સુરતથી રેલવે મુસાફરો માટે એક મહત્વના સમાચાર સામે આવી રહ્યા છે. મુંબઈ અને તેની આસપાસના વિસ્તારોમાં થઈ રહેલા મુસળધાર વરસાદના કારણે ટ્રેન વ્યવહાર પર ખૂબ જ ગંભીર અસર પડી છે. ટ્રેક પર પાણી ભરાવાને કારણે પશ્ચિમ રેલવે વિભાગ દ્વારા મુસાફરોની સુરક્ષા કાજે અનેક ટ્રેનોના શિડ્યુઅલમાં મોટા ફેરફારો કરવામાં આવ્યા છે. આ અંગે પશ્ચિમ રેલવેના જનસંપર્ક અધિકારી (PRO) વિનીત અભિષેકે સત્તાવાર માહિતી આપી છે.

મુંબઈ અને તેની આસપાસના વિસ્તારોમાં પડી રહેલા મુસળધાર વરસાદના કારણે પશ્ચિમ રેલવેનો વાહનવ્યવહાર ભારે પ્રભાવિત થયો છે, જેને પગલે મુસાફરોની સુરક્ષા અર્થે રેલવે પ્રશાસન દ્વારા ટ્રેનોના સમયપત્રકમાં મોટા પાયે ફેરફારો કરવાની ફરજ પડી છે. ખરાબ હવામાનને કારણે રેલવે તંત્ર દ્વારા અત્યાર સુધીમાં 16 જેટલી ટ્રેનોને સંપૂર્ણપણે રદ કરવામાં આવી છે, જ્યારે અન્ય 15 ટ્રેનોને તેના નિર્ધારિત આખરી સ્ટેશન પહેલા જ એટલે કે શોર્ટ ટર્મિનેટ કરી દેવાનો નિર્ણય લેવાયો છે.

આ ઉપરાંત, સ્થિતિને નિયંત્રણમાં રાખવા માટે 26 ટ્રેનોના સમયમાં ફેરફાર કરીને તેને રિ-શિડ્યુઅલ કરવામાં આવી છે, જ્યારે 16 ટ્રેનોના પ્રારંભિક સમય અને રૂટને અધવચ્ચેથી જ ટૂંકાવી દેવાયા છે. રેલવે ટ્રેક પર પાણી ભરાવાની ગંભીર પરિસ્થિતિને જોતા વહીવટી તંત્રે અગમચેતીના ભાગરૂપે અત્યાર સુધીમાં 13 જેટલી ટ્રેનોના રૂટ પણ બદલી (Diverted) નાખ્યા છે, જેથી કોઈપણ પ્રકારનું જોખમ લીધા વિના મુસાફરોને સુરક્ષિત માર્ગે આગળ ધપાવી શકાય.

આ કટોકટીની સ્થિતિમાં પશ્ચિમ રેલવે વિભાગના તમામ ઉચ્ચ અધિકારીઓ સહિત સમગ્ર સ્ટાફ ખડેપગે પોતાની ફરજ પર હાજર છે. વરસાદથી પ્રભાવિત થયેલા તમામ વિસ્તારો અને રેલવે ટ્રેકનું સતત મોનિટરિંગ કરવામાં આવી રહ્યું છે. જનસંપર્ક અધિકારી વિનીત અભિષેકે જણાવ્યું હતું કે, હાલ ભારે વરસાદના કારણે મુશ્કેલ પરિસ્થિતિ ઉદભવી છે.

ટ્રેન વ્યવહારમાં થયેલા અચાનક બદલાવના પગલે મુસાફરોને હાલાકી ચોક્કસથી પડી રહી છે, પરંતુ રેલવે પ્રશાસન માટે મુસાફરોની સુરક્ષા સૌથી ઉપર છે. કોઈપણ પ્રકારનું મોટું જોખમ લેવા કરતાં અગવડતા વેઠી લેવી વધુ યોગ્ય છે. પરિસ્થિતિ સામાન્ય થતાં જ તમામ ટ્રેન વ્યવહાર ફરીથી રાબેતા મુજબ કરી દેવામાં આવશે. રેલવે તંત્રે મુસાફરો પાસેથી આ મુશ્કેલ સમયમાં સાથ-સહકારની આશા વ્યક્ત કરી છે.