મુંબઈ, તા.૨૨: માયાનગરી મુંબઈના પ્રખ્યાત જુહુ બીચ (Juhu Beach) પર દરરોજ હજારો પ્રવાસીઓ આવે છે, પરંતુ તેમની સાથે આવતી ગંદકી અને કચરો હંમેશાં ચિંતાનો વિષય બન્યા છે. તંત્રની લાખ કોશિશો છતાં કેટલાક લોકો સુધરવાનું નામ નથી લેતા. આવા જ બેજવાબદાર લોકોને પાઠ ભણાવવા માટે મુંબઈના એક કન્ટેન્ટ ક્રિએટરે એક અત્યંત અનોખો અને કટાક્ષથી ભરેલો રસ્તો અપનાવ્યો છે. ગંદકી કરનારાઓને જાહેરમાં શરમાવવા માટે તેણે મોક ચેક (નકલી ચેક) અને ટ્રોફી એનાયત કરવાનો એક ક્રેઝી પ્રયોગ કર્યો છે, જેનો વીડિયો હાલ ઇન્ટરનેટ પર જોરદાર વાયરલ થઈ રહ્યો છે.
‘તમે બહુ સુંદર કચરો ફેંક્યો, લો પકડો એવોર્ડ!’
સોશિયલ મીડિયા યુઝર ‘katariaaryann’ દ્વારા ઇન્સ્ટાગ્રામ પર શેર કરવામાં આવેલા આ વીડિયોમાં કન્ટેન્ટ ક્રિએટર અને તેના મિત્રોનું એક જૂથ હાથમાં મોટી નકલી ટ્રોફીઓ અને વિશાળ કદના મોક ચેક લઈને જુહુ બીચ પર ફરતું જોવા મળે છે. તેઓ બીચ પર નજર રાખે છે કે કોણ ગેરકાયદેસર રીતે કચરો ફેંકી રહ્યું છે. જેવી કોઈ વ્યક્તિ કચરો ફેંકે છે, આ આખું જૂથ તાળીઓ વગાડતું તેની પાસે પહોંચી જાય છે અને નાટક કરતાં કહે છે, "વાહ! તમે ખૂબ જ સુંદર રીતે કચરો ફેંક્યો છે, તેના બદલ તમને આ એવોર્ડ અને મોટો ચેક આપવામાં આવે છે." આ કટાક્ષભર્યા અંદાજથી કચરો ફેંકનાર વ્યક્તિ જાહેરમાં ક્ષોભજનક સ્થિતિમાં મુકાઈ જાય છે.
પુરાવા માંગ્યા તો ક્રિએટરે કેમેરો બતાવ્યો, ને પછી...
વીડિયોમાં જોવા મળે છે તેમ, આ જૂથ કુલ ત્રણ અલગ-અલગ લોકોનો સંપર્ક કરે છે. એક ઘટનામાં, જ્યારે એક વ્યક્તિને આ રીતે નકલી પુરસ્કાર આપવામાં આવ્યો, ત્યારે તે પહેલાં તો પોતાના બચાવમાં દલીલો કરવા લાગ્યો. તેણે જૂથને સામો સવાલ કર્યો કે, "તમારી પાસે શું પુરાવો છે કે મેં જ કચરો ફેંક્યો છે?" આ સાંભળીને યુવકોએ તરત જ સામે ઉભેલા પ્રોફેશનલ કેમેરામેન તરફ ઈશારો કર્યો. પોતાનું લાઈવ રેકોર્ડિંગ થઈ ગયું હોવાનું સમજાતાં જ તે વ્યક્તિનો ગર્વ ઓગળી ગયો અને તેણે તરત જ કેમેરા સામે કાન પકડીને માફી માંગી લીધી હતી.
અનોખો પ્રયોગ અને સોશિયલ મીડિયા પર વાહવાહ
વીડિયોના અંતમાં આ કન્ટેન્ટ ક્રિએટર ગ્રુપ પકડાયેલા લોકોને ખૂબ જ નમ્રતાપૂર્વક સમજાવતું જોવા મળે છે કે આપણો દેશ સુંદર છે અને જાહેર સ્થળોને સ્વચ્છ રાખવા એ આપણી જ જવાબદારી છે. આ પ્રવૃત્તિનો મુખ્ય હેતુ લોકોને સજા કરવાનો નહીં, પરંતુ તેમના પોતાના કૃત્યો માટે તેમને જવાબદાર બનાવવાનો અને ભવિષ્યમાં આવી ભૂલ ન દોહરાવવા માટે જાગૃત કરવાનો હતો.
નેટીઝન્સ આ અપરંપરાગત અને મજેદાર જાગૃતિ અભિયાનના ભારોભાર વખાણ કરી રહ્યા છે. લોકો કહી રહ્યા છે કે દંડ ભરવા કરતાં આ રીતે જાહેરમાં થતી ફજેતી લોકોને કચરો ફેંકતા રોકવામાં વધુ અસરકારક સાબિત થશે._