્યવહાર પર સૌથી વધુ જોવા મળી છે. ખરાબ હવામાન અને જોરદાર પવનના કારણે અત્યાર સુધીમાં ૯૦૦ થી વધુ સ્થાનિક અને આંતરરાષ્ટ્રીય ફ્લાઈટ્સ સત્તાવાર રીતે રદ કરી દેવામાં આવી છે. એરપોર્ટ પર ફ્લાઈટ્સ રદ થવાના કારણે હજારોથી લાખોની સંખ્યામાં મુસાફરો દર-દર ભટકી રહ્યા છે અને એરપોર્ટ પરિસરમાં જ ફસાઈ ગયા છે. એરલાઇન્સ કંપનીઓએ મુસાફરોને આગામી આદેશ સુધી એરપોર્ટ તરફ ન આવવાની અને હવામાન સાફ થાય ત્યાં સુધી રાહ જોવાની અપીલ કરી છે.
હવામાન વિભાગના અધિકારીઓના જણાવ્યા અનુસાર, વાવાઝોડું 'જંગમી' જાપાનના જમીની ભાગો તરફ ખૂબ જ ઝડપથી આગળ વધી રહ્યું છે. તેના કારણે દરિયામાં ઊંચા મોજા ઉછળી રહ્યા છે અને તટીય વિસ્તારોમાં તેજ ગતિએ પવન ફૂંકાઈ રહ્યો છે. સરકાર દ્વારા આ વિસ્તારોમાં પૂર (ફ્લડ) અને પહાડી વિસ્તારોમાં જમીન ધસી પડવાની એટલે કે ભૂસ્ખલન (લેન્ડસ્લાઈડ) ની ગંભીર આશંકા વ્યક્ત કરવામાં આવી છે, જેને પગલે નીચાણવાળા વિસ્તારોમાં રહેતા લાખો નાગરિકોને તાત્કાલિક અસરથી પોતાના ઘર ખાલી કરીને સુરક્ષિત આશ્રયસ્થાનોમાં સ્થળાંતર કરી જવા માટે વહીવટી આદેશો આપવામાં આવ્યા છે.
માત્ર હવાઈ સેવા જ નહીં, પરંતુ જાપાનની લાઈફલાઈન ગણાતી હાઈ-સ્પીડ બુલેટ ટ્રેનો અને સ્થાનિક રેલવે વ્યવહારને પણ સુરક્ષાના કારણોસર અટકાવી દેવામાં આવ્યો છે. ટ્રેનો બંધ થવાના કારણે નોકરિયાતો અને સામાન્ય જનજીવન સંપૂર્ણપણે પ્રભાવિત થયું છે. આ ઉપરાંત હાઈવે પર વાહનોની અવરજવર પર પણ પ્રતિબંધ મૂકવામાં આવ્યો છે. આપત્તિ વ્યવસ્થાપન ટીમો (ડિઝાસ્ટર મેનેજમેન્ટ) અને સ્થાનિક પોલીસ તંત્રને કોઈપણ કટોકટીની સ્થિતિને પહોંચી વળવા માટે ૨૪ કલાક એલર્ટ મોડ પર રાખવામાં આવ્યા છે.