બેંગલુરુ: કર્ણાટક રાજ્યમાં દૂધના ભાવમાં પ્રતિ લિટર ૮ રૂપિયાનો વધારો કર્યા બાદ હવે રાજ્ય સરકાર દ્વારા સામાન્ય જનતાને વધુ એક મોટો આર્થિક ઝટકો આપવામાં આવ્યો છે. કર્ણાટક સરકારે રાજ્યની વિવિધ પરિવહનની બસોના ભાડામાં ૨૩% થી લઈને ૩૫% સુધીનો વધારો કર્યો છે. ટ્રાન્સપોર્ટ મંત્રી બૈરતી સુરેશ દ્વારા બુધવારે કરવામાં આવેલી જાહેરાત મુજબ, આ નવા અને વધેલા ભાડા આજ રાતથી જ સમગ્ર રાજ્યમાં અમલી બની જશે.

કઈ બસોના ભાડામાં કેટલો વધારો થયો?
સરકારના નવા નિર્ણય મુજબ બેંગલુરુ મેટ્રોપોલિટન ટ્રાન્સપોર્ટ કોર્પોરેશન (BMTC) ની બસો માટે ભાડામાં સરેરાશ ૩૩% થી ૩૫% નો વધારો ઝીંકવામાં આવ્યો છે, જ્યારે અન્ય રાજ્ય સંચાલિત પરિવહન નિગમો માટે આ વધારો ૨૩% રાખવામાં આવ્યો છે.

 * રૂટવાર ભાડામાં ફેરફાર: નેલમંગલાથી મેજેસ્ટીકનું ભાડું રૂ. ૩૫ થી વધીને રૂ. ૪૪, દોડબલ્લાપુરથી મેજેસ્ટીકનું ભાડું રૂ. ૩૮ થી વધીને રૂ. ૪૭ થયું છે.

 * એક્સપ્રેસ અને એરપોર્ટ સેવાઓ: KSRTC એક્સપ્રેસનું ભાડું રૂ. ૮૧ થી વધીને રૂ. ૧૦૦ અને હેબ્બાલથી એરપોર્ટનું ભાડું રૂ. ૧૭૫ થી વધીને રૂ. ૨૦૦ પહોંચી ગયું છે.

 * લાંબા અંતરની મુસાફરી: લાંબા અંતરની બસોનું ભાડું રૂ. ૭૫ થી વધીને રૂ. ૯૦ થયું છે, જ્યારે મહત્તમ ભાડું રૂ. ૪૦૫ થી વધીને રૂ. ૪૨૫ કરવામાં આવ્યું છે.

 * BMTC અને વજ્ર બસો: બીએમટીસીની સામાન્ય સેવાઓમાં ૨ કિમી સુધી રૂ. ૪ અને ૨ થી ૪ કિમી સુધી રૂ. ૬ નો વધારો થયો છે, જ્યારે વાતાનુકૂલિત 'વજ્ર' બસોમાં લાંબી મુસાફરી માટે મહત્તમ રૂ. ૧૫ સુધીનો વધારો કરાયો છે.

ભાડા વધારા પાછળના મુખ્ય કારણો:
મંત્રી બૈરતી સુરેશના જણાવ્યા અનુસાર, ચારેય પરિવહન નિગમો પર વધતા આર્થિક બોજને કારણે ભાડાનું પુનર્ગઠન કરવું અનિવાર્ય બન્યું હતું. નિગમોનો કુલ ખર્ચનો અંદાજે ૮૦ ટકા હિસ્સો માત્ર ડિઝલ અને સ્ટાફના પગાર પાછળ જ ખર્ચ થાય છે. ૨૦૨૬માં રચાયેલી પબ્લિક ટ્રાન્સપોર્ટ ફેયર રેગ્યુલેશન કમિટીએ ૬ ઓક્ટોબરે પોતાનો રિપોર્ટ સોંપ્યો હતો, જેમાં ખર્ચમાં ૪૫% (BMTC) અને ૨૮% (અન્ય નિગમો) નો વધારો સૂચવવામાં આવ્યો હતો. આ નિગમો પર આશરે રૂ. ૧૦,૨00 કરોડની સંચિત ખાધ અને રૂ. ૯,૯૧૨.૧૦ કરોડની બાકી દેવાદારી તથા લોન છે, જેમાં પીએફ (PF) ફંડ, રિટાયરમેન્ટ લાભો અને પગાર સંશોધનના કરોડો રૂપિયા ચૂકવવાના બાકી છે.

'શક્તિ યોજના' સાથે કોઈ સંબંધ નથી:
મંત્રીએ સ્પષ્ટતા કરી હતી કે આ ભાડા વધારાને મહિલાઓ માટેની મફત 'શક્તિ યોજના' સાથે કોઈ લેવાદેવા નથી. સરકાર શક્તિ યોજના અંતર્ગત ઇશ્યુ થતી દરેક ટિકિટની રકમ પરિવહન નિગમોને ચૂકવે છે. અત્યાર સુધી સરકારે આ યોજના હેઠળ રૂ. ૧૬,૫૮૯ કરોડ ચૂકવ્યા છે, જ્યારે નિગમોના કુલ રૂ. ૬,૩૬૨ કરોડ હજુ ચૂકવવાના બાકી છે. આ યોજના હેઠળ દરરોજ અંદાજે ૭૪.૪૦ લાખ મહિલાઓ મફત મુસાફરીનો લાભ લે છે. અગાઉ ૧ નવેમ્બરથી દૂધના ભાવમાં વધારો કરાયા બાદ હવે બસ ભાડા વધવાથી સામાન્ય નાગરિકોના ઘરેલુ બજેટ પર ભારે ભારણ વધી ગયું છે.