વોશિંગ્ટન: પશ્ચિમ એશિયામાં ચાલી રહેલા તણાવ વચ્ચે અમેરિકી રાષ્ટ્રપતિ ડોનાલ્ડ ટ્રમ્પે ફરી એકવાર પોતાના આક્રમક નિવેદનથી વિશ્વભરમાં ખળભળાટ મચાવ્યો છે. ટ્રમ્પે સોશિયલ મીડિયા પ્લેટફોર્મ ‘ટ્રુથ સોશિયલ’ પર સ્પષ્ટ કર્યું છે કે અમેરિકા હવે ‘હોર્મુઝ સ્ટ્રેટ’ (Hormuz Strait) ને દરિયાઈ ખાણોથી મુક્ત કરવાની પ્રક્રિયા શરૂ કરી રહ્યું છે, જેથી વિશ્વના દેશોના તેલ જહાજો સુરક્ષિત રીતે પસાર થઈ શકે.
“ઈરાન મોટા પાયે હારી રહ્યું છે” - ટ્રમ્પ
ટ્રમ્પે મીડિયાના એ અહેવાલોને ફગાવી દીધા છે જેમાં ઈરાન જીતી રહ્યું હોવાનું કહેવામાં આવતું હતું. તેમણે આકરા શબ્દોમાં કહ્યું કે, "દરેક વ્યક્તિ જાણે છે કે ઈરાન મોટા પાયે હારી રહ્યું છે. તેમની નૌકાદળ, વાયુસેના અને રડાર સિસ્ટમ હવે અસ્તિત્વમાં નથી. તેમની મિસાઈલ અને ડ્રોન ફેક્ટરીઓ પણ નાશ પામી છે." ટ્રમ્પે વધુમાં ઉમેર્યું કે ઈરાનના નેતાઓ હવે આપણી વચ્ચે નથી અને તેમની પાસે હવે ધમકી આપવા જેવું કંઈ બચ્યું નથી.
વિશ્વના દેશો પર અમેરિકાનો ઉપકાર
ટ્રમ્પના જણાવ્યા અનુસાર, ચીન, જાપાન, દક્ષિણ કોરિયા, ફ્રાન્સ અને જર્મની જેવા દેશો પાસે આ જોખમી રસ્તો સાફ કરવાની હિંમત નથી, તેથી હવે અમેરિકા એક ‘ઉપકાર’ તરીકે આ કામ કરવા જઈ રહ્યું છે. તેમણે એક ખૂબ જ રસપ્રદ વાત નોંધી કે ઘણા દેશોના ખાલી તેલ ટેન્કરો હવે ઈરાનના બદલે યુનાઇટેડ સ્ટેટ્સ ઑફ અમેરિકા તરફ તેલ ભરવા માટે આવી રહ્યા છે.
ઈસ્લામાબાદમાં ચાલી રહ્યો છે હાઈ-વોલ્ટેજ ડ્રામા
એક તરફ ટ્રમ્પ આક્રમક નિવેદનો આપી રહ્યા છે, બીજી તરફ પાકિસ્તાનની રાજધાની ઈસ્લામાબાદમાં ૧૯૭૯ પછીની સૌથી ઉચ્ચ સ્તરીય ત્રિપક્ષીય વાટાઘાટો ચાલી રહી છે. અમેરિકાના ઉપરાષ્ટ્રપતિ જેડી વેન્સ અને ઈરાનના વિદેશ મંત્રી અબ્બાસ અરાઘચી પાકિસ્તાની વડાપ્રધાન શેહબાઝ શરીફ સાથે મુલાકાત કરી રહ્યા છે. સેરેના હોટેલમાં યોજાઈ રહેલી આ બેઠકનો મુખ્ય ઉદ્દેશ્ય ૮ એપ્રિલના રોજ જાહેર થયેલા નાજુક યુદ્ધવિરામને સ્થિર કરવાનો છે.
પરિણામ અમેરિકાના અભિગમ પર નિર્ભર
ઈરાનના વાઇસ પ્રેસિડેન્ટ મોહમ્મદ રેઝા આરેફે ચેતવણી આપી છે કે જો અમેરિકા ‘અમેરિકા ફર્સ્ટ’ ના અભિગમ સાથે વાત કરશે તો કરાર શક્ય છે, પરંતુ જો તેઓ ‘ઇઝરાયલ ફર્સ્ટ’ ના એજન્ડા સાથે આવશે તો કોઈ સોદો થશે નહીં અને વિશ્વને વધુ આર્થિક નુકસાન વેઠવું પડશે.
હોર્મુઝ સ્ટ્રેટ એ વિશ્વના તેલ વેપાર માટેની સૌથી મહત્વની નળી છે. ટ્રમ્પનું આ પગલું અને ઈસ્લામાબાદની વાટાઘાટો આગામી દિવસોમાં વિશ્વના રાજકારણ અને તેલના ભાવમાં કેવા ફેરફાર લાવશે તેના પર સૌની નજર છે.