દોહા: તા.૧૮: અખાતી દેશ (Gulf Country) કતારમાં રહીને નોકરી-ધંધો કરતા વિદેશી કામદારો માટે એક મોટા અને ચિંતાજનક સમાચાર આવ્યા છે. કતારના ગૃહ મંત્રાલય (MoI) દ્વારા રહેઠાણ અને વિઝા નિયમોને વધુ કડક બનાવવાની જાહેરાત કરવામાં આવી છે. નવા નિયમ અનુસાર, હવે જો કોઈ વિદેશી કામદારની રહેઠાણ પરમિટ (Residence Permit) ઔપચારિક રીતે રદ (Cancel) કરવામાં આવે, તો તેને દેશ છોડવા માટે મળતો ૩૦ દિવસનો ગ્રેસ પીરિયડ (સમયગાળો) ઘટાડીને અડધો એટલે કે માત્ર ૧૪ દિવસ (બે અઠવાડિયા) કરી દેવામાં આવ્યો છે. આ નિયમની સીધી અસર કતારમાં વસતા હજારો વિદેશીઓ અને ખાસ કરીને ભારતીય શ્રમિકો પર પડશે.

નિયમ ચૂક્યા તો ખિસ્સું ખાલી કરાવતો નાણાકીય દંડ

ગૃહ મંત્રાલયના એરપોર્ટ પાસપોર્ટ વિભાગના કેપ્ટન અલી અહેમદ અલી અલ કુવારીએ એક સત્તાવાર વેબિનાર દરમિયાન આ સુધારેલા નિયમનો ખુલાસો કર્યો હતો. તેમણે સ્પષ્ટ ચેતવણી આપી છે કે, જો કોઈ પણ ઇમિગ્રન્ટ રહેઠાણ પરમિટ રદ થયાના ૧૪ દિવસની અંદર કતાર નહીં છોડે અથવા નવી કાનૂની સ્પોન્સરશિપ વ્યવસ્થા સુરક્ષિત નહીં કરે, તો તેણે રોજનો QR10 (કતારી રિયાલ) દંડ ચૂકવવો પડશે. આ પગલાથી નોકરી બદલતા અથવા નોકરી ગુમાવીને વતન પરત ફરતા લોકો પર કાનૂની પ્રક્રિયા ઝડપથી પૂર્ણ કરવાનું ભારે દબાણ રહેશે.

સમાપ્તિ (Expiry) અને રદ (Cancellation) વચ્ચેનો તફાવત સમજી લો

ઇમિગ્રેશન નિષ્ણાતોના મતે, આ નવો કડક નિયમ માત્ર ‘રદ કરાયેલી’ પરમિટોને જ લાગુ પડે છે. જો કોઈ રહેવાસીની પરમિટ માત્ર સમાપ્ત (Expire) થઈ ગઈ હોય, તો તેને દંડ વિના નવીકરણ (Renew) કરવા માટે અગાઉની જેમ જ ૯૦ દિવસનો મોટો ગ્રેસ પીરિયડ મળતો રહેશે. પરંતુ, જો કંપની કે સ્પોન્સર દ્વારા પરમિટ સત્તાવાર રીતે રદ કરી દેવામાં આવે, તો માત્ર ૧૪ દિવસની અંદર જ દેશ છોડવો ફરજિયાત રહેશે.

મુલાકાતી વિઝા (Visit Visa) ધારકો માટે પણ મોટો ઝટકો

જો તમે કતારમાં વિઝિટ વિઝા પર ગયા હોવ, તો પાસપોર્ટમાં સ્ટેમ્પ સાથે લાગેલા સ્ટીકર પર દર્શાવેલ અંતિમ તારીખની ખાસ નોંધ રાખવી પડશે. કેપ્ટન અલ-કુવારીએ જણાવ્યું કે, "ઘણા લોકો દેશમાં રહેવાના દિવસોની ચોક્કસ સંખ્યા ધ્યાનમાં લેવામાં ભૂલ કરે છે. વિઝિટ વિઝાના ઓવરસ્ટે (નિયત સમય કરતાં વધુ રોકાણ) ના કિસ્સામાં સરકારે રોજનો QR200 (કતારી રિયાલ) નો ભારે દંડ નક્કી કર્યો છે."

નવજાત શિશુઓ માટે પણ મહત્વની યાદી

આ જ વેબિનાર દરમિયાન સત્તાવાળાઓએ એક બીજી મહત્વની બાબત પર પણ પ્રકાશ પાડ્યો હતો. કતારમાં રહેતા પ્રવાસીઓના ઘરે જો નવજાત બાળકનો જન્મ થાય, તો સંબંધિત દૂતાવાસના દસ્તાવેજો મળ્યા બાદ તુરંત જ પિતાની સ્પોન્સરશિપ હેઠળ બાળકની રહેઠાણ પરમિટ મેળવવી આવશ્યક છે. જો આ પરમિટ સમયસર લેવામાં નહીં આવે, તો તે બાળકને કતારમાં ફરીથી પ્રવેશવા દેવામાં આવશે નહીં.

કતારની અર્થવ્યવસ્થા મોટો ભાગે વિદેશી કામદારો પર નિર્ભર છે, તેથી ઇમિગ્રેશન સલાહકારો તમામ પ્રવાસીઓને પોતાની વિઝા સ્ટેટસની તારીખોનું નજીકથી નિરીક્ષણ કરવા અને મુસાફરીનું આયોજન અગાઉથી જ કરી લેવાની સલાહ આપી રહ્યા છે.