ચેન્નાઈ, તા. ૨૧ : તમિલનાડુની રાજધાની ચેન્નાઈ અને આસપાસના વિસ્તારોમાં મંગળવારની રાતથી બુધવાર સવાર સુધી ભારે વરસાદ પડ્યો છે. વિવિધ વિસ્તારોમાં પાણી ભરાવાની સમસ્યા સર્જાઈ છે. બંગાળની ખાડીમાં સર્જાયેલા હળવા દબાણના વિસ્તારને કારણે ઉત્તરપૂર્વીય ચોમાસું સક્રિય બન્યું છે. હવામાન વિભાગે આગામી દિવસોમાં પણ વરસાદ ચાલુ રહેવાની શક્યતા વ્યક્ત કરી છે.

તમિલનાડુમાં ઉત્તરપૂર્વીય ચોમાસાની અસર હેઠળ ચેન્નાઈ અને આસપાસના જિલ્લાઓમાં ભારે વરસાદ પડતાં જનજીવનને અસર પહોંચી છે. મંગળવારની રાતથી શરૂ થયેલો વરસાદ બુધવાર વહેલી સવાર સુધી અનેક વિસ્તારોમાં ચાલુ રહ્યો હતો.

ચેન્નાઈના તાંબરમ, ક્રોમપેટ, ગિન્ડી, અન્ના સલાઈ, અડયાર, વેલાચેરી અને આસપાસના વિસ્તારોમાં ભારે વરસાદના અહેવાલ મળ્યા છે. કેટલાંક માર્ગો ઉપર પાણી ભરાતાં વાહનવ્યવહારને મુશ્કેલી પડી હતી. નીચાણવાળા વિસ્તારોમાં પાણી ભરાવાની સમસ્યા વધુ જોવા મળી હતી.

પ્રાપ્ત વિગતો મુજબ બંગાળની ખાડીમાં હળવા દબાણનો વિસ્તાર સર્જાયો છે. તેની અસરને કારણે ચેન્નાઈ ઉપરાંત તિરુવલ્લુર, કાંચીપુરમ, ચેંગલપટ્ટુ તથા ઉત્તર તમિલનાડુના અન્ય વિસ્તારોમાં વરસાદનું પ્રમાણ વધ્યું છે.

હવામાન વિભાગે તમિલનાડુ અને પુડુચેરીના વિવિધ વિસ્તારોમાં આગામી ૨૫ ઓક્ટોબર સુધી વરસાદની શક્યતા દર્શાવી છે. કેટલીક જગ્યાએ ગાજવીજ અને ભારે પવન સાથે વરસાદ પડી શકે છે.

મળતા અહેવાલો અનુસાર વરસાદના કારણે શહેરના કેટલાક માર્ગો પાણીમાં ગરકાવ થયા હતા. સવારે શાળાએ જતા વિદ્યાર્થીઓ, નોકરી માટે નીકળતા લોકો તથા વાહનચાલકોને મુશ્કેલીઓનો સામનો કરવો પડ્યો હતો.