નવી દિલ્હી : ગ્લાસગો ખાતે યોજાયેલી કોમનવેલ્થ ગેમ્સ ૨૦૨૬ (CWG 2026) માં ભારતીય વેઈટલિફ્ટરોએ ઝળહળતો દેખાવ કરતા દેશનું નામ રોશન કર્યું છે. આ ઐતિહાસિક સફળતાને બિરદાવવા માટે કેન્દ્રીય યુવા બાબતો અને રમતગમત મંત્રી મનસુખ માંડવિયાએ સોમવારે નવી દિલ્હી ખાતે તમામ મેડલ વિજેતા ખેલાડીઓનું સન્માન કર્યું હતું. રમતગમત મંત્રીએ ભારતીય ખેલાડીઓના અદ્ભુત પ્રદર્શનને બિરદાવતા ગોલ્ડ મેડલ વિજેતાઓને ₹૩૦ લાખ, સિલ્વર મેડલ વિજેતાઓને ₹૨૦ લાખ અને બ્રોન્ઝ મેડલ વિજેતાઓને ₹૧૦ લાખના રોકડ પુરસ્કાર આપી સન્માનિત કર્યા હતા.
ભારતીય વેઈટલિફ્ટિંગ ટુકડીએ કુલ ૧૧ વજન શ્રેણીઓમાં ભાગ લીધો હતો, જેમાંથી આઠ મેડલ — એક સુવર્ણ, છ રજત અને એક કાંસ્ય — જીતીને દેશ માટે યાદગાર પ્રદર્શન કર્યું હતું. આ સ્પર્ધામાં ઓલિમ્પિક સિલ્વર મેડાલિસ્ટ મીરાબાઈ ચાનુએ સતત ત્રીજી કોમનવેલ્થ ગેમ્સમાં ગોલ્ડ મેડલ જીતનારી પ્રથમ ભારતીય વેઈટલિફ્ટર બનીને નવો ઈતિહાસ રચ્યો હતો. આ ઉપરાંત ઋષિકાંત સિંહ અને વલ્લુરી અજય બાબુએ સ્નેચમાં નવા ગેમ્સ રેકોર્ડ બનાવ્યા હતા.
ખેલાડીઓ અને દ્રોણાચાર્ય એવોર્ડ વિજેતા મુખ્ય કોચ વિજય શર્માને અભિનંદન આપતાં મનસુખ માંડવિયાએ જણાવ્યું હતું કે, "ગુરુની ભૂમિકા ચેમ્પિયન બનાવવામાં સૌથી મોટી હોય છે. દેશના ૧૪૦ કરોડ નાગરિકો અને સંસદે પણ તમારા વિજયની ઉજવણી કરી છે." તેમણે મેડલ વિજેતાઓમાં મોટાભાગના ખેલાડીઓ 'ખેલો ઈન્ડિયા' (Khelo India) અને SAI NCOE ના હોવાનો ઉલ્લેખ કરતા સરકારના ક્રીડા ઇકોસિસ્ટમના સફળ મોડલને બિરદાવ્યું હતું.
રમતગમત મંત્રીએ તમામ વિજેતાઓને દેશની શાળાઓ અને કોલેજોની મુલાકાત લઈને યુવાનોને રમતગમતમાં આગળ વધવા પ્રેરણા આપવા હાકલ કરી હતી. સાથે જ તેમણે એશિયન ગેમ્સ ૨૦૨૬ માટે ખેલાડીઓને અત્યારથી જ શ્રેષ્ઠ તૈયારીઓ કરવા પ્રોત્સાહિત કર્યા હતા.