કોલકાતા : પશ્ચિમ બંગાળ વિધાનસભા ચૂંટણીમાં ભારતીય જનતા પાર્ટીના શાનદાર વિજય અને સત્તામાં આગમન બાદ રાજ્યના રાજકીય સમીકરણોમાં મોટો ઉલટફેર જોવા મળી રહ્યો છે. તૃણમૂલ કોંગ્રેસ (TMC) ના આક્રમક પ્રવક્તા ગણાતા રિજુ દત્તાએ ભાજપના વરિષ્ઠ નેતા સુવેન્દુ અધિકારીની જાહેરમાં માફી માંગીને સૌને ચોંકાવી દીધા છે. અત્યાર સુધી ભાજપ પર પ્રહારો કરનારા દત્તાના સુર સત્તા બદલાતા જ નરમ પડી ગયા છે.
દબાણ હેઠળ કરી હતી ટીકાઓ
સોશિયલ મીડિયા પર વાયરલ થયેલા એક વીડિયો સંદેશમાં રિજુ દત્તાએ કબૂલાત કરી છે કે તેમણે સુવેન્દુ અધિકારી વિરુદ્ધ અગાઉ જે પણ વિવાદાસ્પદ ટિપ્પણીઓ કરી હતી, તે "બાહ્ય દબાણ" હેઠળ કરવામાં આવી હતી. તેમણે સીધો આરોપ લગાવ્યો કે તેમને અને તેમના પરિવારની સુરક્ષાને લઈને ડર હોવાથી તેમને પાર્ટી દ્વારા આવી નિવેદનબાજી કરવાની ફરજ પાડવામાં આવી હતી. હવે જ્યારે ચૂંટણી પૂર્ણ થઈ છે, ત્યારે તેઓ પોતાના શબ્દો બદલ ખેદ વ્યક્ત કરી રહ્યા છે.
ભાજપ કાર્યકરોએ બતાવ્યું સન્માન
પોતાના અનુભવ વિશે વાત કરતા રિજુ દત્તાએ જણાવ્યું કે, ચૂંટણી પરિણામો બાદ જ્યારે તેમનું વાહન એવા વિસ્તારમાંથી પસાર થઈ રહ્યું હતું જ્યાં ભાજપના સમર્થકો વિજયની ઉજવણી કરી રહ્યા હતા, ત્યારે કોઈએ તેમના પર હુમલો કરવાનો પ્રયાસ કર્યો નહોતો. ઉલટું, ભાજપના કાર્યકરોએ તેમને સુરક્ષિત રીતે પસાર થવા માટે રસ્તો કરી આપ્યો હતો. તેમણે વધુમાં ઉમેર્યું કે ભાજપના રાજ્ય અને રાષ્ટ્રીય સ્તરના નેતાઓએ તેમને ખાતરી આપી છે કે તેમને કે તેમના પરિવારને કોઈ નુકસાન પહોંચાડવામાં આવશે નહીં.
પોતાની જ પાર્ટી પર લગાવ્યા ગંભીર આક્ષેપો
એક તરફ ભાજપના વખાણ કરતા રિજુ દત્તાએ બીજી તરફ પોતાની જ પાર્ટી TMC પર નિશાન સાધ્યું છે. તેમણે દાવો કર્યો છે કે તેમને તૃણમૂલ કોંગ્રેસની અંદરથી જ ધમકીઓ મળી રહી છે. તેમણે સ્પષ્ટતા કરી કે તેઓ "માત્ર એક પ્રવક્તા છે, કોઈ મોટા નેતા નથી." આ ઘટનાક્રમ મનોજ તિવારી જેવા નેતાઓના પક્ષ છોડ્યા બાદ બન્યો છે, જે દર્શાવે છે કે મમતા બેનર્જીની છાવણીમાં અત્યારે બધું બરાબર ચાલી રહ્યું નથી. આ માફીના વીડિયોએ બંગાળના રાજકારણમાં નવી ચર્ચા છેડી દીધી છે.