ચેન્નાઈ, તા. 25: તમિલનાડુના રાજકારણમાં પોતાની ઐતિહાસિક જીતથી સત્તાના સિંહાસન પર બેઠેલા સુપરસ્ટાર અને વર્તમાન મુખ્યમંત્રી થલાપતિ વિજય ફરી એકવાર પોતાના અનોખા અંદાજને કારણે ચર્ચામાં આવ્યા છે. અભિનેતામાંથી રાજકારણી અને હવે મુખ્યમંત્રી બનેલા વિજય ગુરુવારે ચેન્નાઈના રસ્તાઓ પર સામાન્ય જનતાની જેમ સરકારી બસમાં મુસાફરી કરતા જોવા મળ્યા હતા. તેમનો આ અંદાજ જોઈને ત્યાં હાજર મુસાફરો આશ્ચર્યચકિત થઈ ગયા હતા અને તેમના વીડિયો સોશિયલ મીડિયા પર ધૂમ મચાવી રહ્યા છે.

સામાન્ય મુસાફરો વચ્ચે મુખ્યમંત્રી

તમિલનાડુ રાજ્ય પરિવહન નિગમ વતી આયોજિત એક કાર્યક્રમમાં મુખ્યમંત્રી થલાપતિ વિજયે જનતા માટે 300 નવી સીએનજી અને ડીઝલ બસોનું ઉદ્ઘાટન કર્યું હતું. ઉદ્ઘાટન બાદ તેઓ પોતે જ એક નવી બસમાં ચઢી ગયા હતા. કાળા ચશ્મા અને સફેદ શર્ટના ક્લાસિક ફિલ્મી લુકમાં સજ્જ મુખ્યમંત્રીએ બસ કંડક્ટર સાથે મુસાફરોની સગવડ અંગે વાતચીત કરી હતી અને બસોની નાની-મોટી તકનીકી વિગતો પણ સમજી હતી. તેમની બાજુમાં બેઠેલા મુસાફરો પોતાના લોકપ્રિય નેતાને આટલી નજીક જોઈને ઉત્સાહિત થઈ ગયા હતા.

મુખ્યમંત્રી તરીકે ઝડપી નિર્ણયો

4 મેના રોજ તમિલનાડુના દિગ્ગજ રાજકારણીઓને હરાવીને સત્તા પર આવેલા થલાપતિ વિજય ફિલ્મોની જેમ જ વાસ્તવિક જીવનમાં પણ એક્શન મોડમાં જોવા મળી રહ્યા છે. શપથ લીધા બાદ તરત જ તેમણે મહિલા સુરક્ષા અને ડ્રગ માફિયાઓ વિરુદ્ધ કડક કાયદાઓ પસાર કર્યા છે. વિરોધ પક્ષો ભલે તેમની પર સવાલો ઉઠાવતા હોય, પરંતુ વિજયે વિધાનસભાના પ્રથમ દિવસે જ રાષ્ટ્રગીત વગાડીને વિપક્ષી દળ ડીએમકે (DMK) ની રાજનીતિને જડબાતોડ જવાબ આપ્યો હતો.

રીલથી રિયલ લાઈફનો પડકારજનક પ્રવાસ

થલાપતિ વિજય માટે ફિલ્મી પડદા પરથી મુખ્યમંત્રીની ખુરશી સુધી પહોંચવું સરળ નહોતું. તેમની રાજકીય સફરની શરૂઆતમાં એક રોડ શો દરમિયાન થયેલી ભાગદોડમાં બે ડઝનથી વધુ લોકોના મોત થયા હતા, જેના કારણે તેમની કારકિર્દી પર સંકટના વાદળો ઘેરાયા હતા. પરંતુ હાર માન્યા વિના, તેમણે કોઈપણ પક્ષ સાથે જોડાણ કર્યા વિના એકલા હાથે ચૂંટણી લડી અને બહુમતી મેળવીને તમિલનાડુના ઈતિહાસમાં એક નવો અધ્યાય લખ્યો.

હાલમાં તમિલનાડુની જનતા પોતાના આ 'સુપરસ્ટાર સીએમ'ના નિર્ણયો અને તેમની જનતા સાથે ભળી જવાની શૈલીને ભારે આવકારી રહી છે.