સિડની : ઓસ્ટ્રેલિયાના દરિયાકાંઠાના જાણીતા શહેર ગોલ્ડ કોસ્ટ પર આકાશને આંબતી 'ટ્રમ્પ ટાવર' બનાવવાની યોજના પર પાણી ફરી વળ્યું છે. જાહેરાત થયાના માત્ર ત્રણ મહિનાની અંદર જ આ હાઈ-પ્રોફાઈલ સોદો તૂટી જતાં રિયલ એસ્ટેટ માર્કેટમાં ખળભળાટ મચી ગયો છે. જે ઇમારત ઓસ્ટ્રેલિયાની સૌથી ઊંચી બિલ્ડિંગ બનવાની હતી, તે હવે માત્ર કાગળ પરની યોજના બનીને રહી ગઈ છે.

શું હતી યોજના?

અલ્ટ્સ પ્રોપર્ટી ગ્રુપના ચીફ એક્ઝિક્યુટિવ ડેવિડ યંગે ફેબ્રુઆરીમાં મોટી જાહેરાત કરી હતી કે તેઓ ટ્રમ્પ ઓર્ગેનાઈઝેશન સાથે મળીને ગોલ્ડ કોસ્ટના સર્ફર્સ પેરેડાઈઝમાં ૯૧ માળનું લક્ઝરી ટાવર બનાવશે. આશરે ૧.૫ બિલિયન ઓસ્ટ્રેલિયન ડોલરના આ પ્રોજેક્ટમાં લક્ઝરી હોટેલ, બીચ ક્લબ અને શાનદાર એપાર્ટમેન્ટ્સ બનવાના હતા. ટ્રમ્પ પરિવાર માટે ઓસ્ટ્રેલિયામાં આ તેમનો પ્રથમ બ્રાન્ડિંગ સોદો હતો, જેના માટે તેમને કરોડો ડોલરની ફી મળવાની હતી.

કેમ તૂટ્યો સોદો?

આ પ્રોજેક્ટના પતન માટે પ્રોપર્ટી ડેવલપર ડેવિડ યંગે વૈશ્વિક પરિસ્થિતિઓને જવાબદાર ગણાવી છે. તેમના મતે ઈરાન સાથેના તણાવ અને યુદ્ધની સ્થિતિ તેમજ ખુદ ડોનાલ્ડ ટ્રમ્પની વધતી જતી અલોકપ્રિયતાએ આ પ્રોજેક્ટને નુકસાન પહોંચાડ્યું છે. બીજી તરફ, ટ્રમ્પ ઓર્ગેનાઈઝેશને પલટવાર કરતા જણાવ્યું છે કે, લાઇસન્સિંગ ભાગીદાર (ડેવલપર) ચોક્કસ જવાબદારીઓ પૂરી કરવામાં નિષ્ફળ રહ્યા હોવાથી સોદો રદ કરવાની ફરજ પડી છે.

રાજકીય અને વ્યાપારિક અસરો

ડોનાલ્ડ ટ્રમ્પના પુત્રો એરિક અને ડોનાલ્ડ જુનિયર દ્વારા સંચાલિત ટ્રમ્પ ઓર્ગેનાઈઝેશન તાજેતરના વર્ષોમાં વૈશ્વિક સ્તરે બ્રાન્ડિંગ સોદાઓ પર ધ્યાન આપી રહ્યું છે. જોકે, ઓસ્ટ્રેલિયામાં કામ શરૂ થાય તે પહેલા જ પ્રોજેક્ટ બંધ થવો એ ટ્રમ્પ બ્રાન્ડ માટે એક મોટો આંચકો માનવામાં આવે છે. હાલમાં બંને પક્ષો એકબીજા પર દોષારોપણ કરી રહ્યા છે, પરંતુ ગોલ્ડ કોસ્ટના આસમાને જોવા મળનારું 'ટ્રમ્પ' નામ હવે ધૂંધળું થઈ ગયું છે.

આ સોદો તૂટવાની સાથે જ ઓસ્ટ્રેલિયાના રિયલ એસ્ટેટ ક્ષેત્રમાં રાજકીય નામો સાથે સંકળાયેલા જોખમો અંગે ફરી એકવાર ચર્ચા જાગી છે.