ગાંધીધામ (કંડલા), તા.૧૫: અખાતી દેશોમાં ચાલી રહેલા ભારે રાજકીય તણાવ અને અસ્થિરતા વચ્ચે ભારત માટે એક ખૂબ જ રાહત અને ગર્વના સમાચાર સામે આવ્યા છે. વિશ્વના સૌથી સંવેદનશીલ ગણાતા સમુદ્રી માર્ગ 'હોર્મુઝની સામુદ્રધુની' માંથી પસાર થઈને ભારતનું વિશાળકાય જહાજ ‘જગ વિક્રમ’ આશરે ૨૦,૪૦૦ મેટ્રિક ટન લિક્વિફાઇડ પેટ્રોલિયમ ગેસ (LPG) નો જથ્થો લઈને મંગળવારે સફળતાપૂર્વક કંડલા બંદરે લાંગર્યું છે.
અમેરિકા અને ઈરાન વચ્ચેના તણાવપૂર્ણ માહોલમાં જ્યારે સમુદ્રી વેપાર પર જોખમના વાદળો મંડરાઈ રહ્યા હતા, ત્યારે ૧૧ એપ્રિલે આ જહાજે અત્યંત સાવચેતી સાથે હોર્મુઝની ખાડી પાર કરી હતી. આ સફળતા માત્ર ઉર્જા પુરવઠા પૂરતી મર્યાદિત નથી, પરંતુ પ્રતિકૂળ પરિસ્થિતિઓમાં પણ ભારતીય શિપિંગ ક્ષેત્રની મજબૂતી અને સુરક્ષા વ્યવસ્થાની પ્રતીતિ કરાવે છે.
 
પાઈપલાઈન દ્વારા ગેસ ખાલી કરવાની કામગીરી તેજ
કંડલા પોર્ટ પ્રશાસન દ્વારા પ્રાપ્ત માહિતી અનુસાર, મંગળવારની રાત્રે જ આ જહાજને જેટી નંબર ૧ પર લાંગરવાની પ્રક્રિયા પૂર્ણ કરવામાં આવી હતી. આજે, બુધવાર સવારથી અત્યાધુનિક પાઈપલાઈન નેટવર્ક દ્વારા આ જંગી ગેસના જથ્થાને અનલોડ કરવાનું શરૂ કરી દેવામાં આવ્યું છે. આ ગેસનો પુરવઠો દેશના વિવિધ ભાગોમાં રસોઈ ગેસની જરૂરિયાત પૂરી કરવામાં મહત્વની ભૂમિકા ભજવશે.
સમુદ્રી રસ્તાઓ પર ભારતનો દબદબો
નોંધનીય છે કે, છેલ્લા એક મહિનામાં ગુજરાતના બંદરોએ કપરી પરિસ્થિતિમાં પણ અનેક જહાજોનું સ્વાગત કર્યું છે:
•    MT જગ વસંત: ૪૭,૬૦૦ મેટ્રિક ટન LPG (૨૬ માર્ચ)
•    MT શિવાલિક: ૪૬,૦૦૦ મેટ્રિક ટન LPG (૧૬ માર્ચ - મુન્દ્રા)
•    MT જગ લાડકી: ૮૦,૦૦૦ મેટ્રિક ટન ક્રૂડ ઓઈલ (૧૭ માર્ચ - વાડીનાર)
"સરકારની પ્રાથમિકતા સુરક્ષા છે"
બંદરો અને શિપિંગ મંત્રાલયના અધિક સચિવ મુકેશ મંગલે ખાતરી આપી છે કે હોર્મુઝની ખાડીમાં હાજર અન્ય ૧૫ ભારતીય જહાજો અને તેમાં ફરજ બજાવતા ખલાસીઓની સુરક્ષા માટે વિદેશ મંત્રાલય સતત સંપર્કમાં છે. ભારત સરકાર દરેક જહાજને સુરક્ષિત માતૃભૂમિ પર પરત લાવવા માટે કટિબદ્ધ છે.