બિલાસપુર : દેશભરમાં દશેરાનો તહેવાર ભારે ઉત્સાહથી ઉજવવામાં આવી રહ્યો હતો, ત્યારે છત્તીસગઢના બિલાસપુરથી એક અત્યંત અનોખી અને ચર્ચાસ્પદ ઘટના સામે આવી છે. બિલાસપુરમાં રાવણ દહનને લઈને ફાટી નીકળેલો વિવાદ એટલો વધી ગયો કે રાવણ દહન સમિતિના સભ્યો અનોખી અંદાજમાં પોલીસ સ્ટેશન પહોંચ્યા હતા. સમિતિના સભ્યો ભગવાન રામ, લક્ષ્મણ અને હનુમાનનો દિવ્ય વેશ ધારણ કરીને સીધા સિવિલ લાઇન્સ પોલીસ સ્ટેશન પહોંચ્યા હતા અને પોતાના જ ભૂતપૂર્વ સભ્ય સામે લેખિત ફરિયાદ નોંધાવી હતી.

સમિતિના સભ્યોનો આક્ષેપ છે કે દશેરાના પર્વ પર નિર્ધારિત સમય પહેલાં અને કોઈપણ પ્રકારની ધાર્મિક વિધિઓ કે પ્રાર્થના કર્યા વગર જ મનીષ રાવ ચૌહાણ ઉર્ફે અંકિત અને અન્ય લોકો દ્વારા રાવણનું પૂતળું બાળી નાખવામાં આવ્યું હતું. આ ઘટનાથી તેમની ધાર્મિક લાગણીઓને ભારે ઠેસ પહોંચી છે અને ધાર્મિક સંવાદિતાને ખલેલ પહોંચાડવાનો પ્રયાસ કરવામાં આવ્યો છે. સમિતિની આ ગંભીર ફરિયાદના આધારે પોલીસે ભારતીય ન્યાય સંહિતા (BNS) ની સંબંધિત કલમો હેઠળ ગુનો નોંધીને કાયદેસરની તપાસ હાથ ધરી છે, જે હાલ સમગ્ર વિસ્તારમાં ભારે ચર્ચાનો વિષય બન્યો છે.