મુંબઈ, તા.29: મહારાષ્ટ્ર સરકારે ટેક્નોલોજી ક્ષેત્રે રાજ્યને અગ્રેસર રાખવા માટે પોતાની નવી 'આર્ટિફિશિયલ ઇન્ટેલિજન્સ (એઆઈ) નીતિ ૨૦૨૬' ના સુચારુ અમલીકરણ અને દેખરેખ માટે એક મહત્વપૂર્ણ નિર્ણય લેતા ત્રિસ્તરીય સમિતિઓની સત્તાવાર રચના કરી છે. સરકાર દ્વારા જારી કરવામાં આવેલા સરકારી ઠરાવ મુજબ, આ નીતિના પ્રભાવશાળી અમલ માટે ત્રણ અલગ-અલગ સ્તરે સમિતિઓની જવાબદારીઓ નક્કી કરવામાં આવી છે, જે રાજ્યમાં એઆઈ આધારિત પહેલોને વેગ આપશે.

પ્રાપ્ત વિગતો અનુસાર, આ વ્યવસ્થા અંતર્ગત મુખ્ય સચિવના નેતૃત્વ હેઠળ રાજ્ય સ્તરીય સંચાલન સમિતિની રચના કરવામાં આવી છે, જે સમગ્ર નીતિ માટે વ્યૂહાત્મક દિશાનિર્દેશો પૂરા પાડશે અને અમલીકરણની પ્રક્રિયા પર સીધી નજર રાખશે. આ સર્વોચ્ચ સમિતિમાં નાણાં, ઉદ્યોગ, આયોજન, ઉચ્ચ અને તકનીકી શિક્ષણ, મહેસૂલ, ઊર્જા તેમજ કૌશલ્ય અને રોજગાર વિભાગોના વરિષ્ઠ અધિકારીઓને સામેલ કરવામાં આવ્યા છે.

આ ઉપરાંત, ઇલેક્ટ્રોનિક્સ, માહિતી ટેકનોલોજી અને આર્ટિફિશિયલ ઇન્ટેલિજન્સ વિભાગના સચિવના વડપણ હેઠળ કારોબારી સમિતિ કાર્ય કરશે, જે વિવિધ પ્રોત્સાહનો અને સબસિડી માટેના પ્રસ્તાવોને મંજૂરી આપવાની સાથે જુદા-જુદા વિભાગોના એઆઈ પ્રોજેક્ટ્સ વચ્ચે સંકલન સાધવાનું કાર્ય કરશે. આ સમિતિ એઆઈ કંપનીઓ અને સંશોધન સંસ્થાઓ સાથે ભાગીદારીને સરળ બનાવશે અને દર ત્રણ મહિને પ્રગતિની સમીક્ષા કરશે.

આ ત્રિસ્તરીય માળખાના ત્રીજા તબક્કામાં એક ટેકનિકલ સમિતિની પણ રચના કરવામાં આવી છે, જે પ્રાપ્ત થયેલા પ્રસ્તાવોની તકનીકી અનુપાલન અને પાત્રતા માટે ઝીણવટભરી ચકાસણી કરશે. યોગ્ય માપદંડો ધરાવતા પ્રસ્તાવોની ભલામણ કારોબારી સમિતિને કરવા સાથે આ સમિતિ મંજૂર થયેલા પ્રોજેક્ટ્સની પ્રત્યક્ષ દેખરેખ રાખવાની જવાબદારી પણ નિભાવશે.

સરકાર દ્વારા આ નીતિના પારદર્શક અને સરળ અમલીકરણ માટે એક વિશેષ ઓનલાઇન પોર્ટલ પણ વિકસાવવામાં આવી રહ્યું છે, જેના માધ્યમથી સમગ્ર પ્રક્રિયાનું ડિજિટલ સંચાલન કરવામાં આવશે અને તમામ સમિતિઓ દર છ મહિને ઓછામાં ઓછી એક વાર બેઠક યોજીને આગળની રણનીતિ નક્કી કરશે.

અગાઉ ગત ૬ મેના રોજ જાહેર કરવામાં આવેલી આ એઆઈ નીતિનો મુખ્ય ઉદ્દેશ્ય રાજ્યના સરકારી વિભાગોમાં એઆઈ આધારિત સેવાઓને પ્રોત્સાહન આપવાનો અને યુવા ઉદ્યોગસાહસિકો તથા ટેકનોલોજી ક્ષેત્રને મજબૂત પાયો પૂરો પાડવાનો છે, જે રાજ્યના ભાવિ વિકાસમાં સીમાચિહ્નરૂપ સાબિત થશે.