મુંબઈ : શનિવારની સાંજે મુંબઈના ગોરેગામ સ્થિત આરે વિસ્તારમાં આવેલા મરોલ ચેકનાકાના લેઉઆ પાટીદાર સમાજ રામ મંદિરમાં અમિત પાઠક નામના શખ્સ અને તેના સાથીઓ દ્વારા સોશિયલ મીડિયા પર અપીલ કરીને ૩૦ થી ૪૦ લોકોનું ટોળું એકત્ર કરવામાં આવ્યું હતું, જેણે મંદિરમાં બળજબરીથી પ્રવેશીને ભારે હંગામો મચાવ્યો હતો અને સિક્યોરિટી ગાર્ડને ગંભીર પરિણામો ભોગવવાની ધમકી આપી હતી.

ઘટનાની વિગતવાર માહિતી અનુસાર, અમિત પાઠકે ‘હિન્દુ રક્ષક સેના’ અને ‘સકળ હિન્દુ સમાજ’ના નામે સોશિયલ મીડિયા પર વાયરલ કરેલી પોસ્ટના આધારે એકઠું થયેલું આ ટોળું મંદિરમાં ઘૂસી ગયું હતું. ટ્રસ્ટી જયેશ પટેલ દ્વારા નોંધાવવામાં આવેલી પોલીસ ફરિયાદ મુજબ, આરોપીઓએ મંદિરના સિક્યોરિટી ગાર્ડ નંદલાલ કેવટ સાથે અદભ્ર ભાષાનો પ્રયોગ કરી તેનો કૉલર પકડીને ખેંચ્યો હતો અને બળજબરીથી લાઈટ્સ ચાલુ કરાવીને મહાઆરતી યોજી હતી.

આ વિવાદાસ્પદ પ્રવૃત્તિ દરમિયાન મુખ્ય આરોપી પાઠકે મંદિરની દીવાલ પર લાગેલા બોર્ડ પર કાળો રંગ છાંટ્યો હતો અને ત્યારબાદ લોખંડની સીડી પર ચઢીને ભગવાન હનુમાનની તસવીરવાળું ‘શ્રી લેઉઆ પાટીદાર બજરંગ સત્સંગ મંડળ’નું ફ્લેક્સ બેનર પણ ફાડી નાખ્યું હતું. આ સમગ્ર ઘટના મંદિરમાં લાગેલા સીસીટીવી કેમેરામાં સ્પષ્ટપણે કેદ થઈ ગઈ હતી, જેના આધારે આરે પોલીસ સ્ટેશન દ્વારા ૧૫ જણા વિરુદ્ધ ભડકામણી કરવાના પ્રયાસ સહિતની વિવિધ ગંભીર કલમો હેઠળ એફઆઈઆર નોંધવામાં આવ્યો છે.

આ પ્રકરણે પોલીસે સક્રિયતા દાખવીને તાત્કાલિક કાર્યવાહી કરતા મુખ્ય આરોપી અમિત પાઠક સહિત બે શખ્સોની ધરપકડ કરી લીધી છે. પોલીસ તપાસમાં એ પણ સામે આવ્યું છે કે મુખ્ય આરોપીએ અગાઉ પણ ફેસબુક પર આ ટ્રસ્ટના સભ્યોને નિશાન બનાવીને બદનક્ષીભર્યા લખાણો પોસ્ટ કર્યા હતા, જેના કારણે સ્થાનિક સ્તરે અશાંતિ ફેલાવવાનો પ્રયાસ કરવામાં આવી રહ્યો હતો.

આ બનાવને પગલે સ્થાનિક રહીશો અને ટ્રસ્ટના સભ્યોમાં ભારે રોષ જોવા મળી રહ્યો છે, અને ધાર્મિક સ્થળોની પવિત્રતા જાળવી રાખવા તથા કાયદો અને વ્યવસ્થા ભંગ કરનાર બાકીના આરોપીઓ સામે પણ વહેલી તકે કાયદેસરની સખત કાર્યવાહી કરવામાં આવે તેવી માંગ ઉઠી રહી છે.

પોલીસ દ્વારા આ મામલે વધુ તપાસ હાથ ધરવામાં આવી છે અને સીસીટીવી ફૂટેજના આધારે બાકીના ફરાર આરોપીઓની ઓળખ કરીને તેમની ધરપકડ કરવાના ચક્રો ગતિમાન કરવામાં આવ્યા છે, જેથી ભવિષ્યમાં આ પ્રકારની ઘટનાઓનું પુનરાવર્તન ન થાય.