બેંગલુરુ : રેલવે મુસાફરો માટે એક અત્યંત ઉત્સાહજનક સમાચાર સામે આવ્યા છે. દેશના આઈટી હબ ગણાતા બેંગલુરુ અને નાણાકીય પાટનગર મુંબઈ વચ્ચે મુસાફરી કરનારા લોકો માટે બહુપ્રતિક્ષિત 'બેંગલુરુ-મુંબઈ વંદે ભારત સ્લીપર ટ્રેન' આગામી ૧ નવેમ્બર, ૨૦૨૬ના રોજથી શરૂ થવાની પૂરી શક્યતા છે. ખાસ વાત એ છે કે આ દિવસે 'કર્ણાટક રાજ્યોત્સવ' પણ છે, જેથી આ સેવા શરૂ થવાથી રાજ્યના નાગરિકો માટે આ ડબલ ઉત્સવનો પ્રસંગ બની રહેશે. આ નવી સુવિધાથી બંને મહાનગરો વચ્ચેનો મુસાફરીનો સમય આશરે ૬ કલાક જેટલો ઘટી જશે.

હાલમાં દોડતી ઉદ્યાન એક્સપ્રેસ દ્વારા બેંગલુરુથી મુંબઈ પહોંચવામાં અંદાજે ૨૨ કલાક જેટલો સમય લાગે છે, જ્યારે નવી વંદે ભારત સ્લીપર ટ્રેન આ જ મુસાફરી માત્ર ૧૬ કલાકમાં પૂરી કરશે. પ્રસ્તાવિત સમયપત્રક મુજબ, આ ટ્રેન સર એમ. વિશ્વેશ્વરાય ટર્મિનલ (SMVT), બેંગલુરુથી સાંજે ૭:૫૦ વાગ્યે ઉપડશે અને બીજા દિવસે સવારે ૧૧:૫૫ વાગ્યે મુંબઈ CSMT પહોંચશે. તેવી જ રીતે મુંબઈથી રાત્રે ૮:૧૦ વાગ્યે ઉપડીને બીજા દિવસે સવારે ૧૧:૫૫ વાગ્યે બેંગલુરુ પહોંચશે. આ ટ્રેન અઠવાડિયામાં છ દિવસ દોડશે અને કલબુર્ગી રૂટ પરથી પસાર થશે, જ્યાં ઓછા વળાંક હોવાથી ટ્રેન હાઇ-સ્પીડમાં દોડી શકશે.

૧૬ કોચ ધરાવતી આ ટ્રેનમાં કુલ ૮૨૩ બર્થ ઉપલબ્ધ હશે, જેમાં એસી ૩-ટાયર, એસી ૨-ટાયર અને એસી ફર્સ્ટ ક્લાસ એમ ત્રણ શ્રેણીઓ રાખવામાં આવી છે. ટ્રેનમાં મુસાફરો માટે અનંતપુર, ગુંટકલ, રાયચુર, કલબુર્ગી, સોલાપુર, પુણે અને કલ્યાણ જેવા મહત્વના સ્ટેશનો પર સ્ટોપેજ આપવામાં આવ્યા છે. વિમાન પ્રવાસના વિકલ્પ તરીકે ટ્રેન પસંદ કરતા મુસાફરો અને કામકાજ અર્થે મુસાફરી કરતા વેપારીઓ માટે આ સેવા અત્યંત આશીર્વાદરૂપ સાબિત થશે.

આ નવીનતમ વંદે ભારત સ્લીપર ટ્રેનમાં મુસાફરોની સુરક્ષા અને સુવિધાનું ખાસ ધ્યાન રાખવામાં આવ્યું છે. ટ્રેનમાં ભારતીય રેલવેની આધુનિક સુરક્ષા પ્રણાલી 'કવચ', સીસીટીવી કેમેરા, અકસ્માત-રોધક કોચ ડિઝાઇન અને ઓટોમેટિક ફાઇઅર ડિટેક્શન સિસ્ટમ જેવી સુવિધાઓ ઉપલબ્ધ રહેશે. આ ઉપરાંત, મુસાફરો માટે યુએસબી ચાર્જિંગ પોઇન્ટ્સ, ઓટોમેટિક દરવાજા, વિશેષ દિવ્યાંગ-અનુકૂળ શૌચાલય અને ઇમરજન્સી ટોક-બેક યુનિટ જેવી અદ્યતન સુવિધાઓ પણ સામેલ કરવામાં આવી છે.