દુબઈ: મધ્ય પૂર્વમાં લાંબા સમયથી ચાલી રહેલા તણાવ વચ્ચે આંતરરાષ્ટ્રીય સ્તરે એક અત્યંત રાહતના સમાચાર સામે આવ્યા છે. સંયુક્ત આરબ અમીરાત (UAE) એ તેના એરસ્પેસ (હવાઈ ક્ષેત્ર) પર લાદવામાં આવેલા તમામ પ્રતિબંધો સત્તાવાર રીતે હટાવી લીધા છે. ફેબ્રુઆરીના અંતમાં અમેરિકા, ઈરાન અને ઈઝરાયેલ વચ્ચે વધતા સંઘર્ષને ધ્યાનમાં રાખીને સુરક્ષાના કારણોસર આ પાબંદીઓ લગાવવામાં આવી હતી, જેના કારણે વૈશ્વિક વિમાન સેવાઓને માઠી અસર પહોંચી હતી. હવે સ્થિતિમાં સુધારો થતા UAE ના આ નિર્ણયથી લાખો મુસાફરો અને એરલાઇન્સ કંપનીઓમાં ખુશીની લહેર જોવા મળી રહી છે.
સુરક્ષા સમીક્ષા બાદ લેવાયો નિર્ણય
UAE ની જનરલ સિવિલ એવિએશન ઓથોરિટી (GCAA) એ સ્પષ્ટતા કરી છે કે એરસ્પેસ ફરીથી ખોલવાનો નિર્ણય વ્યાપક સુરક્ષા અને ઓપરેશનલ સમીક્ષા બાદ લેવામાં આવ્યો છે. સંબંધિત એજન્સીઓ સાથે પરામર્શ કરીને ખાતરી કરવામાં આવી છે કે હવે આકાશ માર્ગે મુસાફરી કરવી સંપૂર્ણપણે સલામત છે. ઉલ્લેખનીય છે કે ૨૮ ફેબ્રુઆરીથી એરસ્પેસ આંશિક રીતે બંધ થવાને કારણે અસંખ્ય ફ્લાઈટ્સ રદ કરવી પડી હતી અથવા તો તેમના રૂટ ડાયવર્ટ કરવામાં આવ્યા હતા, જેનાથી પ્રવાસીઓને ભારે હાલાકી ભોગવવી પડી હતી.
મુસાફરીનો સમય ઘટશે અને ટિકિટના ભાવમાં પડી શકે છે ફરક
છેલ્લા કેટલાક મહિનાઓથી એરસ્પેસ પર પ્રતિબંધ હોવાથી એરલાઇન્સને લાંબા અને વાંકાચૂકા રસ્તાઓનો આશરો લેવો પડતો હતો. આના કારણે માત્ર ઈંધણનો વપરાશ જ નહોતો વધ્યો, પરંતુ મુસાફરોને પણ ગંતવ્ય સ્થાને પહોંચવામાં ઘણો સમય લાગતો હતો. હવે હવાઈ ક્ષેત્ર ખુલતાની સાથે જ દુબઈ, અબુ ધાબી અને શારજાહ જેવા વ્યસ્ત એરપોર્ટ પર ફ્લાઈટ્સની સંખ્યામાં વધારો થશે. મુસાફરીનો સમય ઘટશે અને એરલાઇન્સને ઈંધણની બચત થતા લાંબા ગાળે ટિકિટના દરોમાં પણ રાહત મળી શકે છે.
કનેક્ટિંગ ફ્લાઈટ્સ લેનારાઓને સૌથી વધુ ફાયદો
જે પ્રવાસીઓ ટ્રાન્ઝિટ પોઈન્ટ તરીકે UAE નો ઉપયોગ કરે છે, તેમના માટે હવે મુસાફરી ઘણી સરળ બની જશે. કનેક્ટિંગ ફ્લાઈટ્સમાં થતો વિલંબ ઘટશે અને આંતરરાષ્ટ્રીય કનેક્ટિવિટી ફરીથી તેના જૂના લયમાં પરત ફરશે. મધ્ય પૂર્વના આર્થિક હબ ગણાતા UAE માટે આ નિર્ણય પ્રવાસન અને વેપાર બંને દ્રષ્ટિએ અત્યંત મહત્વનો સાબિત થશે.