જલગાંવ, તા.૦૮: સ્માર્ટફોન અને સોશિયલ મીડિયાના જમાનામાં સેલ્ફી લેવાનો ક્રેઝ વધુ એકવાર માસૂમ જિંદગીઓ માટે કાળ સાબિત થયો છે. મહારાષ્ટ્રના જલગાંવ જિલ્લાના અમલનેર તાલુકામાં ચોપડા રોડ પર એક અત્યંત હૃદયદ્રાવક ઘટના સામે આવી છે, જ્યાં પાણીથી ભરેલી ત્યજી દેવાયેલી ખાણ પાસે સેલ્ફી લેવાનો પ્રયાસ કરતી વખતે ત્રણ કિશોરોના ડૂબી જવાથી કરુણ મોત નીપજ્યા છે. મંગળવારે સાંજે બનેલી આ દુર્ઘટનાના પગલે સમગ્ર પંથકમાં ભારે અરેરાટી સાથે શોકનું મોજું ફરી વળ્યું છે. 
જલગાંવના પોલીસ અધિક્ષક (SP) શ્રીકાંત ધિવરે આ દુર્ઘટના અંગે વિગતો આપતા જણાવ્યું હતું કે, અમલનેર હાઇવે પર આવેલા પુલ નજીક એક પાણીથી ભરેલી ઊંડી ખાણ આવેલી છે. અહીં ૧૪, ૧૫ અને ૧૬ વર્ષની ઉંમરના ત્રણ છોકરાઓ ફરવા માટે આવ્યા હતા અને ખાણના કિનારે સેલ્ફી લઈ રહ્યા હતા. પ્રાથમિક તપાસ મુજબ, આ અકસ્માતના સ્થળે પાણી આશરે ૧૪ થી ૧૫ ફૂટ જેટલું ઊંડું હોવાનો અંદાજ છે, જેમાં લપસી પડવાના કારણે આ ત્રણેય કિશોરોએ પોતાના જીવ ગુમાવ્યા છે. 
અહેવાલો અનુસાર, આ કમનસીબ પીડિતોની ઓળખ માનવ રત્નાની, કાર્તિક ઉધવાણી અને દિનેશ પંજવાની તરીકે થઈ છે. આ ત્રણેય મિત્રો પાણીથી ભરેલી ખાણની મધ્યમાં આવેલા એક સાંકડા અને ઊંચા પ્લેટફોર્મ પર ઊભા રહીને અલગ-અલગ એંગલથી સેલ્ફી ખેંચી રહ્યા હતા. આ દરમિયાન અચાનક એક કિશોરનો પગ લપસ્યો અને તે ઊંડા પાણીમાં ખાબક્યો હતો. તેને ડૂબતો બચાવવા માટે બીજા મિત્રએ તેનો હાથ પકડ્યો અને ત્રીજો મિત્ર પણ મદદ માટે આગળ આવ્યો, પરંતુ પાણીના જોરદાર પ્રવાહ અને સાંકડી જગ્યાના કારણે ત્રણેય જણાએ પોતાનું સંતુલન ગુમાવી દીધું અને ખાણમાં પડી ગયા. કમનસીબી એ હતી કે આ ત્રણેય મિત્રોમાંથી કોઈને પણ તરતા આવડતું ન હોવાથી તેઓ ક્ષણભરમાં જ આંખ સામે ડૂબી ગયા. 
આ ભયાનક દ્રશ્ય નજીકથી પસાર થતા એક ઓટોરિક્ષા ચાલકે જોઈ લેતા તેણે તાત્કાલિક મદદ માટે બૂમો પાડી હતી અને અન્ય એક રાહદારીએ પોલીસને ઘટનાની જાણ કરી હતી. માહિતી મળતાની સાથે જ પોલીસ ઇન્સ્પેક્ટર દત્તાત્રય કરંડે, તહસીલદાર સીયુ પાટીલ અને સ્થાનિક તરવૈયાઓ ઘટનાસ્થળે દોડી ગયા હતા અને તાબડતોડ બચાવ કામગીરી શરૂ કરી હતી. ભારે જહેમત બાદ ત્રણેય કિશોરોને પાણીમાંથી બહાર કાઢી નજીકની હોસ્પિટલમાં લઈ જવાયા હતા, પરંતુ ત્યાં સુધીમાં ઘણું મોડું થઈ ચૂક્યું હતું અને ફરજ પરના તબીબોએ ત્રણેયને મૃત જાહેર કર્યા હતા. ગણતરીની મિનિટોની બેદરકારીએ ત્રણ હસતા-રમતા પરિવારોના ચિરાગ ઓલવી નાખ્યા છે.