શ્રીનગરઃ ઉત્તર કાશ્મીરના બારામુલ્લા જિલ્લામાં સુરક્ષા દળોએ બે શંકાસ્પદ આતંકી સહયોગીઓને ઝડપી શસ્ત્રો અને વિસ્ફોટકો કબજે કર્યાં છે. ૨૨ ઓક્ટોબરે જાહેર કરાયેલી માહિતી મુજબ સેનાની બાવનમી રાષ્ટ્રીય રાઇફલ્સ અને બારામુલ્લા પોલીસે ગુપ્તચર બાતમીના આધારે સંયુક્ત કાર્યવાહી હાથ ધરી હતી.

દેલીના ઘાટ નજીક દરપુરા નર્સરી વિસ્તારમાંથી ઝડપાયેલા બંને પાસેથી તુર્કીનિર્મિત પિસ્તોલ, દસ કારતૂસ અને બે વિસ્ફોટક ઉપકરણો મળ્યાં હોવાનું અધિકારીઓએ જણાવ્યું હતું. વધુ વિગતોમાં આરોપીઓની ઓળખ વસીમ અહેમદ બેગ અને તાહિર અહેમદ મલિક તરીકે જાહેર થઈ છે. તેમની પાસેથી રૂ.૬,૫૦૦ રોકડા મળ્યાની પણ માહિતી આપવામાં આવી છે.

બંને સોપોરના ચિંકીપુરા વિસ્તારના હોવાનું જણાવાયું છે. પ્રાથમિક તપાસમાં તેઓ આતંકવાદીઓને મદદરૂપ થતી શસ્ત્રો અને વિસ્ફોટકોની હેરફેર સાથે સંકળાયેલા હોવાની શંકા વ્યક્ત કરાઈ છે. પોલીસે સંબંધિત કાયદાકીય જોગવાઈઓ હેઠળ ગુનો નોંધી તપાસ શરૂ કરી છે. અધિકારીઓએ આતંકીઓને શસ્ત્રો અને વિસ્ફોટકો પહોંચાડવામાં બંનેની સંભવિત ભૂમિકા અંગે વધુ તપાસ ચાલુ હોવાનું જણાવ્યું છે.