<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Wednesday, 18th November 2026

મુંબઈની કિંમતી જમીનો ખાનગી સંસ્થાઓને સોંપવાના વિરોધમાં ઠાકરે જૂથની ચીમકી: મહાયુતિ સરકાર સામે આરપારની લડાઈ

પાલિકાના અબજો રૂપિયાના પ્લોટ સસ્તા ભાવે વેડી નાખવાના ગંભીર આરોપો સાથે પ્રસ્તાવો સામે કાયદાકીય પગલાં ભરવાની તૈયારીઓ દર્શાવાઈ છે.

મુંબઈ : મુંબઈ મહાનગરપાલિકા હસ્તકની કરોડો રૂપિયાની કિંમતી જમીનો અને પ્લોટ ખાનગી વિકાસકર્તાઓ તેમજ સંસ્થાઓને સોંપવાના ચાલી રહેલા પ્રયાસો સામે શિવસેના (ઉદ્ધવ બાળાસાહેબ ઠાકરે) જૂથ દ્વારા ઉગ્ર વિરોધ નોંધાવવામાં આવ્યો છે, જેના કારણે રાજ્યનું રાજકીય વાતાવરણ ગરમાયું છે.

 

શહેરના વરળી વિસ્તારમાં આવેલા અબજો રૂપિયાની કિંમતના ડામર પ્લાન્ટના પ્લોટથી લઈને ચારકોપની શાળાની જમીન અને મુલુંડ જિમખાના સુધીના પ્રોજેક્ટ્સમાં મોટા પાયે ગેરરીતિ થઈ રહી હોવાનો આક્ષેપ નેતા કિશોરી પેડણેકર દ્વારા કરવામાં આવ્યો છે.

 

મૂળ વિગતો મુજબ, વરળીનો અંદાજે પાંચ હજાર કરોડ રૂપિયાની બજાર કિંમત ધરાવતો પ્લોટ માત્ર ૮૧૫ કરોડમાં ખાનગી વિકાસકર્તાને આપવાની તૈયારી છે, જ્યારે ચારકોપમાં ૨૬ કરોડની કિંમતની શાળાની જમીન માત્ર ચાર કરોડમાં ટ્રસ્ટને સોંપવાનો પ્રસ્તાવ મુકાયો છે.

 

આ ઉપરાંત આરે કોલોનીની હોસ્પિટલનો વહીવટ અને બાંદ્રાની ખુલ્લી જમીનો પીપીપી મોડેલ હેઠળ આપવાના નિર્ણયો સામે પણ સવાલો ઉઠાવવામાં આવ્યા છે કે આટલી કિંમતી જાહેર સંપત્તિઓ ઓછી કિંમતે આપવાથી પાલિકાને મોટું આર્થિક નુકસાન વેઠવું પડશે.

 

પાલિકાની જમીનો એ મુંબઈગરાઓની જાહેર સંપત્તિ હોવાનું જણાવીને વિપક્ષી નેતાઓએ આગામી સુધાર સમિતિની બેઠકમાં આ તમામ પ્રસ્તાવોનો સખત વિરોધ કરવાની જાહેરાત કરી છે.

 

જો સત્તાધારી મહાયુતિ ગઠબંધન બહુમતીના જોરે આ પ્રસ્તાવો મંજૂર કરશે તો જનહિતને ધ્યાનમાં રાખીને ઠાકરે જૂથ દ્વારા કોર્ટમાં જઈને કાયદાકીય લડત લડવાની ચીમકી પણ ઉચ્ચારવામાં આવી છે.

(7:49 PM IST)