ગ્વાલિયર, તા.20: મધ્યપ્રદેશના ગ્વાલિયરમાં શીતલા માતા મંદિર નજીક સર્જાયેલી એક અત્યંત હૃદયદ્રાવક અને કાળજું કંપાવનારી દુર્ઘટનામાં પરિવારે ૧૨ વર્ષની આકરી માનતાઓ અને પ્રાર્થનાઓ બાદ મેળવેલા બે સગા દીકરાઓને એક જ રાતમાં ગુમાવી દીધા છે. રવિવારે મોડી સાંજે એક બેકાબૂ ટ્રક મંદિર પાસે ઊભેલા શ્રદ્ધાળુઓની ભીડમાં ઘૂસી જતાં સર્જાયેલા આ ભીષણ અકસ્માતમાં ૧૫ જેટલા લોકોના કમકમાટીભર્યા મોત નીપજ્યા હતા, જેમાં આ શોકગ્રસ્ત પરિવારના બે માસૂમ બાળકો અને તેમના કાકા પણ ભોગ બન્યા હતા.

મૂળ મોરેનાના રહેવાસી અને ગ્વાલિયરના ગડાઈપુરા વિસ્તારમાં લાંબા સમયથી વસવાટ કરતા વિદ્યારામ ત્યાગીના પરિવાર માટે આ આઘાત અસહ્ય બની ગયો છે. લગ્ન બાદ પૂજા-પાઠ અને ભક્તિભાવ સાથે ૧૨ વર્ષ સુધી અવિરત મંદિરોની ખાક છાણ્યા બાદ તેમને સંતાન સુખ પ્રાપ્ત થયું હતું, જેમાં બે દીકરાઓ (અન અને લવ) તથા એક દીકરીનો જન્મ થયો હતો. જે બાળકો માટે આખું ઘર વર્ષોથી ઝૂરતું હતું અને જેમને ખુશીઓનું પ્રતીક માનવામાં આવતું હતું, તે જ બંને દીકરાઓ કાળનો કોળિયો બની ગયા.

ઘટનાની વિગતો અનુસાર, રવિવારે રાત્રે પરિવારના કાકા અશોક ત્યાગી સાથે બંને સગીર ભાઈઓ જીદ કરીને શીતલા માતાના મંદિરે દર્શન કરવા ગયા હતા. શરૂઆતમાં કાકાએ બાળકોને સાથે લઈ જવાની ના પાડી હતી, પરંતુ બાળકોના ભારે આગ્રહવશ તેઓ ત્રણેય મંદિર પહોંચ્યા હતા. તે જ સમયે પૂરપાટ ઝડપે આવી રહેલો એક અનિયંત્રિત ટ્રક શ્રદ્ધાળુઓને કચડતો આગળ વધ્યો, જેમાં અશોક ત્યાગી અને બંને ભત્રીજાઓ ઘટનાસ્થળે જ મૃત્યુ પામ્યા હતા.

આ અકસ્માતે માત્ર એક જ પરિવારના ત્રણ સભ્યોના પ્રાણ હણી લેતા સમગ્ર વિસ્તારમાં શોકનું મોજું ફરી વળ્યું છે. જ્યારે એક જ ઘરની ત્રણ અર્થીઓ એકસાથે ઉઠી ત્યારે ત્યાં ઉપસ્થિત સગા-સંબંધીઓ અને ગ્રામજનોના હૈયા ફાટી ગયા હતા અને સૌની આંખો ભીની થઈ ગઈ હતી. આ ભીષણ માર્ગ અકસ્માતે અનેક હસતા-રમતા પરિવારોને જિંદગીભરનો ક્યારેય ન ભરાય તેવો ઘા આપ્યો છે.

આ અણધારી આફત બાદ સ્થાનિક પ્રશાસન અને સરકાર દ્વારા ગંભીર નોંધ લેવામાં આવી છે. દુર્ઘટનાના વિરોધ અને સુરક્ષામાં બેદરકારી બદલ મુખ્ય પ્રધાને કડક પગલાં લેતા જવાબદાર અધિકારીઓ સામે સસ્પેન્શન અને બદલીના આદેશો જારી કર્યા છે, તથા મૃતકોના પરિવારજનોને યોગ્ય આર્થિક સહાય અને ઘાયલોની નિઃશુલ્ક સારવારની જાહેરાત કરવામાં આવી છે.