નવી દિલ્હી : પાટનગર દિલ્હીના ચર્ચાસ્પદ જંતર-મંતર વિસ્તારમાં ગત ૧૩ ઓક્ટોબરના રોજ પરવાનગી વિના વિરોધ પ્રદર્શન કરવા અને રાષ્ટ્રધ્વજ ફરકાવવાના કેસમાં કોકરોચ જનતા પાર્ટી (સીજેપી) ના ત્રણ મુખ્ય નેતાઓ સૌરવ દાસ, આશુતોષ રંકા અને અજિંક્ય શિંદે ગુરુવારે દિલ્હી પોલીસ ક્રાઈમ બ્રાન્ચ સમક્ષ તપાસ અર્થે હાજર થયા હતા.

પોલીસ સુત્રોના જણાવ્યા અનુસાર, રાજૌરી ગાર્ડન સ્થિત ક્રાઈમ બ્રાન્ચની ઓફિસે સવારે ૧૧ વાગ્યાથી બપોરે ૩ વાગ્યા સુધી ચાલેલી આશરે ચાર કલાકની સઘન પૂછપરછ દરમિયાન ઇન્સ્પેક્ટર રેન્કના અધિકારીઓ દ્વારા નેતાઓને આશરે ૭૦ જેટલા પ્રશ્નો પૂછવામાં આવ્યા હતા, જેમાંથી કેટલાક પ્રશ્નોના જવાબો આપવાનું નેતાઓએ ટાળ્યું હતું.

આ સમગ્ર બનાવની વિગતો આપતા અધિકારીઓએ જણાવ્યું હતું કે ૧૩ ઓક્ટોબરના રોજ જંતર-મંતર સંકુલમાં વિરોધ પ્રદર્શનની પરવાનગી ન હોવા છતાં ખાનગી મિલકતમાં ગેરકાયદેસર રીતે પ્રવેશ કરવા અને લાદવામાં આવેલા પ્રતિબંધાત્મક આદેશોનું ભંગ કરવા બદલ અગાઉ કનોટ પ્લેસ અને પાર્લામેન્ટ સ્ટ્રીટ પોલીસ સ્ટેશનમાં બે અલગ-અલગ એફઆઈઆર નોંધવામાં આવી હતી.

પ્રારંભિક તબક્કે દાખલ કરાયેલી આ એફઆઈઆરને બાદમાં કેસની ગંભીરતા ધ્યાને લઈને વધુ તપાસ અર્થે ક્રાઈમ બ્રાન્ચને સોંપવામાં આવી હતી, જેના સંદર્ભમાં પૂર્વ સમન્સ પાઠવવામાં આવ્યા હોવા છતાં સમય માંગનાર આ નેતાઓ આખરે ગુરુવારે પોલીસ સમક્ષ આપેલા વચન મુજબ હાજર થયા હતા.

પૂછપરછ પૂર્ણ થયા બાદ ઓફિસની બહાર પત્રકારો સાથે વાતચીતમાં આશુતોષ રંકાએ સ્પષ્ટતા કરી હતી કે આ એક નિયમિત તપાસ પ્રક્રિયા હતી અને તેઓ તંત્રને પૂરો સહયોગ આપી રહ્યા છે, તેમજ દેશમાં ગમે ત્યાં ત્રિરંગો લહેરાવવો એ ગુનો ન ગણાવો જોઈએ તેવી રજૂઆત સાથે યોગ્ય તપાસની આશા વ્યક્ત કરી હતી.

હાલમાં આ કેસ સંબંધિત અન્ય પાસાઓની વધુ તપાસ ચાલુ છે, અને પૂછપરછ દરમિયાન પ્રાપ્ત થયેલી વિગતો તેમજ દસ્તાવેજી પુરાવાઓના આધારે આગામી દિવસોમાં ક્રાઈમ બ્રાન્ચ દ્વારા આગળની કાયદાકીય કાર્યવાહી હાથ ધરવામાં આવશે.