નવી દિલ્હી, : વિશ્વભરમાં સામાન્ય રીતે તબીબો અને વૈજ્ઞાનિકો દ્વારા કઝિન મેરેજ એટલે કે પિતરાઈ-માસીયાઈ ભાઈ-બહેનો (લોહીના સંબંધો) વચ્ચે લગ્ન કરવાને સ્વાસ્થ્ય અને વારસાગત રોગોની દ્રષ્ટિએ યોગ્ય માનવામાં આવતું નથી. પરંતુ, તાજેતરમાં જ સામે આવેલા એક ખૂબ જ મોટા અને આંતરરાષ્ટ્રીય સ્તરના જીનોમિક સ્ટડી (ડીએનએ સંશોધન) એ વૈજ્ઞાનિક જગતને આશ્ચર્યમાં મૂકી દીધું છે. આ નવા વૈજ્ઞાનિક અભ્યાસમાં દાવો કરવામાં આવ્યો છે કે પાકિસ્તાન સહિત દક્ષિણ એશિયામાં પ્રચલિત કઝિન મેરેજના કારણે માનવ શરીરમાં રહેલા અવનવા જીન્સ (Genes) નો અભ્યાસ કરવામાં અને જીવલેણ રોગો સામે લડવા માટે નવી આધુનિક દવાઓ બનાવવામાં વૈજ્ઞાનિકોને અણધારી મદદ મળી રહી છે.

પાકિસ્તાનમાં કઝિન મેરેજનો દર સૌથી વધુ

અમેરિકાની પ્રતિષ્ઠિત સંસ્થા 'વર્લ્ડ પોપ્યુલેશન રિવ્યુ' ના તાજેતરના આંકડા દર્શાવે છે કે દુનિયાભરમાં લોહીના સંબંધોમાં નિકાહ કરવાના મામલામાં પાકિસ્તાન વૈશ્વિક સ્તરે પ્રથમ ક્રમે આવે છે. પાકિસ્તાનમાં સગા ચચેરા, મમેરા, ફુફેરા કે મૌસેરા ભાઈ-બહેનો વચ્ચે લગ્ન કરવાનો દર આશરે ૬૧.૨ ટકા જેટલો ખૂબ જ ઊંચો છે. આટલી વિશાળ વસ્તી એક જ જીન પુલ (Gene Pool) માંથી આવતી હોવાથી વૈજ્ઞાનિકો માટે તે જીનેટિક મ્યુટેશન અને ડીએનએ સ્ટડી માટે એક મોટું કેન્દ્ર બની ગયું છે.

માનવ શરીરના છૂપા રહસ્યો અને ખામીઓ સામે આવી

દક્ષિણ એશિયાઈ વસ્તી પર કરવામાં આવેલા આ અત્યાર સુધીના સૌથી મોટા જીનોમિક રિસર્ચમાં જાણવા મળ્યું છે કે, પેઢીઓથી ચાલી આવતી કઝિન મેરેજની પ્રથાને કારણે લોકોના શરીરમાં અમુક ચોક્કસ પ્રકારના નબળા જીન્સ બહાર નીકળી ગયા છે અથવા ગાયબ થઈ ગયા છે. આ રિસર્ચથી એ સમજવામાં મદદ મળી છે કે જે લોકોના શરીરમાં અમુક ખાસ પ્રકારના પ્રગતિશીલ જીન્સ નથી હોતા, તેઓ ભવિષ્યમાં કેવા પ્રકારની શારીરિક સમસ્યાઓ, અસાધ્ય બીમારીઓ કે માનસિક વિકારોનો સામનો કરે છે.

નવી જીવનરક્ષક દવાઓ માટેનો માર્ગ મોકળો થયો

વૈજ્ઞાનિકોનું કહેવું છે કે આ પ્રથાને કારણે જે નકારાત્મક જનીની ફેરફારો સપાટી પર આવ્યા છે, તેનાથી ફાર્માસ્યુટિકલ કંપનીઓ અને સંશોધકોને માનવ શરીરની નબળાઈઓનું ચોક્કસ સરનામું મળી ગયું છે. કયા જીનની ગેરહાજરીથી કયો રોગ થાય છે તે સ્પષ્ટ થતાં, હવે ફાર્મા કંપનીઓ એ રોગોને જડમૂળથી નાબૂદ કરી શકે તેવી ટાર્ગેટેડ થેરાપી અને નવી જીવનરક્ષક દવાઓ (Life-saving Drugs) ખૂબ જ સચોટ રીતે અને ઝડપથી વિકસાવી શકશે. જે પ્રથા અત્યાર સુધી માત્ર મેડિકલ સાયન્સ માટે ચિંતાનો વિષય હતી, તેના ડેટા હવે મેડિકલ ઇતિહાસમાં નવી ક્રાંતિ લાવવા તરફ આગળ વધી રહ્યા છે.