વોશિંગ્ટન:  મધ્યસત્ર ચૂંટણીઓના ગરમાવા વચ્ચે અમેરિકાના પૂર્વ પ્રમુખ ડોનાલ્ડ ટ્રમ્પના એક અત્યંત ચોંકાવનારા અને વિવાદસ્પદ નિવેદને દેશના રાજકારણમાં મોટો ધમાકો સર્જ્યો છે. નેબ્રાસ્કાના ગ્રાન્ડ આઇલેન્ડ ખાતે યોજાયેલી એક ચૂંટણી રેલીમાં ઈરાન કટોકટી અને બળતણના આસમાને પહોંચેલા ભાવો અંગે વાત કરતી વખતે ટ્રમ્પે વિવાદાસ્પદ દાવો કર્યો હતો. તેમણે જણાવ્યું હતું કે જો ઈરાન અમેરિકા સામે આક્રમક વલણ અપનાવે તો દેશ અને વિશ્વની વૈશ્વિક સુરક્ષા તેમજ આર્થિક હિતોની રક્ષા માટે લોસ એન્જલસ અને સાન ડિએગો જેવા અતિ મહત્વના શહેરોનો વિનાશ થવો એ "ચૂકવવા માટે અતિ નાની કિંમત" ગણાશે. ૧ કરોડથી વધુ નાગરિકો ધરાવતા પોતાના જ દેશના બે સમૃદ્ધ શહેરોને દુશ્મન દેશ માટે દાવ પર લગાવવાની આ વાતે સમગ્ર દેશભરમાં ભારે આક્રોશ જગાડ્યો છે.

ટ્રમ્પના આ નિવેદન સામે આવ્યા બાદ ડેમોક્રેટિક પાર્ટીના ગઢ ગણાતા કેલિફોર્નિયા રાજ્યના રાજકીય વર્તુળોમાં ભારે રોષ વ્યાપી ગયો છે. કેલિફોર્નિયાના ગવર્નર ગેવિન ન્યુસમે સોશિયલ મીડિયા પર ખુલ્લેઆમ વળતો પ્રહાર કરતાં ટ્રમ્પને "પાગલ, ખતરનાક અને અત્યંત બેજવાબદાર" નેતા ગણાવ્યા હતા. બીજી તરફ, સ્થાનિક મેયરો અને વિશ્લેષકોએ પણ આકરી ટીકા કરતા જણાવ્યું કે લોસ એન્જલસ પેસિફિક ક્ષેત્રનો વેપારી અને આર્થિક કરોડરજ્જુ છે, જ્યારે સાન ડિએગો યુએસ નેવીનું અતિ મહત્વનું વ્યૂહાત્મક થાણું છે. આવા આર્થિક અને લશ્કરી રીતે સક્ષમ શહેરોના વિનાશને સામાન્ય બાબત ગણાવવી એ રાષ્ટ્રીય સુરક્ષા સાથે રમત સમાન છે.

ચારેકોરથી ઘેરાયેલા રિપબ્લિકન પાર્ટીના સમર્થકો અને ટ્રમ્પ કેમ્પેઇન હવે આ નિવેદનનો બચાવ કરવા માટે મથામણ કરી રહ્યા છે. રિપબ્લિકન નેતાઓનો દાવો છે કે ટ્રમ્પના નિવેદનને ખોટી રીતે રજૂ કરવામાં આવી રહ્યું છે; તેઓ શહેરો પર મિસાઇલ હુમલાનો નહીં પરંતુ યુદ્ધ અને મોંઘવારીના કારણે આ બે મોટા શહેરોના અર્થતંત્ર અને નાગરિકો પર પડનારા નાણાકીય બોજનો ઉલ્લેખ કરી રહ્યા હતા. જોકે, ટ્રમ્પ દ્વારા વાપરવામાં આવેલા "તેમને નાશ કરવા દો" જેવા આકરા શબ્દોએ વિરોધીઓને મોટો રાજકીય મુદ્દો આપી દીધો છે અને આ મુદ્દો આગામી ચૂંટણીઓમાં ટ્રમ્પ માટે ભારે મુશ્કેલીઓ ઊભી કરી શકે છે.