નવી દિલ્હી, તા.૧૦: બાંગ્લાદેશના રાજકારણમાંથી અત્યાર સુધીના સૌથી મોટા અને આખા એશિયાને હચમચાવી દે તેવા સનસનાટીભર્યા સમાચાર સામે આવ્યા છે. ભારતમાં આશ્રય લઈ રહેલા બાંગ્લાદેશના પૂર્વ વડાપ્રધાન શેખ હસીનાએ આખરે પોતાના વતન પરત ફરવાની સત્તાવાર તારીખ અને સમયરેખા જાહેર કરી દીધી છે. આંતરરાષ્ટ્રીય સમાચાર એજન્સી 'રોઇટર્સ' ને આપેલી એક કલાક લાંબી હૃદયદ્રાવક ટેલિફોનિક મુલાકાતમાં શેખ હસીનાએ જાહેરાત કરી છે કે, તેઓ આગામી ડિસેમ્બર ૨૦y૬ ની આસપાસ બાંગ્લાદેશ પરત ફરશે અને ત્યાંની કોર્ટ સમક્ષ આત્મસમર્પણ (Surrender) કરશે.
મોતનો ડર નથી, પોતાના દેશની માટીમાં દફન થવાની ઈચ્છા
બાંગ્લાદેશની સ્પેશિયલ ટ્રિબ્યુનલ કોર્ટે શેખ હસીનાની ગેરહાજરીમાં જ તેમને 'મૃત્યુદંડ' (ફાંસી) ની સજા સંભળાવી દીધી છે. પોતાના જીવ પર મંડરાઈ રહેલા આ ભયાનક જોખમ વિશે વાત કરતા શેખ હસીના અત્યંત ભાવુક થઈ ગયા હતા. તેમણે રડમસ અવાજે કહ્યું કે, "હું જેવી બાંગ્લાદેશની ધરતી પર પગ મૂકીશ, તેઓ કાં તો મારી ધરપકડ કરશે અથવા મને જાનથી મારી નાખશે. હું આ જોખમથી સારી રીતે વાકેફ છું. પરંતુ, અત્યારે મારા પક્ષના લાખો કાર્યકરો અને નેતાઓ પર ત્યાં અત્યાચાર થઈ રહ્યો છે. જો મને મોત આવવાનું જ હોય, તો હું ઈચ્છું છું કે તે મારી પોતાની માતૃભૂમિ પર આવે, જ્યાં મારા શહીદ પિતા અને માતાને દફનાવવામાં આવ્યા છે."
હિંસક બળવા બાદ ભારત આવ્યા હતા હસીના
ઉલ્લેખનીય છે કે, વર્ષ ૨૦૨૪ માં બાંગ્લાદેશમાં ફાટી નીકળેલા હિંસક વિદ્યાર્થી આંદોલન અને સત્તાપલટા બાદ શેખ હસીનાને પોતાનો જીવ બચાવવા માટે અચાનક ઢાકા છોડીને ભારતમાં શરણ લેવી પડી હતી. તેમના ગયા પછી બાંગ્લાદેશમાં તેમના પિતા અને દેશના સ્થાપક શેખ મુજીબુર રહેમાનના સ્મારકો અને મૂર્તિઓને નિર્દયતાથી તોડી પાડવામાં આવ્યા હતા, તેમજ તેમની પાર્ટી 'અવામી લીગ' પર સંપૂર્ણ પ્રતિબંધ લગાવી દેવાયો હતો. કોર્ટે વિદ્યાર્થીઓ પર થયેલી કથિત કડક કાર્યવાહીના દોષી માનીને હસીનાને ફાંસીની સજા ફટકારી છે, જોકે હસીનાએ આ તમામ આરોપોને પાયાવિહોણા ગણાવ્યા છે.
"મારી ભૂલોનો ન્યાય જનતા કરે, આ નકલી કોર્ટ નહીં"
જેલના સળીયાથી ડરવાનો સ્પષ્ટ ઇનકાર કરતા શેખ હસીનાએ વિપક્ષી સરકાર અને કોર્ટ પર આકરા પ્રહારો કર્યા હતા. તેમણે હિંમતભેર જણાવ્યું કે, "હું પહેલા પણ જેલમાં જઈ ચૂકી છું એટલે મને કોઈ ડર નથી. લાંબા સમય સુધી સત્તામાં રહેનારી કોઈ પણ સરકાર ભૂલોથી સંપૂર્ણ મુક્ત હોતી નથી. જો મારી સરકારે કોઈ ભૂલ કરી હોય, તો તેનો ફેંસલો કરવાનો અધિકાર માત્ર બાંગ્લાદેશની જનતાને છે, કોઈ કઠપૂતળી કોર્ટ કે વિપક્ષી નેતાઓને નહીં. લોકોને જ નક્કી કરવા દો કે મેં દેશ માટે સારું કામ કર્યું છે કે ખરાબ."
ડિસેમ્બરમાં શેખ હસીનાની બાંગ્લાદેશ વાપસીની આ જાહેરાતે ઢાકાના વર્તમાન શાસકોની ઊંઘ ઉડાવી દીધી છે અને આગામી દિવસોમાં બાંગ્લાદેશમાં ફરી એકવાર લોહિયાળ જંગ ખેલાય તેવી આશંકાઓ સેવવામાં આવી રહી છે.