​બંગલુરુ: કર્ણાટકની રાજધાની બેંગલુરુમાંથી એક અત્યંત ચોંકાવનારી અને દુઃખદ ઘટના સામે આવી છે. અહીંની એક પ્રખ્યાત ફાઇવ-સ્ટાર હોટેલ 'કોનરાડ બેંગલુરુ' (Conrad Bengaluru) ના સ્વિમિંગ પૂલમાં અચાનક વીજ પ્રવાહ (Electric Current) ફેલાઈ જવાને કારણે બે વિદેશી નાગરિકોના કરંટ લાગવાથી કરુણ મોત નીપજ્યા છે. આ ભયાનક અકસ્માતમાં અન્ય બે વ્યક્તિઓ ગંભીર રીતે ઇજાગ્રસ્ત થયા છે, જેમાં એક અમેરિકન પ્રવાસી અને એક પૂલ અટેન્ડન્ટનો સમાવેશ થાય છે.

​પ્રાપ્ત માહિતી અનુસાર, આ દુર્ઘટના હોટેલના સ્વિમિંગ પૂલ વિસ્તારમાં બની હતી. પૂલમાં અચાનક વીજ કરંટ વહેવા લાગતા ત્યાં હાજર વિદેશી નાગરિકો તેની ઝપેટમાં આવી ગયા હતા. આ ગંભીર સ્થિતિ જોઈને તેમને બચાવવા માટે આગળ આવેલા અન્ય એક અમેરિકન પ્રવાસી અને હોટેલના એક પૂલ અટેન્ડન્ટે પણ હિંમત દાખવી હતી, પરંતુ કરંટની તીવ્રતા એટલી વધારે હતી કે તેઓ પણ ગંભીર રીતે ઘાયલ થઈ ગયા હતા.

​ઘટનાની જાણ થતા જ હોટેલ સ્ટાફ અને સ્થાનિક પ્રશાસનમાં દોડધામ મચી ગઈ હતી. તુરંત જ તમામ પીડિતોને હોસ્પિટલ ખસેડવામાં આવ્યા હતા, જ્યાં ડૉક્ટરોએ બંને વિદેશી નાગરિકોને મૃત જાહેર કર્યા હતા. જ્યારે ઈજાગ્રસ્ત થયેલા બંને વ્યક્તિઓની હાલત પર નજર રાખવામાં આવી રહી છે અને તેમની સારવાર ચાલી રહી છે.

​આ ઘટના બાદ ફાઇવ-સ્ટાર હોટેલોમાં ગ્રાહકોની સુરક્ષા અને મેન્ટેનન્સને લઈને મોટા સવાલો ઊભા થયા છે. સ્થાનિક પોલીસે આ માەલે ગુનો નોંધીને ઝીણવટભરી તપાસ શરૂ કરી દીધી છે કે આટલી મોટી હોટેલના સ્વિમિંગ પૂલમાં વીજળી લીકેજ થવા પાછળ કોની બેદરકારી જવાબદાર છે. મૃતકોની ઓળખ અને તેમની વિગતો મેળવવાની સાથે પોલીસ હોટેલના મેનેજમેન્ટ સામે કાયદેસરની કાર્યવાહી કરવાની તજવીજ હાથ ધરી રહી છે.