સિડની: બંગાળની ખાડીમાં મ્યાનમારના અત્યાચાર પીડિત રોહિંગ્યા લઘુમતી સમુદાયના સભ્યોને લઈ જતી બે બોટો ડૂબી ગઈ હોવાના અહેવાલો બાદ ૫૦૦ થી વધુ લોકોના મોત થયા હોવાની આશંકા સેવાઈ રહી છે. સંયુક્ત રાષ્ટ્ર (UN) ની એજન્સીઓએ ગુરૂવારે આ અંગે સત્તાવાર માહિતી આપતા જણાવ્યું હતું કે આ કમનસીબ ઘટના અંગે હાલમાં તપાસ ચલાવવામાં આવી રહી છે.

આંતરરાષ્ટ્રીય સ્થળાંતર સંગઠન (IOM) અને સંયુક્ત રાષ્ટ્ર શરણાર્થી ઉચ્ચાયુક્ત (UNHCR) દ્વારા જારી કરાયેલા એક સંયુક્ત નિવેદનમાં જણાવવામાં આવ્યું છે કે, પ્રાથમિક માહિતી અનુસાર આ બંને બોટો જૂન મહિનાના અંતમાં મ્યાનમારના પશ્ચિમી રાજ્ય રાખાઈનથી રવાના થઈ હતી. આ બોટોમાં સવાર મુસાફરોમાં મોટા ભાગના રોહિંગ્યા સમુદાયના લોકો હતા, જેમાંથી કેટલાકે સરહદ પાર બાંગ્લાદેશમાં આવેલા શરણાર્થી કેમ્પોમાંથી મુસાફરી શરૂ કરી હતી.

પ્રાપ્ત વિગતો અનુસાર, આશરે ૨૫૦ લોકોને લઈને નીકળેલી પ્રથમ બોટ પ્રસ્થાનના થોડા જ સમય બાદ ગુમ થઈ ગઈ હતી અને તેનો સંપર્ક તૂટી ગયો હતો. જ્યારે આશરે ૨૮૦ લોકોને લઈ જઈ રહેલી બીજી બોટ ગત ૮ જુલાઈના રોજ મ્યાનમારના અય્યરવાડી તટ નજીક સમુદ્રમાં ડૂબી ગઈ હોવાનું મનાય રહ્યું છે.

યુએનની એજન્સીઓએ આ દુર્ઘટના અંગે ઘેરી ચિંતા વ્યક્ત કરતાં જણાવ્યું છે કે, જોકે આ ઘટનાઓ અને તેમાં ભોગ બનેલા લોકોના ચોક્કસ આંકડાઓની હજુ સુધી સત્તાવાર પુષ્ટિ થવાની બાકી છે, પરંતુ આ અકસ્માતમાં સંભવિત રીતે મોટા પાયે થયેલી જાનહાનિથી UNHCR અને IOM અત્યંત ચિંતિત છે. રોહિંગ્યા શરણાર્થીઓના દરિયાઈ મુસાફરી દરમિયાન થતા મોતના કિસ્સાઓ વારંવાર સામે આવતા આ વૈશ્વિક કરુણાંતિકા ફરી એકવાર ચર્ચાના કેન્દ્રમાં આવી છે.