આગ્રા તા.૧૮: ઉત્તર પ્રદેશના આગ્રામાં વિશ્વપ્રસિદ્ધ તાજમહેલ નજીક તાજગંજ વિસ્‍તારમાં જલમા સંસ્‍થાન પાસે આવેલા તાજ રિસોર્ટને બોમ્‍બથી ઉડાવી દેવાની ધમકીભર્યો ઈમેઈલ મળતા જ સમગ્ર પંથકમાં સન્નાટો વ્‍યાપી ગયો હતો.

ઈમેઈલમાં દાવો કરવામાં આવ્‍યો હતો કે રિસોર્ટમાં બોમ્‍બ મૂકવામાં આવ્‍યો છે અને આવનારા ૮ દિવસમાં ગમે ત્‍યારે બ્‍લાસ્‍ટ થઈ શકે છે. રિસોર્ટના માલિક મહેશ કરદમે ઈમેઈલ મળતા જ વિલંબ કર્યા વગર સ્‍થાનિક પોલીસ અને સાઈબર સેલને આ અંગે જાણ કરી હતી. ઘટનાની ગંભીરતાને ધ્‍યાનમાં રાખીને ACP તાજ સુરક્ષા યતેન્‍દ્ર નાગરના નેતૃત્‍વમાં પોલીસ કાફલો અને બોમ્‍બ ડિસ્‍પોઝલ સ્‍ક્‍વોડની ટીમ તાત્‍કાલિક ઘટનાસ્‍થળે પહોંચી ગઈ હતી. સુરક્ષા જવાનોએ સમગ્ર રિસોર્ટ પરિસર અને આસપાસના વિસ્‍તારનો ખૂણેખૂણો તપાસ્‍યો હતો. લાંબા સમય સુધી ચાલેલી આ સઘન તપાસના અંતે કોઈ પણ શંકાસ્‍પદ વસ્‍તુ કે બોમ્‍બ મળી આવ્‍યો ન હતો, જેથી રિસોર્ટ સંચાલકો અને પોલીસે રાહતનો શ્વાસ લીધો હતો.

તપાસમાં કોઈ ભયજનક વસ્‍તુ ન મળી હોવા છતાં પોલીસે આ ધમકીને અત્‍યંત ગંભીરતાથી લીધી છે.

તાજ સુરક્ષાના ACP ના જણાવ્‍યા અનુસાર, ધમકીભર્યા ઈમેઈલ અને તેનાથી જોડાયેલા તમામ ડિજિટલ ડેટા સાઈબર સેલને સોંપવામાં આવ્‍યા છે. સાઈબર ટીમ હવે ઈમેઈલના IP એડ્રેસ અને સોર્સના આધારે તેને મોકલનાર અજ્ઞાત શખ્‍સ સુધી પહોંચવા માટે ટેકનિકલ તપાસ કરી રહી છે