નવી દિલ્હી, તા.૧૫: દેશભરમાં LPG ગેસ સિલિન્ડરની અછતને લઈને ચાલી રહેલી ચિંતાઓ વચ્ચે કેન્દ્ર સરકારે સામાન્ય જનતાને મોટી રાહત આપી છે. રસોડાના ઈંધણ પુરવઠાને 'ટોચની પ્રાથમિકતા' ગણાવીને સરકારે સ્પષ્ટ કર્યું છે કે ઘરેલુ ગ્રાહકોને ગેસની અછત નહીં પડવા દેવાય. સોશિયલ મીડિયા પર ફેલાતી અફવાઓને ફગાવતા પેટ્રોલિયમ મંત્રાલયે જણાવ્યું છે કે, હોર્મુઝ સ્ટ્રેટમાં સર્જાયેલા વૈશ્વિક સંકટ છતાં દેશમાં પુરવઠો પર્યાપ્ત છે અને ગભરાટમાં આવીને વધારાનું બુકિંગ (Panic Booking) ન કરવા અપીલ કરી છે.
સરકારે કાળાબજાર રોકવા માટે અત્યંત આધુનિક ડિલિવરી ઓથેન્ટિકેશન કોડ (DAC) સિસ્ટમ અમલમાં મૂકી છે. આ સિસ્ટમ દ્વારા હવે ૯૨ ટકા જેટલી ડિલિવરી સીધી સાચા ગ્રાહકો સુધી પહોંચી રહી છે. ડિજિટલ બુકિંગના માધ્યમથી હવે ગ્રાહકોએ એજન્સીઓના ધક્કા ખાવા પડશે નહીં, એપ કે વેબસાઈટ દ્વારા ઘરે બેઠા જ સિલિન્ડર મેળવી શકાશે.
 
નાના પરિવારો અને વિદ્યાર્થીઓ માટે વરદાન: ૫ કિલોના સિલિન્ડર
સરકારે ખાસ કરીને ભાડૂઆતો, વિદ્યાર્થીઓ અને પરપ્રાંતિય મજૂરો માટે ૫ કિલોના FTL સિલિન્ડરની સુવિધા વધારી દીધી છે.
•    વેચાણમાં ઉછાળો: ૨૩ માર્ચ ૨૦૨૬ થી અત્યાર સુધીમાં ૧૪ લાખથી વધુ નાના સિલિન્ડરનું વેચાણ થયું છે.
•    સરળતા: આ સિલિન્ડર માટે કાયમી સરનામાના પુરાવાની જરૂર પડતી નથી, જે ગરીબ અને મધ્યમ વર્ગ માટે મોટી રાહત સાબિત થઈ રહી છે.
 
કાળાબજારિયાઓ સામે કડક કાર્યવાહી
પુરવઠામાં અવરોધ ઉભો કરનારા અને સંગ્રહખોરી કરનારા તત્વો સામે સરકારે લાલ આંખ કરી છે.
•    દરોડા: દેશભરમાં પડેલા દરોડામાં અત્યાર સુધીમાં ૨૩૨ વિતરકોને દંડ ફટકારવામાં આવ્યો છે.
•    સસ્પેન્શન: ગેરરીતિ બદલ ૫૬ ગેસ એજન્સીઓના લાયસન્સ સસ્પેન્ડ કરી દેવામાં આવ્યા છે.
•    PNG કનેક્શન: LPG પરનું દબાણ ઘટાડવા સરકારે PNG (પાઇપ્ડ નેચરલ ગેસ) નેટવર્કને પણ તેજ ગતિએ વિસ્તાર્યું છે, જેમાં માર્ચ ૨૦૨૬ થી અત્યાર સુધીમાં ૪.૪૦ લાખ નવા જોડાણો અપાયા છે.
 
શું કહે છે સરકાર?
પેટ્રોલિયમ મંત્રાલયના જણાવ્યા અનુસાર, દેશમાં ક્યાંય પણ 'LPG ડ્રાયઆઉટ' એટલે કે પુરવઠો ઠપ્પ થયો હોવાની કોઈ સ્થિતિ નથી. કેટલીક જગ્યાએ ડિલિવરીમાં થોડો વિલંબ થઈ શકે છે, પરંતુ તે અછતને કારણે નહીં પણ કડક તપાસ પ્રક્રિયાને કારણે છે. ગ્રાહકોને વિનંતી કરવામાં આવી છે કે તેઓ જરૂરિયાત મુજબ જ બુકિંગ કરે અને ડિલિવરી સમયે OTP શેર કરવાનું ભૂલે નહીં, જેથી કોઈ પણ પ્રકારની છેતરપિંડીથી બચી શકાય. રસોડામાં ગેસનો અવિરત પ્રવાહ જળવાઈ રહેશે તેવી ખાતરી સરકારે આપી છે.