અંકારા: સંરક્ષણ ક્ષેત્રે તુર્કીએ ફરી એકવાર પોતાની શક્તિનું પ્રદર્શન કરતા અત્યાધુનિક 'મિઝરાક' (MIZRAK) લોંગ-રેન્જ સ્ટ્રાઈક ડ્રોન લોન્ચ કર્યું છે. આ ડ્રોનની સૌથી મોટી ખાસિયત તેની 'GPS-Denied' ઓપરેશન મોડ ટેકનોલોજી છે, જેનો અર્થ છે કે તે કોઈપણ પ્રકારના સેટેલાઈટ સિગ્નલ કે જીપીએસ વગર પણ દુશ્મનના ઠેકાણાઓને શોધીને તેને નસ્તનાબૂદ કરી શકે છે. સામાન્ય રીતે યુદ્ધમાં શત્રુ દેશો સિગ્નલ જેમરનો ઉપયોગ કરીને ડ્રોનનું નેવિગેશન ઠપ કરી દેતા હોય છે, પરંતુ મિઝરાક સામે આવા કોઈપણ પેતરા કામ કરશે નહીં. 
AI અને વિઝુઅલ નેવિગેશનથી સજ્જ
બાયરકતાર (Bayraktar) કંપની દ્વારા નિર્મિત આ ડ્રોન આર્ટિફિશિયલ ઈન્ટેલિજન્સ (AI) અને વિઝુઅલ નેવિગેશન ટેકનોલોજીનો ઉપયોગ કરે છે. તે જમીનની બનાવટ જોઈને પોતાનો માર્ગ જાતે નક્કી કરવાની ક્ષમતા ધરાવે છે. મિઝરાક ડ્રોન ૧,૦૦૦ કિલોમીટર (૬૨૦ માઈલ) થી વધુ દૂર સુધી હુમલો કરી શકે છે અને સતત ૭ કલાક સુધી હવામાં રહી શકે છે. તેની પિન-પોઈન્ટ સટીકતા તેને ભવિષ્યના ઈલેક્ટ્રોનિક યુદ્ધમાં ગેમ-ચેન્જર બનાવે છે. 
બે ઘાતક મોડલ્સમાં ઉપલબ્ધ
સંરક્ષણ નિષ્ણાતોના જણાવ્યા મુજબ, મિઝરાક ડ્રોનના બે અલગ-અલગ વર્ઝન તૈયાર કરવામાં આવ્યા છે: 
•    હેવી સ્ટ્રાઈક મોડલ: આ મોડલમાં બે વોરહેડ્સ હોય છે, જે કુલ ૪૦ કિલોગ્રામ વિસ્ફોટક લઈ જઈ શકે છે, જે અઘરા લક્ષ્યોને મહત્તમ નુકસાન પહોંચાડવા માટે સક્ષમ છે. 
•    પ્રિસિઝન મોડલ: આ વર્ઝનમાં ૨૦ કિલોગ્રામનું એક વોરહેડ છે, જે રેડિયો-ફ્રિક્વન્સીનો ઉપયોગ કરીને હાઈ-વેલ્યૂ ટાર્ગેટ્સને ચોકસાઈપૂર્વક નિશાન બનાવે છે. 
વૈશ્વિક સંરક્ષણ વર્તુળોમાં ચિંતા
મિઝરાકની 'સાઈલેન્ટ કિલર' ઈમેજે વિશ્વભરના ડિફેન્સ એક્સપર્ટ્સમાં ચિંતા જગાવી છે, કારણ કે તે રડાર અને જેમરને છેતરીને વીઆઈપી લોકો કે હાઈપ્રોફાઈલ ઠેકાણાઓ પર કોઈને પણ જાણ થયા વગર હુમલો કરી શકે છે. તુર્કી હવે આ ડ્રોનનું મોટા પાયે ઉત્પાદન કરવાની તૈયારી કરી રહ્યું છે, જે ડ્રોન ટેકનોલોજીની નિકાસમાં તેને દુનિયાના ટોચના દેશોની હરોળમાં સૌથી આગળ લાવી દેશે.