નવી દિલ્હી, તા.૧૮: હાલના સમયમાં ભારત એક એવી ગંભીર અને અદ્રશ્ય આરોગ્ય કટોકટીનો (Health Crisis) સામનો કરી રહ્યું છે, જેના વિશે મોટાભાગના લોકો બિલકુલ બેફિકર છે. પ્રખ્યાત મેડિકલ જર્નલ 'ધ હિન્દુ'ના અહેવાલ અનુસાર, દેશમાં હાઈપરટેન્શન એટલે કે હાઈ બ્લડ પ્રેશર (High Blood Pressure) સાથે જીવતા આશરે ૧૮૮.૩ મિલિયન (૧૮.૮ કરોડ) પુખ્ત વયના લોકોમાંથી માત્ર ૧૫% લોકો જ પોતાની આ બીમારીને નિયંત્રણમાં રાખવામાં સફળ થાય છે. બાકીના ૮૫% લોકો સંપૂર્ણપણે સામાન્ય જીવન જીવે છે, તેમને લાગે છે કે તેઓ એકદમ ફિટ છે, તેઓ રોજ ઓફિસે જાય છે, સારી ઊંઘ લે છે અને જ્યાં સુધી કોઈ તકલીફ ન થાય ત્યાં સુધી ડૉક્ટર પાસે જવાનું કોઈ કારણ જોતા નથી. પરંતુ, તેમની આ જ બેદરકારી પાછળથી જીવલેણ સાબિત થાય છે.

તબીબી નિષ્ણાતોના મતે, નિયમિત સ્ક્રીનીંગ એ જ આ એવી ગંભીર સ્થિતિને શોધવાનો એકમાત્ર રસ્તો છે, જે બહારથી દેખાતી નથી પણ અંદરથી શરીરને ખતમ કરી રહી છે.

કેમ આ બીમારીને કહેવાય છે 'સાયલન્ટ કિલર'?

હાઈપરટેન્શનને તબીબી વિજ્ઞાનમાં અન્ય તમામ ગંભીર બીમારીઓ કરતાં બિલકુલ અલગ અને વધુ ખતરનાક માનવામાં આવે છે. તેનું મુખ્ય કારણ એ છે કે આ બીમારી થવા પર શરીરમાં કોઈ શરૂઆતી દુખાવો થતો નથી, કોઈ અસાધારણ થાક લાગતો નથી, કે એવો કોઈ સ્પષ્ટ સંકેત નથી મળતો કે શરીરમાં કંઈક ખોટું થઈ રહ્યું છે. આ એક એવું છુપો દુશ્મન છે જે વર્ષો સુધી લોહી વહન કરતી ધમનીઓની દિવાલો, હૃદય અને કિડનીને શાંતિથી નુકસાન પહોંચાડતું રહે છે, જ્યારે તેનો ભોગ બનેલી વ્યક્તિ પોતાના સ્વાસ્થ્ય વિશે સંપૂર્ણપણે અજાણ રહે છે. ઘણા કિસ્સાઓમાં, દર્દીને પોતાની આ બીમારીની ખબર ત્યારે જ પડે છે જ્યારે તેને પહેલીવાર સીધો બ્રેઈન સ્ટ્રોક કે હૃદયરોગનો ગંભીર હુમલો (Heart Attack) આવે છે.

સમયની માંગ: લક્ષણોની રાહ જોયા વિના કરાવો બીપી ચેક

આરોગ્ય નિષ્ણાતો ચેતવણી આપતાં કહે છે કે, "લક્ષણો ન હોવાનો અર્થ એ નથી કે તમે જોખમથી બહાર છો." આજના તણાવપૂર્ણ જીવન, અનિયમિત ખાનપાન અને શારીરિક શ્રમના અભાવને કારણે યુવાનોમાં પણ હાઈ બ્લડ પ્રેશરનું પ્રમાણ ઝડપથી વધી રહ્યું છે.

આ અદ્રશ્ય કટોકટીમાંથી બચવાનો એકમાત્ર રામબાણ ઈલાજ એ છે કે, ૩૦ વર્ષની ઉંમર વટાવ્યા પછી દરેક નાગરિકે કોઈ પણ લક્ષણની રાહ જોયા વિના સમયાંતરે પોતાનું બ્ડ પ્રેશર નિયમિત રીતે મપાવવું જોઈએ. વહેલી ખબર પડવાથી માત્ર સામાન્ય દવાઓ અને જીવનશૈલીમાં બદલાવ કરીને હાર્ટ અટેક, કિડની ફેલ્યોર અને અકાળ મૃત્યુ જેવા મોટા જોખમોથી બચી શકાય છે. તમારી આ નાની જાગૃતિ જ તમને અને તમારા પરિવારને મોટી સ્વાસ્થ્ય આફતોથી સુરક્ષિત રાખી શકે છે.