ગુવાહાટી : આસામના કામરૂપ (મેટ્રોપોલિટન) જિલ્લાના ગુવાહાટી નજીક આવેલા દિગારુ રેલ્વે સ્ટેશન પર બુધવારે (11 નવેમ્બર) સવારે એક મોટો રેલ અકસ્માત સર્જાયો હતો. કોલકાતા-સૈરાંગ એક્સપ્રેસના છ કોચ અચાનક પાટા પરથી નીચે ઉતરી જતા મુસાફરોમાં ભારે ફફડાટ ફેલાઈ ગયો હતો. જોકે, ઉત્તર પૂર્વ સીમા રેલ્વે (NFR) દ્વારા તાત્કાલિક રાહત અને બચાવ કામગીરી હાથ ધરવામાં આવી હતી અને કોઈ મોટી જાનહાનિ ટળી હતી. રેલવે તંત્ર દ્વારા તરત જ સક્રિય થઈને મુસાફરોને વૈકલ્પિક ટ્રેન દ્વારા તેમના સંબંધિત ગંતવ્ય સ્થાનો તરફ સુરક્ષિત રીતે રવાના કરવાની વ્યવસ્થા કરવામાં આવી હતી.
આ અકસ્માત બાદ રેલ્વે રિસ્ટોરેશન ક્રૂએ યુદ્ધના ધોરણે કામગીરી શરૂ કરી હતી અને આસામમાં અત્યાધુનિક હાઇડ્રોલિક રિ-રેલિંગ સાધનો (HRE) તૈનાત કરવામાં આવ્યા હતા. આ હાઇડ્રોલિક રિ-રેલિંગ સાધનો એ ઉચ્ચ-દબાણવાળા વિશિષ્ટ ઉપકરણોની એક સિસ્ટમ છે, જેનો મુખ્ય ઉપયોગ અકસ્માતગ્રસ્ત કે પાટા પરથી ઉતરેલા લોકોમોટિવ, કોચ અને વેગનને સલામત રીતે ફરીથી રેલ્વે પાટા પર ગોઠવવા માટે થાય છે. આ સાધનો અકસ્માત રાહત ટ્રેનો (ART) અને કટોકટી પુનઃપ્રાપ્તિ એકમોના અભિન્ન અને મહત્વપૂર્ણ ભાગ તરીકે કાર્ય કરે છે.
આ અદ્યાનત સાધનોની કામગીરીની પ્રક્રિયા ખૂબ જ વૈજ્ઞાનિક અને ચોક્કસ હોય છે, જેમાં મુખ્યત્વે બે ચરણોનો સમાવેશ થાય છે. પ્રથમ ચરણ 'લિફ્ટિંગ' છે, જેમાં પાટા પરથી ઉતરેલા વાહનની નીચે જેક ગોઠવવામાં આવે છે અને કંટ્રોલ ડેસ્ક દ્વારા પાવર પેક સાથે જોડીને વાહનને ઊભી દિશામાં ઉપર તરફ સચોટ રીતે ઉપાડવામાં આવે છે. બીજા ચરણમાં 'ટ્રાવર્સિંગ' પ્રક્રિયા હાથ ધરવામાં આવે છે, જેમાં રોલર કેરેજ અને લેટરલ ડિસ્પ્લેસમેન્ટ સિલિન્ડરોની મદદથી સસ્પેન્ડેડ વાહનને બાજુ તરફ ખસેડીને સીધા પાટાની બરાબર ઉપર ગોઠવવામાં આવે છે.
આ ઘટના બાદ રેલવે વિભાગ દ્વારા સમગ્ર મામલાની ઉચ્ચસ્તરીય તપાસના આદેશ આપવામાં આવ્યા છે, જેથી પાટા પરથી કોચ ઉતરવા પાછળના ચોક્કસ ટેકનિકલ કે અન્ય કારણો જાણી શકાય. હાલમાં રેલવે દ્વારા ટ્રેન વ્યવહારને પૂર્વવત કરવા માટે યુદ્ધના ધોરણે પટ્ટા સુધારણાની કામગીરી ચાલી રહી છે, અને ભવિષ્યમાં આવા અકસ્માતો રોકવા માટે સેફ્ટી ઓડિટ વધુ કડક બનાવવામાં આવશે તેમ સૂત્રો દ્વારા જણાવવામાં આવ્યું છે.