રાજકોટ: તા.૦૬ ભારતના અગ્રણી બ્રોકરેજ હાઉસ ઝેરોધા (Zerodha) એ બુધવારે મલ્ટી કોમોડિટી એક્સચેન્જ ઓફ ઇન્ડિયા (MCX) માં સર્જાયેલી ટેકનિકલ ખામી અંગે લાલબત્તી ધરી છે. આ ખામીને કારણે કોમોડિટી ટ્રેડિંગ કરતા હજારો ટ્રેડર્સના ઓર્ડર કાં તો રિજેક્ટ થઈ રહ્યા છે અથવા તો ઓર્ડરના સ્ટેટસ અપડેટ થવામાં ઘણો સમય લાગી રહ્યો છે. આ સમસ્યા માત્ર કોઈ એક પ્લેટફોર્મ પૂરતી મર્યાદિત નથી, પરંતુ એક્સચેન્જ લેવલ પર હોવાથી અનેક બ્રોકર્સને તેની અસર થઈ રહી છે.
ઝેરોધાએ ટ્વિટ કરીને ટ્રેડર્સને ચેતવ્યા
ઝેરોધાએ સોશિયલ મીડિયા પ્લેટફોર્મ X પર પોસ્ટ કરીને માહિતી આપી હતી કે, "એક્સચેન્જ (MCX) સ્તર પર ટેકનિકલ ખામી સર્જાઈ છે, જેના કારણે કેટલાક ઓર્ડર રિજેક્ટ થઈ શકે છે અથવા ઓર્ડર સ્ટેટસમાં વિલંબ થઈ શકે છે. જો તમે કોમોડિટીમાં ટ્રેડિંગ કરી રહ્યા હોવ, તો મહેરબાની કરીને સાવધાની રાખવી." કંપનીએ વધુમાં ઉમેર્યું હતું કે તેઓ આ બાબતે એક્સચેન્જ સાથે સતત સંપર્કમાં છે અને વહેલી તકે ઉકેલ લાવવા માટે પ્રયત્નો કરી રહ્યા છે.
રોકાણકારોમાં મુંઝવણની સ્થિતિ
બજારમાં જ્યારે સોદાઓની ગતિ તેજ હોય છે ત્યારે આવી ટેકનિકલ ખામી ટ્રેડર્સ માટે મોટું નુકસાન લાવી શકે છે. ખાસ કરીને ક્રૂડ ઓઈલ, સોનું અને ચાંદી જેવી કોમોડિટીમાં કામ કરતા લોકો માટે ઓર્ડર રિજેક્ટ થવો એ ચિંતાનો વિષય છે. જોકે, હજુ સુધી MCX દ્વારા આ ખામી પાછળનું ચોક્કસ કારણ કે તે ક્યારે સંપૂર્ણ રીતે ઠીક થશે તે અંગે કોઈ સત્તાવાર સ્પષ્ટતા કરવામાં આવી નથી.
સાવધાની એ જ સુરક્ષા
શેરબજારમાં આજે જોવા મળેલા તેજીના માહોલ વચ્ચે કોમોડિટી બજારમાં આ ગ્લીચ આવતા ટ્રેડર્સને નવા સોદા પાડતી વખતે સાવચેત રહેવા જણાવાયું છે. ટ્રેડર્સને સલાહ આપવામાં આવી છે કે તેઓ તેમના ઓર્ડર બુકની વારંવાર ચકાસણી કરે અને જો ઓર્ડર પેન્ડિંગ દેખાતો હોય તો સાવચેતીપૂર્વક આગળ વધે. એક્સચેન્જ દ્વારા સેવાઓ ક્યારે પૂર્વવત્ થાય છે તેના પર હવે સૌની નજર છે.