કરાચી:  પાકિસ્તાનના ખૈબર પખ્તુનખ્વા પ્રાંતના દક્ષિણ વઝીરિસ્તાન સ્થિત માકિન વિસ્તારમાંથી એક કથિત વીડિયો સામે આવતા જનરલ અસીમ મુનીરની સેના અને સુરક્ષા વ્યવસ્થા પર ગંભીર સવાલો ઊભા થયા છે. વીડિયોમાં તહરીક-એ-તાલિબાન પાકિસ્તાન (TTP) સાથે જોડાયેલા સશસ્ત્ર આતંકવાદીઓ મુખ્ય બજારમાં ખુલ્લેઆમ ફરતા અને પોતાની હાજરીનો દાવો કરતા નજરે પડે છે.

વાયરલ વીડિયોમાં લડવૈયાઓ દાવો કરી રહ્યા છે કે આ વિસ્તારમાં તેમની સક્રિય હાજરી છે અને તેમને રોકનાર કોઈ નથી. આતંકીઓએ પાકિસ્તાની સેના સામેના પોતાના ઓપરેશનને "જેહાદ" ગણાવીને સશસ્ત્ર ગતિવિધિઓ ચાલુ રાખવાની ધમકી આપી છે. સાથે જ સુરક્ષા દળો પર શાંતિના નામે આતંકવાદ ફેલાવવાનો અને આદિવાસી લોકોને વિસ્થાપિત કરવાનો આરોપ લગાવ્યો છે. જોકે, આ વીડિયોની ચોક્કસ તારીખ અને સત્યતા અંગે સ્વતંત્ર પુષ્ટિ થઈ શકી નથી.

દક્ષિણ વઝીરિસ્તાનમાં TTP નો વધતો પ્રભાવ સામાન્ય નાગરિકોના રોજિંદા જીવન માટે જોખમ ઊભું કરી રહ્યો છે. આ સિવાય ચીન-પાકિસ્તાન આર્થિક કોરિડોર (CPEC) પ્રોજેક્ટમાં કાર્યરત વિદેશી કામદારોની સુરક્ષા અને બલુચિસ્તાનના અલગતાવાદી જૂથો સાથે TTPના સંભવિત તાલમેલને કારણે પાકિસ્તાની સુરક્ષા એજન્સીઓ માટે મોટી ચિંતા ઊભી થઈ છે.