ચંદીગઢ, તા.20: પંજાબમાં સિન્થેટિક ડ્રગ્સ અને નશીલા પદાર્થોની અનિયંત્રિત ઉપલબ્ધતા સામે બુલંદ અવાજ ઉઠાવીને જીવ ગુમાવનાર યુવાનો અને કાર્યકર્તાઓના પરિવારોને સાંત્વના આપવા માટે કેન્દ્રીય ગૃહમંત્રી અમિતભાઈ શાહ મંગળવારે પંજાબના પ્રવાસે આવ્યા હતા. ગુરદાસપુર અને સંગરૂર બાદ તેઓ માનસા જિલ્લામાં પહોંચ્યા હતા, જ્યાં તેમણે ડ્રગ્સ વિરોધી આંદોલન સાથે જોડાયેલા દિવંગત પરવિંદર ઝોટાના પરિવાર સાથે મુલાકાત કરીને સમગ્ર ઘટનાની ગંભીર નોંધ લીધી હતી અને પીડિત પરિવારને ન્યાય અપાવવાની દ્રઢ ખાતરી આપી હતી.

આ પ્રવાસ દરમિયાન ગૃહમંત્રી સૌપ્રથમ ગુરદાસપુર જિલ્લાના શ્રી હરગોવિંદપુર વિસ્તારમાં આવેલા મારી પનવાન ગામ પહોંચ્યા હતા, જ્યાં તાજેતરમાં જ ડ્રગ્સના વેચાણનો વિરોધ કરવા બદલ નિર્દયતાથી હત્યા કરાયેલા વિક્રમજીત સિંહના પરિવારજનોને મળ્યા હતા. મૃતકની ભત્રીજી સરોજ દીપકે આ મુલાકાત અંગે માહિતી આપતા જણાવ્યું હતું કે કેન્દ્રીય મંત્રીએ તેમને ન્યાય અપાવવાની ખાતરી આપી છે અને આ સમગ્ર માખણની તપાસ સીબીઆઈ (CBI) ને સોંપવાના સંકેત આપ્યા છે. પરિવારજનોએ આરોપ લગાવ્યો છે કે હુમલાખોરો નશામાં ધૂત થઈને આવ્યા હતા અને તેમણે આ જઘન્ય કૃત્ય આચર્યું હતું.

ત્યારબાદ ગૃહમંત્રી સંગરૂર જિલ્લાના તૂર બંજારા ગામ ગયા હતા, જ્યાં તેમણે 7 સપ્ટેમ્બરે આપઘાત કરનાર દલિત વ્યક્તિ ગુલઝાર સિંહના પરિવાર સાથે મુલાકાત કરી હતી. ગુલઝાર સિંહના પરિવારે આરોપ લગાવ્યો હતો કે પંજાબના નાણાં મંત્રી સમક્ષ તેમના વિસ્તારમાં ડ્રગ્સના વેચાણનો મુદ્દો ઉઠાવવા બદલ તેમને માનસિક રીતે હેરાન કરવામાં આવ્યા હતા અને જાતિવાદી અપશબ્દો કહેવામાં આવ્યા હતા, જેનાથી કંટાળીને તેમણે આત્યંતિક પગલું ભર્યું હતું. પંજાબ ભાજપના ઉપાધ્યક્ષ ફતેહજંગ સિંહ બાજવાએ આ મુલાકાત અંગે પ્રતિક્રિયા આપતા જણાવ્યું હતું કે ભાજપે જલંધરમાં આપેલું વચન પાળ્યું છે અને 31 ડિસેમ્બર, 2029 સુધીમાં રાજ્યમાંથી નશાની સમસ્યાને જડમૂળથી નાબૂદ કરવા માટે કેન્દ્ર સરકાર સંપૂર્ણપણે કટિબદ્ધ છે.

આ મુલાકાતોની વચ્ચે પંજાબી ગાયક સ્વર્ગસ્થ સિદ્ધુ મૂસેવાલાના પિતા બલકૌર સિંહે પણ માનસામાં ડ્રગ્સ વિરોધી કાર્યકર્તા પરવિંદર સિંહ ઝોટાની હત્યાના વિરોધમાં ચાલી રહેલા પ્રદર્શન સ્થળની મુલાકાત લીધી હતી. તેમણે ઝોટાના પિતાને અપીલ કરી હતી કે તેઓ કેન્દ્રીય ગૃહમંત્રી સમક્ષ પંજાબમાં વધી રહેલા ગેંગસ્ટરોના ત્રાસનો મુદ્દો પણ અચૂક ઉઠાવે, જેથી જેલોમાં બંધ ગુનેગારો સામે કડક કાનૂની કાર્યવાહી સુનિશ્ચિત થઈ શકે.

ગૃહમંત્રીની આ ઉચ્ચસ્તરીય મુલાકાતને ધ્યાનમાં રાખીને પંજાબના ત્રણ સંવેદનશીલ જિલ્લાઓમાં સુરક્ષા દળોને સંપૂર્ણપણે એલર્ટ પર રાખવામાં આવ્યા હતા અને પોલીસ દ્વારા ચુસ્ત બંદોબસ્ત ગોઠવવામાં આવ્યો હતો. રાજ્યમાં વધતી જતી ડ્રગ્સની સમસ્યા અને તેને રોકવામાં સ્થાનિક પ્રશાસનની નિષ્ક્રિયતા સામે જનતામાં રોષ જોવા મળી રહ્યો છે, ત્યારે કેન્દ્ર સરકારના આ કડક રૂખથી આગામી દિવસોમાં રાજકીય ગરમાવો વધુ તેજ બનવાના એંધાણ વર્તાઈ રહ્યા છે.