લખનૌ: વર્ષ ૨૦૨૭ની ઉત્તર પ્રદેશ વિધાનસભા ચૂંટણી જેમ-જેમ નજીક આવી રહી છે, તેમ-જેમ રાજ્યનું રાજકીય સમીકરણ રસપ્રદ બનતું જઈ રહ્યું છે. સમાજવાદી પાર્ટી (SP)ના રાષ્ટ્રીય અધ્યક્ષ અખિલેશ યાદવે યુવા મતદારો અને ખાસ કરીને 'જનરલ-ઝેડ' (Gen-Z) પેઢીને રાજકારણમાં જોડવા માટે એક મોટો રાજકીય સંકેત આપ્યો છે. લખનૌમાં યોજાયેલી એક પ્રેસ કોન્ફરન્સ દરમિયાન સપા સુપ્રીમોએ ગોરખપુરથી મુખ્યમંત્રી યોગી આદિત્યનાથ સામે ચૂંટણી લડવા માટે એક યુવાન યુટ્યુબરને જાહેરમાં ઓફર કરીને સૌકોઈને ચોંકાવી દીધા છે.

પ્રેસ કોન્ફરન્સ દરમિયાન પ્રશ્નકર્તા અને યુટ્યુબર આયુષ ગુપ્તાએ અખિલેશ યાદવને સવાલ કર્યો હતો કે શું સમાજવાદી પાર્ટી આગામી વિધાનસભા ચૂંટણીમાં વર્તમાન જનરલ-ઝેડ યુગને ધ્યાનમાં રાખીને કોઈ યુવાનને રાજકારણમાં ટિકિટ આપશે? જેના જવાબમાં અખિલેશે હસતાં-હસતાં કહ્યું કે જો કોઈ યુવાન ચૂંટણી લડવા માંગતો હોય, તો પાર્ટી તેના પર ચોક્કસ વિચાર કરશે. ત્યારબાદ આયુષે પોતાની ઉમેદવારી રજૂ કરી હતી, જેના પર અખિલેશે તેમને કયા મતવિસ્તારમાંથી લડવું છે તેવું પૂછ્યું. આયુષે જવાબ આપ્યો કે પાર્ટી જે બેઠક નક્કી કરશે ત્યાંથી તેઓ તૈયાર છે. ત્યારે અખિલેશે હળવાશ અને ગંભીરતા બંને સાથે કહ્યું કે, જો તેઓ તૈયાર હોય તો તેમણે મુખ્યમંત્રી યોગી આદિત્યનાથ સામે ચૂંટણી લડવી પડશે અને જો તેઓ સંમત થાય તો પાર્ટી પાછળ હટશે નહીં. આ વાતચીતનો વીડિયો સોશિયલ મીડિયા પર ભારે વાયરલ થયો છે.

જોકે આ વાતચીતને માત્ર ઔપચારિક ટિકિટ જાહેરાત ગણવી ઉતાવળ ગણાશે, પરંતુ આના દ્વારા સપાનો રાજકીય સંદેશ એકદમ સ્પષ્ટ છે. અખિલેશ યાદવ સોશિયલ મીડિયા પર સક્રિય નવી પેઢી અને યુવા ચહેરાઓને જાહેર પ્લેટફોર્મ પર આગળ લાવવાની રણનીતિ પર કામ કરી રહ્યા છે. વર્ષ ૨૦૨૭ની ચૂંટણીમાં ભાજપને સત્તા પરથી હટાવવા માટે પશ્ચિમ યુપીના ગાઝિયાબાદ જેવા શહેરી વિસ્તારોથી લઈને પૂર્વાંચલના ગાઝીપુર સુધી અલગ-અલગ સામાજિક અને રાજકીય સમીકરણો સાધવા પડશે. બેરોજગારી, શિક્ષણ, મોંઘવારી, કાયદો-વ્યવસ્થા અને યુવાનોની આકાંક્ષાઓ જેવા મુદ્દાઓને કેન્દ્રમાં રાખીને પક્ષ સ્થાનિક સ્તરે તૈયારી કરી રહ્યો છે.

સમાજવાદી પાર્ટી અને કોંગ્રેસ વચ્ચે આગામી ચૂંટણીને લઈને ગઠબંધન અને બેઠકોની વહેંચણીની ચર્ચા પણ ચાલી રહી છે. કોંગ્રેસ વધુ બેઠકોની માંગ કરી રહી છે, જ્યારે સપા જીતવાની ક્ષમતા  પર ધ્યાન કેન્દ્રિત કરી રહી છે. અખિલેશ યાદવે અગાઉ સ્પષ્ટ કર્યું છે કે ગઠબંધનનો મુખ્ય આધાર બેઠકોની સંખ્યા નહીં પરંતુ જીતનો હોવો જોઈએ. જો બંને પક્ષો વચ્ચે સમજૂતી સધાય છે, તો વિપક્ષી મતદારોનું ધ્રુવીકરણ રોકવામાં મદદ મળશે અને મજબૂત સંગઠનવાળી બેઠકો પર યુવા ઉમેદવારોને પણ મેદાનમાં ઉતારવાની શક્યતાઓ ખુલી જશે.