નવી દિલ્હી : નવી દિલ્હીમાં મુખ્ય ચૂંટણી કમિશનર જ્ઞાનેશ કુમાર વિરુદ્ધ 'કોકરોચ જનતા પાર્ટી' (CJP) દ્વારા કરવામાં આવેલા વ્યાપક વિરોધ પ્રદર્શન અને વહીવટી તંત્ર દ્વારા હજારો લોકોની અટકાયત કરવાના મામલે હવે આંતરરાષ્ટ્રીય સ્તરે પણ પ્રતિક્રિયાઓ સામે આવી છે. સંયુક્ત રાષ્ટ્રના માનવાધિકાર આયોગ (OHCHR) દ્વારા નવી દિલ્હીમાં થયેલી વ્યાપક અટકાયતો પર ગંભીર ચિંતા વ્યક્ત કરવામાં આવી છે અને શાંતિપૂર્ણ સભા તથા વિરોધના અધિકારનું સન્માન કરીને તમામ બિનશરતી અટકાયતીઓને મુક્ત કરવાની માંગ કરવામાં આવી છે.

પ્રાપ્ત વિગતો મુજબ, શનિવારે રાષ્ટ્રીય રાજધાનીમાં જંતર-મંતર તરફ કૂચ કરવાના પ્રયાસો દરમિયાન પ્રદર્શનકારીઓ, આંદોલનના નેતાઓ, નાગરિક સમાજ સંગઠનોના સભ્યો, વકીલો અને પત્રકારો સહિત ૩,૦૦૦ થી વધુ લોકોની અટકાયત કરવામાં આવી હતી. સંયુક્ત રાષ્ટ્રના આયોગે ભારતીય અધિકારીઓને કાયદો અને વ્યવસ્થા જાળવતી એજન્સીઓ દ્વારા મહત્તમ સંયમ રાખવા અને શાંતિપૂર્ણ પ્રદર્શનો પર મૂકવામાં આવેલા પ્રતિબંધો જરૂરિયાત તથા પ્રમાણસરતાની કસોટી પર ખરા ઉતરે તે સુનિશ્ચિત કરવા અપીલ કરી છે. તેમજ મનસ્વી રીતે અટકાયતમાં લેવાયેલા લોકોને તાત્કાલિક મુક્ત કરવા અને જનતાની ચિંતાઓ દૂર કરવા અર્થપૂર્ણ સંવાદ યોજવા અનુરોધ કર્યો છે.

આ દરમિયાન, વહીવટી તંત્ર દ્વારા જાહેર પરિવહન, ૪૫ જેટલા મેટ્રો સ્ટેશનો અને ટ્રેન સેવાઓ બંધ રાખવાના આદેશો સામે ગંભીર સવાલો ઉઠ્યા છે. આ મામલે શૈલેન્દ્ર મણિ ત્રિપાઠી દ્વારા કેન્દ્રીય ગૃહ સચિવ સામે અદાલતના આદેશોના ઉલ્લંઘન બદલ અવમાનના અરજી દાખલ કરવામાં આવી છે. આ ઉપરાંત વરિષ્ઠ વકીલ મેનકા ગુરુસ્વામી દ્વારા લોકોની અટકાયતને પડકારતી હેબિયસ કાર્પસ (બંદિપ્રત્યક્ષીકરણ) અરજી પણ દાખલ કરવામાં આવી છે. આ બંને મહત્વની અરજીઓ પર સુપ્રીમ કોર્ટના ન્યાયાધીશ જોયમલ્યા બાગચી અને વી. મોહનાની વિશેષ ખંડપીઠ સમક્ષ રવિવાર, ૧૧ ઓક્ટોબરે સવારે ૧૦:૩૦ વાગ્યે વિશેષ સુનાવણી હાથ ધરવામાં આવશે.

પોલીસ સૂત્રોના જણાવ્યા અનુસાર, શનિવારે સાંજે CJP ના નેતાઓને બાદ કરતા અન્ય અટકાયત કરાયેલા મોટાભાગના પ્રદર્શકોને મુક્ત કરી દેવામાં આવ્યા છે, જ્યારે CJP નેતાઓ સામે કાયદેસરની પ્રક્રિયા અનુસરવામાં આવી રહી છે. બીજી તરફ, CJP ના નેતા અજિંક્ય શિંદેએ સ્પષ્ટ જાહેરાત કરી છે કે જ્યાં સુધી મુખ્ય ચૂંટણી કમિશનર પોતાના પદ પરથી રાજીનામું નહીં આપે ત્યાં સુધી તેમનું આંદોલન અવિરત ચાલુ રહેશે અને રવિવારે પણ ફરીથી જંતર-મંતર તરફ કૂચ કરવામાં આવશે.

આગામી રવિવાર, ૧૧ ઓક્ટોબરના રોજ દેશભરમાં અનેક મહત્વપૂર્ણઘટનાઓ પણ નોંધાવાની છે, જેમાં વડાપ્રધાન નરેન્દ્ર મોદીનો ચેન્નાઈ પ્રવાસ, ગુજરાતમાં ગાંધીનગર મહાનગરપાલિકા અને થરા નગરપાલિકાની ચૂંટણી માટેનું મતદાન, આસો નવરાત્રિનો પ્રારંભ તથા સુરત મહાનગરપાલિકાની ક્લાર્ક ભરતી પરીક્ષાનો સમાવેશ થાય છે. આ તમામ રાજકીય અને સામાજિક ઘટનાઓ વચ્ચે નવી દિલ્હીનું CJP આંદોલન અને સુપ્રીમ કોર્ટની સુનાવણી પર સૌની ખાસ નજર રહેશે.