નવી દિલ્હી, તા.29: ઉત્તર પ્રદેશમાં વારાણસી વિધાન પરિષદ (MLC) ની બંને બેઠકો પર ભાજપના પરાજય અને સમાજવાદી પાર્ટી (SP) ના કબજા બાદ રાજકીય ગરમાવો વધી ગયો છે. વડાપ્રધાન નરેન્દ્ર મોદીના સંસદીય મતવિસ્તાર અને પક્ષના મજબૂત ગઢ સમાન વારાણસીમાં મળેલી આ હાર બાદ શાસક પક્ષ માટે સ્થિતિ ગંભીર બનતાં કેન્દ્રીય ગૃહમંત્રી અમિતભાઈ શાહની અધ્યક્ષતામાં એક મહત્વપૂર્ણ સમીક્ષા બેઠક યોજવાનું નક્કી કરવામાં આવ્યું છે.

પ્રાપ્ત વિગતો અનુસાર, ગુરુવારે ઉત્તર પ્રદેશ ભાજપના અધ્યક્ષ પંકજ ચૌધરીએ રાજધાની ખાતે આ અંગે માહિતી આપતાં જણાવ્યું હતું કે કેન્દ્રીય ગૃહમંત્રી અમિતભાઈ શાહ શુક્રવારે નવી દિલ્હી ખાતે પહોંચશે અને પક્ષના વરિષ્ઠ નેતાઓ સાથે ચૂંટણી પરિણામો અંગે વિગતવાર સમીક્ષા હાથ ધરશે. પક્ષના પ્રદેશ અધ્યક્ષે સ્પષ્ટ કર્યું હતું કે એકંદર પરિણામો મુજબ ભાજપે સમગ્ર રાજ્યમાં છ બેઠકો જીતી છે અને તમામ મતવિસ્તારોમાં પક્ષનો વોટ શેર વધ્યો છે.

ઉત્તર પ્રદેશમાં યોજાયેલી વિધાન પરિષદની ચૂંટણીમાં સમાજવાદી પાર્ટીએ વારાણસી ક્ષેત્રની શિક્ષક અને સ્નાતક – એમ બંને બેઠકો સફળતાપૂર્વક જાળવી રાખી છે. આ ક્ષેત્રમાંથી સમાજવાદી પાર્ટીની આ સતત બીજી જીત હોવાથી શાસક પક્ષ માટે વારાણસી જેવા સંવેદનશીલ અને રાજકીય રીતે મહત્વપૂર્ણ ગઢમાં પરાજય થવો એ મોટા આંચકારૂપ માનવામાં આવી રહ્યો છે.

વારાણસીમાં થયેલા પરાજય સંદર્ભે સ્થાનિક સંગઠનાત્મક ખામીઓ કે અન્ય કોઈ આંતરિક પરિબળો જવાબદાર છે તે અંગે પ્રદેશ નેતૃત્વ દ્વારા તાત્કાલિક ધોરણે કોઈ ચોક્કસ ખુલાસો આપવામાં આવ્યો નથી. જોકે, ચૂંટણી પરિણામોના ઊંડાણપૂર્વકના પૃથ્થકરણ બાદ જવાબદારી નક્કી કરવા માટે કેન્દ્રીય નેતૃત્વ દ્વારા ચર્ચા કરવામાં આવશે.

વિશ્લેષકોના જણાવ્યા મુજબ, વારાણસીની બેઠકો પર મળેલી આ હાર પક્ષ માટે સંગઠનાત્મક સ્તરે મોટા ફેરફારો કરવાનો સંકેત આપે છે. વડાપ્રધાનના પોતાના ક્ષેત્રમાં વિપક્ષનો વિજય રાજકીય વર્તુળોમાં ચર્ચાનો મોટો વિષય બન્યો છે, જેના કારણે આગામી સમયમાં સ્થાનિક સ્તરે રણનીતિ બદલવાની જરૂરિયાત ઊભી થઈ છે.

અમિતભાઈ શાહની અધ્યક્ષતામાં યોજાનારી આ ઉચ્ચસ્તરીય બેઠક બાદ વારાણસી ક્ષેત્રની નબળાઈઓને દૂર કરવા અને સંગઠનને પુનઃ મજબૂત કરવા માટે કેન્દ્રીય નેતૃત્વ તરફથી ચોક્કસ દિશાનિર્દેશો જાહેર કરવામાં આવશે તેવી પૂરી સંભાવના સેવાઈ રહી છે.