નવી દિલ્હી :  ફ્રેન્ડશીપ ડે નિમિત્તે સોશિયલ મીડિયા પર શેર કરવામાં આવેલી એક પોસ્ટને લઈને ભારતીય રાજકારણમાં નવો વિવાદ છેડાઈ ગયો છે. લોકસભામાં વિરોધ પક્ષના નેતા રાહુલ ગાંધીએ ઇન્સ્ટાગ્રામ પર આજકાલના યુવાનો માં ભારે લોકપ્રિય એવો 'કોરિયન ફિંગર હાર્ટ' હાવભાવ બનાવતો પોતાનો એક ફોટો શેર કર્યો હતો. તેમણે કેપ્શનમાં મજાકિયા અંદાજમાં લખ્યું હતું કે તેઓ હજુ પણ એક વિદ્યાર્થી છે અને રોજ કંઈક નવું શીખે છે, તેમજ તેમને તાજેતરમાં જ ખબર પડી કે આ ઈશારાનો અર્થ 'હૃદય' થાય છે. તેમણે દેશવાસીઓને મિત્રતા દિવસની શુભકામનાઓ પાઠવી હતી.

જોકે, ભાજપના રાષ્ટ્રીય પ્રવક્તા શહેઝાદ પૂનાવાલાએ રાહુલ ગાંધીની આ પોસ્ટ પર વળતો આકરો પ્રહાર કરતો એક વિડીયો જારી કર્યો છે. પૂનાવાલાએ રાહુલ ગાંધીના આંગળીના ઈશારાની આકરી મજાક ઉડાવતા કહ્યું કે, "આને કોરિયન હાર્ટ સમજવાની ભૂલ ન કરો. આ રાહુલ ગાંધી માટે કોઈ નવો ઈશારો નથી પણ ખૂબ જૂનો ઈશારો છે." તેમણે કટાક્ષ કરતા દાવો કર્યો કે આ કોઈ પ્રેમાળ હૃદય દર્શાવતો ઈશારો નથી, પરંતુ દરરોજ ભ્રષ્ટાચાર, લાંચ અને કમિશનના નાણાં ગણવાનો સંકેત છે.

પૂનાવાલાએ ગાંધી પરિવાર અને કોંગ્રેસ શાસિત રાજ્યો પર પ્રહાર કરતા ઉમેર્યું કે ભ્રષ્ટાચારની ગણતરી કરવામાં આ નેતાઓને કોઈ તાલીમની જરૂર નથી, કારણ કે તેમણે તેમાં 'પીએચડી' કરેલી છે. તેમણે કર્ણાટક સરકારનું ઉદાહરણ આપીને કોંગ્રેસ પર ભ્રષ્ટાચારના ગંભીર આરોપો લગાવ્યા હતા. આ અગાઉ પણ સંસદ પરિસરમાં વિપક્ષી સાંસદો દ્વારા કરવામાં આવેલા પ્રદર્શનોને પૂનાવાલાએ શરમજનક ગણાવ્યા હતા. રાહુલ ગાંધીના એક નિર્દોષ ઈશારા પર ભાજપના આ રાજકીય હુમલાથી સોશિયલ મીડિયા પર પણ ભારે ચર્ચા જાગી છે.