તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
ટ્રમ્પની આર્થિક નીતિઓને કારણે અમેરિકાની પ્રજાને $3૭૩Bનું નુક્સાન
ટેરિફથી લઈને ઈરાન વોર અને ટુરિઝમમાં થયેલા ઘટાડાને કારણે દરેક પરિવારને એવરેજ ડોલર ૨૮૦૦નું નુક્સાન ભોગવવું પડ્યું : અમેરિકામાં જોબ ગ્રોથ ખૂબ જ ધીમો પડી રહ્યો છે, લોકોની આવકમાં કોઈ ખાસ વધારો નથી તેમજ નાના બિઝનેસ ધરાવતા લોકો ટ્રમ્પની પોલિસીથી પરેશાન છે અને ઈકોનોમી ભારે અનિશ્ચિતતાના દોરમાંથી પસાર થઈ રહી છે
નવી દિલ્હી તા.૭: મેક અમેરિકા ગ્રેટ અગેઈનની વાતો કરીને સત્તા પર આવેલા ડોનલ્ડ ટ્રમ્પે દેશને ફાયદો કરાવવાને બદલે ડોલર ૩૭૩ બિલિયન ડોલરનું જંગી નુક્સાન કરાવ્યું હોવાનો દાવો CNNના એક રિપોર્ટમાં કરવામાં આવ્યો છે. ટ્રમ્પે એવા દાવા કર્યા હતા કે આકરા ટેરિફ, આક્રમક ઈમિગ્રેશન એન્ફોર્સમેન્ટ અને અમેરિકાની દુનિયામાં પ્રતિષ્ઠા વધે તેવી વિદેશનિતિથી દેશના લોકોને જબરજસ્ત ફાયદો થશે.
જોકે, આ તમામ દાવા વાતોના વડા સાબિત થયા હોય તેવું ટ્રમ્પના છેલ્લા દોઢ વર્ષના શાસનમાં લાગી રહ્યું છે. અમેરિકામાં જોબ ગ્રોથ ખૂબ જ ધીમો પડી રહ્યો છે, લોકોની આવકમાં કોઈ ખાસ વધારો નથી તેમજ નાના બિઝનેસ ધરાવતા લોકો ટ્રમ્પની પોલિસીથી પરેશાન છે અને ઈકોનોમી ભારે અનિﾍતિતાના દોરમાંથી પસાર થઈ રહી છે.
ટ્રમ્પે લાદેલા ટેરિફ, ઈરાન વોર અને તેમની ઈમિગ્રેશન પોલિસીને કારણે અમેરિકામાં ઈન્ટરનેશનલ ટુરિસ્ટ્સનું આવવાનું ઘટી જતાં અમેરિકાના લોકોને ૩૭૩ બિલિયન ડોલરનું નુક્સાન ભોગવવું પડ્યું છે, મતલબ કે છેલ્લા દોઢ વર્ષમાં દરેક અમેરિકન પરિવારે ૨૮૦૦ ડોલરનું નુક્સાન ભોગવ્યું છે. આ આંકડો અનેક ઈકોનોમિક સ્ટડીઝ અને અંદાજો પરથી કાઢવામાં આવ્યો છે, ટ્રમ્પનું અપ્રુવલ રેટિગ સતત ઘટી રહ્યું છે તેવામાં તેમની પોલિસીને કારણે અમેરિકન્સને ફાયદા કરતા નુક્સાન વધારે થયું કે કેમ તેવા સવાલો પણ ઉઠી રહ્યા છે.
૩૭૩ બિલિયન ડોલરનો જે આંકડો સામે આવ્યો છે તેમાં સૌથી મોટો ફાળો ટેરિફનો છે, ૨૦૨૫માં જ ટ્રમ્પે ઈન્ડિયા, ચાઈના અને બ્રાઝિલ સહિતના દુનિયાના મોટાભાગના દેશોમાંથી આવતા માલ-સામાન પર જંગી ટેરિફ નાખ્યો હતો. ટ્રમ્પે ત્યારે એવી દલીલો કરી હતી કે તેનાથી અમેરિકામાં પ્રોડક્શન વધશે અને ટેરિફની આવકથી સરકારની તિજોરી ભરાશે તેમજ દેવું જલ્દી ચૂકતે કરી શકાશે.
જોકે, ટેરિફનું પરિણામ એ આવ્યું હતું કે ૨૦૨૫માં અમેરિકાની જીડીપીમાં અંદાજિત ૧૮૦ બિલિયન ડોલરનો ઘટાડો થયો હતો, ટેરિફથી અમેરિકાની સરકારને જેટલી આવક થઈ તેમાં ૨૩૧ બિલિયન ડોલર તો પબ્લિકના ખિસ્સામાંથી જ આવ્યા હતા જેમાં દરેક પરિવારને એવરેજ ૨,૦૦૦ ડોલરનું નુક્સાન ભોગવવું પડ્યું.
ટેરિફથી અમેરિકામાં ઓટોમોબાઈલ, ઈલેક્ટ્રોનિક્સ, હોમ એપ્લાયન્સિસ, ક્લોધિગ અને કન્સ્ટ્રક્શન મટિરિયલ સહિતની વસ્તુઓ મોંઘી થઈ. તેની સાથે-સાથે જે બિઝનેસિસ વિદેશથી કાચો માલ મગાવતા હતા તેની પ્રોડક્શન કોસ્ટમાં પણ વધારો થયો જેને અલ્ટિમેટલી તો ગ્રાહકોના માથે જ નાખવામાં આવી. ૨૦૨૬માં જ સુપ્રીમ કોર્ટે ટેરિફને ગેરકાયદે ગણાવતા સરકારને બિલિયન્સ ઓફ ડોલર્સ રિફંડ કરવાની ફરજ પડી પરંતુ સામાન્ય પબ્લિકને તેનાથી કોઈ ફાયદો ના થયો.
૨૦૨૪માં ઈલેક્શન થયું ત્યારબાદ હાથ ધરવામાં આવેલા કેટલાક પોલ્સમાં એવું જાણવા મળ્યું હતું કે મેજોરિટી અમેરિકન્સ ટેરિફને સપોર્ટ કરે છે, કારણકે ટ્રમ્પે લોકો સામે સાચું ચિત્ર રજૂ નહોતું કર્યું. જોકે, ૨૦૨૬ સુધીમાં તો આખું પિક્ચર જ બદલાઈ ગયું હતું કારણકે ટેરિફનો બોજ સીધો પોતાના ખિસ્સા પર આવતા અમેરિકાની પ્રજાને ટ્રમ્પે હથેળીમાં ચાંદ બતાવ્યો હોવાનું ભાન થયું હતું. એક લેટેસ્ટ ડેટા અનુસાર હાલ ૬૩ ટકા અમેરિકન્સ નવા ટેરિફની વિરૂદ્ધમાં જ્યારે ૩૭ ટકા તેની તરફેણમાં છે.
ટ્રમ્પે શરૂ કરેલા ઈરાન વોરને કારણે પણ અમેરિકન્સને ખાસ્સું નુક્સાન વેઠવું પડ્યું છે. આ વોરમાં થયેલા ખર્ચા અને તેના કારણે ગેસ તેમજ ડીઝલની કિમતમાં વધારો થતાં લોકોને કેટલું આર્થિક નુક્સાન ભોગવવું પડ્યું તે અંગેના કેટલાક સરવે અનુસાર અમેરિકા ઈરાન સામેની લડાઈમાં ૭૨ બિલિયન ડોલરથી પણ વધુનો લશ્કરી ખર્ચ કરી ચૂક્યું છે જ્યારે તેને કારણે ફયુઅલની કિમત અને ટ્રાન્સપોર્ટેશન કોસ્ટ વધવાની સાથે અન્ય આર્થિક અંધાધૂંધીને કારણે લોકોને ૧૩૪ બિલિયન ડોલરનું નુક્સાન ભોગવવું પડ્યું.
આમ તો લશ્કરી ખર્ચાથી મિલિટરી ઈન્ડસ્ટ્રી સેક્ટરમાં જોબ્સ ઉભી થાય છે પરંતુ તેના કારણે જે બીજા આર્થિક નુક્સાન ઉઠાવવા પડે છે તે ખૂબ જ વધારે નુક્સાનકારક સાબિત થાય છે. આ વોર જેટલું લાંબુ ખેંચાતું ગયું તેમ-તેમ અમેરિકાની પ્રજામાં પણ તેની સામે રોષ વધી રહ્યો હતો, કારણકે લોકોના ખિસ્સા આ યુદ્ધને લીધે દિવસેને દિવસે હળવા થઈ રહ્યા હતા.
આ સિવાય ટુરિઝમમાં થયેલા ઘટાડાએ પણ અમેરિકાને બિલિયન્સ ઓફ ડોલર્સનું નુક્સાન કરાવ્યું છે. એક અંદાજ અનુસાર ૨૦૨૪માં ૭૨.૩ મિલિયન ઈન્ટરનેશનલ ટુરિસ્ટ્સ અમેરિકા આવ્યા હતા જ્યારે ૨૦૨૫માં આ આંકડો ઘટીને ૬૮.૩ મિલિયન નોંધાયો હતો. તેમાંય કેનેડિયન ટ્રાવેલર્સની સંખ્યા ૨૨ ટકા ઘટી હતી. ઓવરઓલ ટુરિસ્ટ્સની સંખ્યામાં ચાર મિલિયન જેટલો ઘટાડો થતાં ટુરિઝમ સાથે સંકળાયેલી ઈન્ડસ્ટ્રીને ૮.૪ બિલિયન ડોલરનું નુક્સાન ભોગવવું પડ્યું જેની સીધી અસર હોટેલ્સ, રેસ્ટોરાં, એરલાઈન્સ, રિટેલ સ્ટોર્સ, એન્ટરટેઈન્મેન્ટ વેન્યૂ અને હજારો બીજા નાના-મોટા બિઝનેસીસને થઈ. એક્સપર્ટ્સનું માનવું છે કે ટુરિસ્ટ્સની સંખ્યા ઘટતા ટુરિઝમ પર નિર્ભર કરતી હોય તેવી ઈન્ડસ્ટ્રીઝમાંથી ૧૪થી ૪૨ હજાર જેટલી જોબ્સ ઘટી શકે છે.
ટ્રમ્પની આર્થિક નિતિઓને કારણે ભલે અમેરિકન્સને આર્થિક નુક્સાન ભોગવવું પડી રહ્યું હોય પરંતુ સત્તા પર આવ્યા બાદ તેમની કમાણીમાં જંગી વધારો થયો છે. ૨૦૨૫માં તેમની ફેમિલીને ક્રિપ્ટો સહિતના બિઝનેસીસથી ૨ બિલિયન ડોલરની આવક થઈ હતી. મહત્વની વાત એ છે કે ૨૦૨૪માં ટ્રમ્પની આવક ૬૨૨ મિલિયન ડોલર હતી જે ૨૦૨૫માં વધીને ૨.૨ બિલિયન ડોલર પર પહોંચી ગઈ હતી. જોકે, બીજી તરફ ટ્રમ્પ ક્રિપ્ટો કોઈનમાં રોકાણ કરનારા લાખો ઈન્વેસ્ટર્સને ૩.૮ બિલિયન ડોલરનું જંગી નુક્સાન સહન કરવાનો વારો આવ્યો હતો. શું ટ્રમ્પને કારણે ખરેખર અમેરિકાની ઈકોનોમીને નુક્સાન થઈ રહ્યું છે ? આ અંગે આપના વિચારો કમેન્ટ બોક્સમાં ચોક્સસ જણાવજો.
(1:38 PM IST)
છેલ્લા 8 દિવસમાં સૌથી લોકપ્રિય 
