નવી દિલ્હી : સાઉદી અરેબિયાની રાજધાની રિયાધ સ્થિત કિંગ ખાલિદ આંતરરાષ્ટ્રીય વિમાનમથક પર થયેલા શ્રેણીબદ્ધ હુમલાઓ અંગે ભારતે રવિવારે અત્યંત સખત વલણ અપનાવતાં આ ભીષણ હુમલાઓની આકરા શબ્દોમાં નિંદા કરી છે.

વિદેશ મંત્રાલય દ્વારા બહાર પાડવામાં આવેલા એક સત્તાવાર નિવેદનમાં જણાવાયું છે કે ભારત છેલ્લા કેટલાક દિવસોમાં રિયાધ એરપોર્ટ પર થયેલા હુમલાઓની, ખાસ કરીને 10 ઓક્ટોબરના રોજ થયેલા કાયરતાપૂર્ણ હુમલાની સખત શબ્દોમાં નિંદા કરે છે. મંત્રાલયે આ ગોઝારી ઘટનામાં જીવ ગુમાવનારા 12 લોકોના પરિવારો પ્રત્યે ઊંડી સંવેદના વ્યક્ત કરી છે.

આ હુમલામાં 12 લોકોના મોત ઉપરાંત 300થી વધુ લોકો ઘાયલ થયા છે, જેને ભારતે સંપૂર્ણપણે અસ્વીકાર્ય ગણાવ્યું છે. વિદેશ મંત્રાલયે ભારપૂર્વક જણાવ્યું છે કે નિર્દોષ નાગરિકો અને નાગરિક વિમાનમથકો જેવા વ્યૂહાત્મક સ્થળોને લક્ષ્ય બનાવતી આવી હિંસક પ્રવૃત્તિઓ કોઈપણ સંજોગોમાં ચલાવી લેવાય નહીં.

ગત દિવસોમાં રિયાધ એરપોર્ટ પર થયેલા આ ભયાનક હુમલા બાદ વૈશ્વિક સ્તરે સુરક્ષા અને વિમાન વ્યવહાર પ્રભાવિત થયો છે, જેમાં એર ઇન્ડિયા અને એર ઇન્ડિયા એક્સપ્રેસ સહિતની ભારતીય એરલાઇન્સે પણ રિયાધ જતી ફ્લાઇટ્સ મુલતવી રાખી છે. બદલાતી આંતરરાષ્ટ્રીય સ્થિતિ વચ્ચે ભારત સરકાર સાઉદી અરેબિયામાં રહેતા ભારતીય નાગરિકોની સુરક્ષા માટે પરિસ્થિતિ પર સતત નજર રાખી રહી છે.