નવી દિલ્હી :  બિહાર, મધ્યપ્રદેશ અને ગુજરાતની ત્રણ વિધાનસભા બેઠકો પર યોજાયેલી પેટાચૂંટણીના પરિણામોએ શાસક ભારતીય જનતા પાર્ટીને મોટો આંચકો આપ્યો છે. સામાન્ય રીતે સત્તાધારી પક્ષો પેટાચૂંટણીમાં વિજય મેળવતા હોય છે, પરંતુ આ વખતે ભાજપ પોતાના બે અતિ મજબૂત ગઢ બચાવવામાં નિષ્ફળ રહ્યો છે. ૩૦ વર્ષથી ભાજપનો અભેદ્ય કિલ્લો ગણાતી બિહારની બાંકીપુર બેઠક પર જનસુરાજ પાર્ટીના પ્રશાંત કિશોર સામે ભાજપના ઉમેદવાર નીરજ કુમાર ૧૯,૩૨૪ મતોથી હારી ગયા છે. જ્યારે મધ્યપ્રદેશની દતિયા બેઠક પર કોંગ્રેસના ઘનશ્યામ સિંહે ભાજપના આશુતોષ તિવારીને હરાવીને કબ્જો જમાવ્યો છે. ભાજપને માત્ર ગુજરાતની માંજલપુર બેઠક પર જ જીત નસીબ થઈ છે.

બાંકીપુરમાં ભાજપના પરાજય પાછળ અતિ-આત્મવિશ્વાસ, છેલ્લી ઘડીએ ઉમેદવાર બદલવાનો નિર્ણય અને સ્થાનિક મુદ્દાઓ મુખ્ય કારણ બનીને ઉભર્યા છે. માત્ર નવ મહિના પહેલા આ જ બેઠક ભાજપે ૫૦,૦૦૦ થી વધુ મતોના માર્જિનથી જીતી હતી. રાષ્ટ્રીય અધ્યક્ષ નીતિન નવીનની આ પરંપરાગત બેઠક હોવા છતાં, NEET પેપર લીક વિરોધ અને ભરત તિવારી એન્કાઉન્ટર જેવા મુદ્દાઓએ મતદારોમાં ભારે અસંતોષ ઊભો કર્યો હતો. આ ઉપરાંત, આરજેડીના પરંપરાગત મતો પણ પ્રશાંત કિશોર તરફ શિફ્ટ થતાં ભાજપનો મુખ્ય વોટબેંકનો પાયો હચમચી ગયો હતો.

બીજી તરફ, મધ્યપ્રદેશની દતિયા બેઠક પર વરિષ્ઠ નેતા નરોત્તમ મિશ્રાની નારાજગી ભાજપને મોંઘી પડી છે. ટિકિટ ન મળતાં તેમના સમર્થકોમાં ભારોભાર રોષ હતો, જેનું પરિણામ એ આવ્યું કે નરોત્તમ મિશ્રાના પોતાના સ્થાનિક પોલિંગ બૂથ પર પણ ભાજપ હારી ગયું. આ પરાજય બાદ ભાજપના આંતરિક વર્તુળોમાં ભારે આત્મમંથન શરૂ થયું છે. પક્ષના નેતાઓએ સ્વીકાર્યું છે કે ઉમેદવારની પસંદગીમાં થયેલી ભૂલો અને મૂળભૂત મુદ્દાઓની ઉપેક્ષાને કારણે આ પરિણામો આવ્યા છે, જે આગામી દિવસોમાં સંગઠન અને સરકારમાં મોટા ફેરફારોના સંકેત આપે છે.