લખનૌ: ઉત્તર પ્રદેશમાં ૨૦૨૭ની વિધાનસભા ચૂંટણીના ભણકારા વાગી રહ્યા છે, તેવામાં મતદાર યાદીના એક ચોંકાવનારા આંતરિક વિશ્લેષણે રાજ્યના રાજકારણમાં ભારે ખળભળાટ મચાવી દીધો છે. દાવો કરવામાં આવી રહ્યો છે કે તાજેતરમાં હાથ ધરાયેલા ખાસ સુધારણા કાર્યક્રમ (SIR) દરમિયાન જેટલા નવા મતદારો ઉમેરાયા છે, તેમાંથી અંદાજે ૩૫ ટકા મતદારો મુસ્લિમ સમુદાયના છે. આ ઉછાળાને કારણે રાજ્યના કુલ મતદારોમાં મુસ્લિમ વોટર્સનો હિસ્સો ૧૮.૬ ટકાથી વધીને ૧૯.૫ ટકાએ પહોંચી ગયો હોવાનું ચર્ચાઈ રહ્યું છે. જો કે આ વધારો ટકાવારીની દ્રષ્ટિએ માત્ર ૦.૯ ટકા જેટલો નજીવો દેખાય છે, પરંતુ નવા નોંધાયેલા યુવા મતદારોમાં આ સમુદાયનો મોટો હિસ્સો આગામી ચૂંટણીમાં મોટો ઉલટફેર કરી શકે તેમ હોવાથી તમામ પક્ષો એલર્ટ મોડ પર આવી ગયા છે.

જો કે, લોકશાહીની પરંપરા મુજબ ભારતીય ચૂંટણી પંચ ક્યારેય પણ ધર્મના આધારે સત્તાવાર મતદારોનો ડેટા જાહેર કરતું નથી. આમ છતાં, આ વિશ્લેષણ સામે આવ્યા બાદ વહીવટી તંત્ર સફાળું જાગ્યું છે અને ડેટાની ક્રોસ-વેરિફિકેશન તેમજ વિગતવાર ચકાસણીની પ્રક્રિયા તેજ કરી દેવામાં આવી છે. પ્રાથમિક તપાસમાં મતદાર યાદીના ડેટામાં કેટલીક વિસંગતતાઓ અને ક્ષતિઓ બહાર આવી છે, જેને સુધારવા માટે અત્યારે યુદ્ધના ધોરણે કામગીરી ચાલી રહી છે. ૨૦૧૧ની છેલ્લી સત્તાવાર વસ્તી ગણતરી મુજબ ઉત્તર પ્રદેશમાં મુસ્લિમ વસ્તીનો હિસ્સો ૧૯.૩ ટકાની આસપાસ હતો, ત્યારે ચોક્કસ વય જૂથમાં વસ્તીના પ્રમાણ કરતાં મતદારોની સંખ્યા કેમ વધી, તે વહીવટી ઓડિટનો મુખ્ય વિષય બન્યો છે.

આ આંકડાકીય માયાવી જાળના રાજકીય પરિણામો અત્યંત દૂરોગામી સાબિત થઈ શકે છે, કારણ કે ઉત્તર પ્રદેશની સેંકડો બેઠકો પર મુસ્લિમ મતદારો નિર્ણાયક ભૂમિકા ભજવે છે. ઇતિહાસ ગવાહ છે કે ૨૦૧૯ની લોકસભા, ૨૦૨૨ની વિધાનસભા અને ૨૦૨૪ની સામાન્ય ચૂંટણીઓમાં લઘુમતી મતોનો મોટો હિસ્સો એકતરફી રીતે સમાજવાદી પાર્ટી અને તેના ગઠબંધનની તરફેણમાં ગયો હતો. હવે જો ૨૦૨૭ની જંગ પહેલાં આ નવો ડેટા સાચો સાબિત થાય, તો સત્તાધારી પક્ષ ભાજપ અને વિપક્ષ સપા વચ્ચે વોટ બેંકને અંકે કરવા માટેનો આંતરિક સંઘર્ષ વધુ તીવ્ર બનશે અને પશ્ચિમ યુપી સહિતના અનેક વિસ્તારોના ચૂંટણી સમીકરણો સંપૂર્ણપણે બદલાઈ જશે.